MATIU 4
4
A Vui Esi mo kali Jisas
1Siu a Vui Gogona mo tomuegi Jisas sulo vanue vurogi ve i Vui Esi vin keli lehie. 2Ingere he gagani tea huri na rani ngavulu gaivesi ko a bongi ngavulu gaivesi, siu mo bei mweruruhi. 3Ko a Vui Esi, mo vanai lobei Jisas mo kali lehie, mo veve vena, “Tare ve iniko i Netui God, gon veve lawe na vatu ngere ngaha ve ran dori gina bereti.”
4I Jisas mo duvi vena, “U reve beno lo Reve reve Gogona vena,
‘A tangaloi vin he mwaso lai tea gina
bereti hogosie,
nge gina leo doluegi ram mwalue
dena wuwai God hi mo veve.’ ”
5Siu a Vui esi mo lai Jisas vano lo togagi venue lawua gogona Jerusalem, ko mo labetaginie lo hunei Vale Gogona, hi u eno namawe, 6Ko mo veve lawea vena, “Tare ve iniko i Netui God, gon qale hivo; vuine huri u reve beno lo Reve reve Gogona vena:
‘God vin horara
nona engsel hurigo:
Rain halovigo
hage lo limara,
vai teu gom taturegi
na karumu lo vatu.’ ”
7I Jisas mo duvi vena, “U reve beno vage lo Reve reve Gogona vena, ‘Go mese kali lehi na Huqe nomu God.’ ”
8Siu a Vui esi mo lai Jisas hage lo vuhungei vusi namawe mo haharagi na vanuei ratahigi doluegi talo ure ko a gareanara, 9mo veve lawea vena, “Nain bete na gineu doluegi ingere ngaha lawego, tare ve gom huduhudu goroau.”
10Siu I Jisas mo duvi lawea vena, “Vano denieu, Setan! Huri u reve beno lo Reve reve Gogona vena,
‘Gon huduhudu goro na Huqe a nomu God,
ko gon vagagogona ginie hogosie.’ ”
11I Siu a Vui esi mo siregi Jisas; ko ira engsel ram vonai, ram tabanagi lawea.
I Jisas mo tauvuigi na nona lalakogi a Kalili
12I Jisas mo rongo huri ve rau teu Jon beno lo valei vauveu, ingeie mo vano beragi a Kalili. 13Ko ingeie mo siregi Nasaret, mo vano mo toga a Kabeniam, lo mwararai Wai ta Kalili, lo vanuara Sebulun ko Navtali. 14Mo vai mwere ngaha huri ve vin vagahorongi na leo gina wuwai Aesaea a tangaloi ligoligogi u veve vena:
15“Vanuara Sebulun, vanuara Navtali,
Mo huri mo vano tavului Jodan,
Kalili a togagi venue nora haroharo!
16A sinobu ram toga lolo dodogi
ram lehi na leleo lawua!
Ko ingere ram toga lolo malumelui mateana
a leleo mo leleo haginire!”
17Dena tarogi hi i Jisas mo tau vuigi mo toretore vena: “Nen ladowenigi, a vevenagi a mwasoana garaqa hi God mo ratahigi lolona mo kakarani ve na vonai!”
I Jisas mo ware na tangaloi loli ige gaivesi
18I Jisas mo vano lo mwararai Wai ta Kalili, mo lehi na tangaloi loli ige gairue ingere a reretehigi, Saemon, mo ware gi Bita, ko i tuana Andru, rom tuli nora gabe lolo wai. 19I Jisas mo veve lawera vena, “Nero hurieu ko ineu nain huhui gimiru neri loli na tangaloi.” 20Siserigi rom siregi na nora gabe rom hurie.
21Mo dige qilodo mo lehire reretehigi gairue vage, i Jemis netui Sebedi ko i tuana Jon. Ingere vage rom toga lolo aka mei tamara Sebedi, rom vai huri na nora gabe. I Jisas mo warera; 22rom maraga siserigi dena akara ko i tamara, rom huri Jisas.
I Jisas mo huhui, mo toretore ko mo vagamwasoi
23I Jisas mo dige doluegi na Kalili, mo huhui lolo nora valei soneana, mo toretore gina Roro Garea huri ve God vin voragi Ratahigi goro na tangaloi doluegi ko mo vagamwasoire ram sege gina lalangai segeana u sao. 24A rorona mo gao doluegi na vanue Siria, ko ram laire hi ram sege gina lalangai segeana wagiwegineu u sao, ko lavasigi ram a rongo gagarasi ram vonai meire lobena: lavasigi a vui esi lure, lavasigi ram matemategivule, lavasigi ira lukuluku; ko i Jisas mo vagamwasoire.
25A sinobu u sao ram hurie den Kalili, dena qatui venue hangavulu, den Jerusalem, den Judia ko dena tavului Jodan.
Zur Zeit ausgewählt:
MATIU 4: HNT
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Bible Society of the South Pacific, 2013