Genèse 4
4
Kaayeen nì Abeel bɔti
1Adam béè u-nimpuu Awa ní u cáá dipool ki màl̄ Kaayeen, ní ki bí yii: «Ti-Dindaan tútúǹ-mi m màl̄ kibininjabiki.» 2Míǹ boonee ní u gíti cáá dipool ki màl̄ Kaayeen naal Abeel.
Abeel wíiǹee ní ki bíi kpàá tiwaŋkuti, ní u-maan Kaayeen úǹ kù tikpaal. 3An dāa bāań ŋyunti ŋubɔee ní Kaayeen lēeń u-kpaajinti ki cáań ki ŋá ti-Dindaan saraa. 4Ní Abeel mun lēeń apibil ŋin u-piii iba péé ki màl̄ee ní ki dū ŋi-nanti tin cáá ŋkpamee ki ŋá ti-Dindaan saraa. Ní ti-Dindaan fōō Abeel nì u-saraau#4.4 Dūú ŋmàntī nì Eebru 11.4., 5ama ní ki fātì u-boon ki tīī Kaayeen nì u-saraau. An puee ní Kaayeen fōō diŋuul tikpil, u-nimbiin cúu bíil̀. 6Ní ti-Dindaan bí Kaayeen yii: «Ba ŋá ní a fōō diŋuul, a-nimbiin cúu bíil̀ mimmee? 7A yaa bàà ŋá tin ŋān̄ee, a-yil bàà gáań ní. A yaa kaa ŋá tin ŋān̄ee, ikpiti kpátì ki dɔ̄ a-punyɔkɔpu ki nyàab̀-si, ama sii pɔ̄ɔkiǹ-i.»
8Niinee ní Kaayeen sòon̄ nì u-naal Abeel#4.8Tigbɔn tikpikil tiba poonee, bi nāatì yii: Niinee ní Kaayeen bí u-naal Abeel yii: <càntī tí cù kusaau>. - ki kūū: kpèè Maat 23.35, Luuki 11.51, 1 Yoow 3.12.. Ŋyunti ŋun bi bí kusaaunee ní Kaayeen cúú u-naal Abeel ki kūū.
9Ní ti-Dindaan bālifì Kaayeen yii: «A-naal Abeel bí la?» Ní u kíí-u yii: «Maa nyí. Man di cí m-naalaaa?» 10Ní ti-Dindaan bí-u yii: «Ba ní a ŋée! A-naal fatikuu di gbáàń ibiil taapu ki dāa bāań man nee#4.10 Abeel fatikuu: kpèè Eebru 12.24.. 11Kɔŋkɔnnee a nín kūū a-naal kitiŋ nyùn̄ u-fatikuuee, m tɔ́-si mbusu. 12A yaa ti kùn̄ee, kitiŋ kaa làá ti lòoǹ. A làá nīn kíǹ ki tú ki yìiǹ an kɔkɔ ní kitiŋ pu.»
13Ní Kaayeen bí ti-Dindaan yii: «Óo, m-yìntitam gìńdi nyìmiǹ-mi maa ŋūǹ kí túń. 14A yaa jìn̄-mi díǹ nee kitiŋ pu an sá yii ḿ nīn cá ndandati kí taa nín̄ pìlīǹ-si, kí nīn tú ki yìiǹee, ubɔ yaa ká-mee, see ú kpɔ̀-mi.» 15Ní ti-Dindaan bí-u yii: «Aayee! Un di yaa kūū Kaayeeŋyee, bi làá téeǹ udaan min min u ŋée miluli pu ní.»
Ní ti-Dindaan ŋá u-pu kudaaŋŋu kubɔ yii ubɔ yaa ká-uee, ú taa kpɔ̀-u. 16Ní Kaayeen búntì ndandati kaa ti pìl̄ ti-Dindaan, ki tin kóòń kitiŋ kin bi yíì Noodee. A yaa bí Eedeenee, kì bí ŋwìiń nyalaŋki pú ní.
Kaayeen naantiibi bɔti
17Kaayeen cáá unimpu, ní u cáá dipool ki màl̄ Eenɔki. Boonee ní u máń adiin ní an dūu kpántì kitiŋ, ní u dū u-jipɔɔn yindi Eenɔki ki pú-kì. 18Ní Eenɔki màl̄ Yiraadi, ní Yiraadi màl̄ Meewujayeel, ní Meewujayeel màl̄ Meetukayeel, ní Meetukayeel màl̄ Leemeeki.
19Ní Leemeeki cáá binimpoobi bili, bi yíì upeekaa yii Ada, ki yíì uliliiti yii Siila. 20Ní Ada màl̄ Yabaal, úǹ di sá bin kɔkɔ kóò tantib poon ki yìiǹ ki kpàá inaayee naanja. 21U-naal ní bi nìn yíì Yubaal. Úǹ di sá bin bɔ̀ɔ́ tibati ki búǹ awulee naanja. 22Ní Siila mun màl̄ Tubaal-Kaayeen. Úǹ di nìn sá ucaa ki cáá tikúti nì tasab ki mɔ́ɔ̀ tiwan nì titɔntɔŋwan kɔkɔ. Naama di nìn sá Tubaal-Kaayeen niisal.
23Ní Leemeeki bí u-nimpoobi yii:
«Ada nì Siila, pīlifìmaan-mi!
M-nimpoobi, kpòom̄maan ni-tafaliŋ
kí pīlifì tin m làá sòoǹee!
Bi ŋá-mi tiweendi
ní m kūū unil.
Tiweendi tin bi ŋá-mee puee,
m kūū kibiki.
24Bi làá tɔ̀ Kaayeen pɔntooŋyi ŋfunyɔm miluli pu,
ní kí tɔ̀ man Leemeeki pɔntooŋyi
ŋfunyɔm mita kpá imuŋku inaa pu.»
25Adam nì u-nimpuu gíti kpáfì ní u-nimpuu cáá dipool ki màl̄ kibininjabiki ní ki pú-kì diyindi yii Seeti, ki bí yii: «Unimbɔti gíti tīī-mi kibininjabiki ki téeǹ Abeel un Kaayeen kūūyee yil pu.»
26Ní Seeti mun màl̄ kibininjabiki ní ki pú-kì diyindi yii Eenɔsi. Ŋyunti gbanti ní binib kíĺ ki kíǹ ki yíì Unimbɔti yii ti-Dindaan.
Zur Zeit ausgewählt:
Genèse 4: BASSARDC
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
BIBLE EN N'TCHAM (Bassar) © Alliance Biblique du Togo, 2013.