Matio' 24

:Yusu' :za-' Nyorsoa-a' 'sla-a' 'kor-dih-dhih:

(Mk 13.1-2; Lu 21.5-6)

1:Yee' :yeh :Yusu'-a 'wluh-a 'de Nyorsoa-a' 'sla bo, 'de or na-a, or mu-a, :yee' or-a'a: bo :na-nyor⧾ yi 'o or bo, on 'ye-or' 'gbu⧾ :en :ne-a 'sla :dao' 'de dih, :torne:. 2Jorwor: or 'dae: 'de on bo, A 'ye 'gbu⧾-a' klehkpeh :daa 'weh :e? Dhih 'jeh, 'an zela a :gwluhuh', eh :se-' sobu' :korn i, :on 'ye-a' 'o on 'be ken :sie:. Sobu'⧾-a' klehkpeh, en mu ken dih zela-eh:, en 'ye 'zorn :po-eh:.

'Kle 'ye-eh:

(Mk 13.3-13; Lu 21.7-19)

3:Yee' :yeh :Yusu' :dhe-a dih 'de 'Orle-tluh ken, :yee' or-a'a: bo :na-nyor⧾, mo-: dhele-or dih, 'de 'slan :pa ka 'di, on 'da, Zela: :a :gwluhuh' ti :yihih :eh, deh⧾ :daa, en mu :no-eh :eh? Deh :eh mu 'yi :to-dih-deh :no, 'de :a 'ye-eh' yubo:, 'do :an-a' 'de :yi-deh-: 'dekorn: 'bluhba-a' 'dlu-' :jla-deh-: bo :eh?

4'De or :wlu 'de on bo, or 'dae:, A 'dhu a-a' 'jeh :dhororn'. A-a' 'worn-:-', nyor-a' :bo-dih:-' a dih. 5Deh no-eh, nyor⧾ :dhulu', mo-: :an mu 'de 'an 'nyne ken :yi-dih:. Mo-: :an mu :ao', mo-: Nyorsoa-a' 'taan'-yu: 'o, 'de on 'ye nyor⧾ :dhulu' dih :bo-dih:. 6:Yee' a mu tuh-a' 'nyne 'worn-:, 'de a 'ye tuh-a' kuna'⧾ 'worn :ke. Jorwor: a yubo-eh, a-a' :ple-' :fano. Deh no-eh, deh⧾ :daa, en :korn en 'ye :no-eh:, jorwor: eh 'see ti-a' 'dlu-' :jla-ti no kele'a:. 7'Bluhba⧾-dlu⧾-: 'bluhba⧾-dlu⧾-: en mu :vorn. :Yee' 'keen-boi'-a mu on 'bei' 'keen-boi' bo :vorn. 'Moeh: :eh 'kpa-a Ji Kou'-moeh:, eh mu 'de :yi deh⧾-' dih, 'de 'bluhba 'ye :tleh deh⧾-' dih. 8:Mor deh⧾ :daa, en-' klehkpeh :taa 'dlu bo mu, :yee' 'do 'kle 'ye-eh-a' glu 'dhu 'da :oo', :eh gweh-a :ka 'kwli-a no-a 'nynor, :or 'bhorn-a :or 'ye-a' :gbano :za.

9:Yee' an mu a :kpon, on 'ye a 'kle 'ye-dih:, 'de on 'ye a 'dba. 'Bluhba⧾-dlu⧾-a' klehkpeh, en mu a-uh' 'nyeh-:, 'an dhih. 10'Do ti :dao' 'i, nyor⧾ :dhulu'-a mu Nyorsoa-a' dhih 'jeh dih 'tali:. An mu on 'bei' :plo, 'de on 'ye 'nyeh-eh-dih:. 11:Yee' sih 'tmo :wele-eh: :po-nyor:⧾ :dhulu'-a mu-' :sorn, 'de on 'ye nyor⧾ :dhulu' dih :bo-dih:. 12Deh⧾-zon⧾-a' ken dih 'kpuhba-eh mu-eh :no, 'de :gwlor-nyor:⧾ :dhulu'-a' :ybeh-dih-eh 'ye :chehbe'-' pa. 13Jorwor: nyor :or se-a sea 'de ti 'ye-a' 'dlu-' :jla, :yee' or mu 'puh-:. 14Tubo-wlu:⧾ 'jeh :en kor-a Nyorsoa-a' nyor⧾ wlu 'ken :korn-eh 'i, en mu :po-eh:, dha 'bluhba-a' klehkpeh ken, 'de en 'ye dhih bo zela-deh-' 'dhu-eh: 'do :gwlor-nyor⧾-a' klehkpeh bo, 'de 'bluhba-a' 'dlu-' :jla-ti 'ye 'o nyni.

'Kulu-deh: :eh za-a deh⧾ gban-'

(Mk 13.14-23; Lu 21.20-24)

15:Yee' :Yusu'-a kpa or-a' wlu 'dlu bo, or 'dae:, :Yee' :mor a 'ye 'kulu-deh: :eh za-a deh⧾ gban-', :eh :korn-a dhih, Nyorsoa-a' wele-eh: :po-nyor: :Danio' :za-a-', 'de eh 'ye dih :nyna 'do Nyorsoa-a' gban 'i :ne-sla 'zorn, ('Nyi nyor :or zlo-a deh :daa, or 'worn-eh' dih.) 16:yee' 'nyi nyor⧾ :on :ne-a 'de :Judi'a-bluhba ken, on ple, on 'ye 'de tluh⧾ ken mu. 17:Mor nyor :ne 'de 'gbu 'dlu,#24.17 'De 'bluhba-dlu: :dao' ken, an-a'a: 'gbu⧾ an po-a, 'de en 'dlu⧾ no :pabuh', 'de nyor⧾-a :dhe 'de dih. 'do ti :dao' 'i, :yee' 'nyi or ple, or mu. Or-a' :pa-' 'de 'gbu, or-a' 'duo:-' deh⧾ :en :ne-a 'de on 'di-'. 18:Mor nyor :ne 'de 'gle, 'nyi or ple, or mu. Or-a' :yi-' :gwlor-'. Or-a' 'duo:-' or-a'a: 'korlor-'. 19'Do ti :dao' bo, eh mu 'i :kma 'gabaa, 'do 'nynor⧾ :on :ne-a 'kwli⧾-'-: 'dekorn: :yuh :an 'nya-dih-a 'nynuu-: bo. 20A bale: Nyorsoa, 'do ti a mu-a :ple 'di, 'de eh :ne-' :chehbe'-a' ti-: :eh beh-Nyorsoa-a' :gwlee-we-eh-: no. 21Deh no-eh, :mor ti :dao', en nyni 'o, :yee' eh mu 'kle 'ye-eh: :klaba' :no. 'Kle 'ye-eh: :klaba' :daa, eh mu 'kle 'ye-eh-a' klehkpeh-' :zi, :eh 'wluh-a ti Nyorsoa :no-dih:-a 'bluhba, 'de :eh :yeh-dih:-a zorn :daa ken. :Mor eh no :ao', :yee' eh-a' 'kle 'ye-tu: :dao', eh :se-' de :yi i :neheh', :ka ti-a mu-a 'dlu-' :tehn. 22Jorwor: :mor Nyorsoa se ti :dao' 'i 'koan'-dih: :dee', :yee' :gwlor-nyor⧾-a' klehkpeh-a mu 'meh-:, on 'ye 'o dih :gweh. Jorwor: nyor⧾ or gan-a, mo-: :korn dhih or mu ti :dao' 'i 'koan'-dih:.

23:Yee' 'do ti :dao' 'di, :mor nyor zela: a :gwluhuh', or 'da, A :gbee'e:. Nyorsoa-a' 'taan'-yu :wor :dhe dih, 'de mor or 'ye :ao', Or-: :ne 'de 'naa: 'o, a-a' :po-ih' dhih 'jeh-'. 24Deh no-eh, sih 'tmo :wele-eh: :po-nyor⧾-: 'dekorn: :yuh :an 'da-dih-a an-a' 'jeh 'Klae-: an mu-' :sorn, on 'ye 'yi :to-dih-deh:⧾ :klaba'⧾-: 'dekorn: nyor⧾ 'di dih 'ma-dih-deh⧾-: no. An mu deh⧾ :daa :no, on 'ye nyor⧾ Nyorsoa gan-a :sloror' dih :bo-dih:, :mor on 'beh-dih: eh-a' no-a'. 25A :gbee'e:. 'An sie ti de. 'An zela a :gwluhuh' :dueh'leh:.

26'Do eh-a' dha, :mor nyor⧾ zela: a :gwluhuh', :mor on 'da, A :gbee'e:. 'Klae, or-: :ne 'de :bhehneh'-bluhba ken :dao', :yee' a-a' :mu 'de. :Yee' :mor on 'da, A :gbee'e:. Or-: :ne 'de :chuu: :dao' 'di, :yee' a-a' :po-ih' dhih 'jeh-'. 27Deh no-eh, :ka dhehn-a no-a 'yli-' :chleh-eh, 'de eh chehn-a yao ken, :eh 'wluh-a 'de 'yluh-a' 'kwla 'wluh-dih: 'da, 'de :eh :yeh-dih:-a an-a' 'nior: 'kpa 'da ken, 'ka :wor 'yu an 'da-dih-a Nyor-kpalu-a' 'yu, or-a' yi-a'-a mu :ne.

28A yubo-eh', :dha deh 'meh-dih:-a, 'do :wor 'dhamua'⧾-a gweh-dih. :Yee' 'do :ka :ne-a :due' 'di, :yee' 'an mu de :yi :gbor :gbor.

:Yusu'-a' 'de :yi-eh:

(Mk 13.24-27; Lu 21.25-28)

29:Yee' :Yusu'-a wlu-' :chio'lo:, or 'da, :Mor 'kle 'ye-eh: :dao', eh-a' ti zi, :yee' 'do :dha :ne-a :due', 'yluh :se-' :fan i deh 'jeh, 'de mor 'chuh :se-' :fan i :ke. 'Chuh :dhlaen: :ne-a 'de yai', en mu 'zorn 'kpa-:. :Yee' deh⧾-a' klehkpeh :en 'ble-a 'kpih 'do yao :gwlii', en-' 'kpih-a mu 'i gbua:. 30:Yee' deh-: mu 'i :po-eh: 'de yai', eh 'ye 'yi :to-dih-deh no, 'do 'yu an 'da-dih-a Nyor-kpalu-a' 'yu, or-a' 'de :yi-eh bo. :Yee' 'dawor'⧾-dlu⧾-a' klehkpeh :en :ne-a dha 'bluhba ken, en mu 'vin-:, 'de en 'ye 'zlu, :mor en 'ye 'yu an 'da-dih-a Nyor-kpalu-a' 'yu, or :taa 'de yi, 'de 'ni-kpan:⧾ :en :ne-a 'de yai', 'nyne-', 'de 'kpih-: 'dekorn: dhih-a' 'i 'beh-a' :klaba'-: 'di. 31:Yee' or mu :gamu :bla, 'de or 'ye or-a'a: 'enjor-nyor⧾ dbo, on 'ye nyor⧾ or gan-a, :on :ne-a 'bluhba-a' 'for⧾ :ne-a :nyieh, yobo' po-a 'de :gle 'gbeheh 'di, :dha :due' po.

'Cheaan'-deh: 'wluh-a 'o 'fe-tu 'bhun

(Mk 13.28-31; Lu 21.29-33)

32:Yee' 'cheaan'-deh: a 'ye-a' 'chean' 'do 'fe-tu 'bhun, eh-: :dhe dih. :Mor an-a' 'gabuh⧾ :taa torbor, 'de on 'ye wlon⧾ :dele' 'dhu, :yee' a yubo-eh', :ka 'ni :dba 'i-ti-a nyni-a 'o. 33:Yee' 'ka-: 'o eh :ne :ke, :mor a :taa deh⧾-a' klehkpeh :daa 'ye, :yee' a mu-eh yubo: :ka ti :dao', en 'koan'-a bo 'gabaa. 34Dhih 'jeh, 'an zela a :gwluhuh', deh⧾-a' klehkpeh :daa, en mu :no-eh:, 'de jorwor: nyor⧾-a' klehkpeh :on :ne-a 'kmo dha ti :daa 'i, 'de an-a' ti 'ye 'o dih :gweh, on 'ye 'meh. 35'Bluhba-: 'dekorn: yao-: en mu 'dlu-' :jla, jorwor: 'an wlu :se-' dih :gweh i, :ka ti-a mu-a 'dlu-' :tehn.

Nyor se ti :dao' yubo:

(Mk 13.32-37; Lu 17.26-30, 34-36)

36:Yee' 'we-eh: :dao'-: 'yluh-buh: :dao'-: ti en mu-a 'de :yi, nyor se-ih yubo:. 'Enjor-nyor:⧾ :on :ne-a 'de Nyorsoa 'bli yai'-a' 'jeh-: 'dekorn: Nyorsoa-a' 'Yu-: on se-eh yubo:. Nyorsoa :due', or-: yubo-eh. 37:Yee' :ka eh :ne-a 'do :Noa'-a' ti 'i, 'ka :wor eh mu :ne :ke, 'do ti 'yu an 'da-dih-a Nyor-kpalu-a' 'yu-a mu-a 'de :ya 'di. 38:Yeh 'ni 'ye-a' 'yi, 'do 'we :dao' 'di, :yee' :gwlor-nyor⧾-a di deh, an 'na-', an 'ti-dih 'bli, me-: on mane: 'i :chio'lo:, 'de :Noa' pa 'de 'ni ken-meheh 'di. 39:Yeh an no-a deh⧾ :daa, :yee' deh :eh yi-a 'dlu bo :mu 'da, on se-eh yubo: :chio'lo:, 'de jorwor: 'yii'-ni 'yle, eh kpa nyor⧾-a' klehkpeh. 'Ka-: 'o eh mu :ne :ke, :mor 'yu an 'da-dih-a Nyor-kpalu-a' 'yu, or :taa 'de yi. 40:Yee' nyor⧾-kpalu⧾ 'sororn'-a mu 'de 'gle :plan-dih:, 'de :due' 'ye 'o :za-eh:, 'de :due' 'ye 'o :sie:. 41:Yee' 'nynor⧾-kpao'⧾ 'sororn'-a mu 'o :dhobo 'zorn :plan-dih:, 'de :due' 'ye 'o :za-eh:, 'de :due' 'ye 'o :sie:.

42Eh-a' dhih, a 'dhu-eh 'yli-eh bo. Deh no-eh, a se 'we-eh: a-a'a: :Gwlor :baa'-a mu-a 'de :ya yubo:. 43Jorwor: deh a 'ye-a' yubo:, eh-: :dhe dih, :mor 'gbu :korn-nyor yubo-eh :dee', ti 'ylii'-nyor-a mu-a 'de :ya, 'do glu-we-eh 'di, :yee' or mu-or :fuo: :dee', :yee' or :se-' 'worn-: i, 'ylii'-nyor 'ye or-a'a: 'gbu wa. 44'Do eh-a' dha, a :mor :ke, a :korn a 'ye buh⧾ ken :ne, 'do ti-a' klehkpeh bo. Deh no-eh, 'yu an 'da-dih-a Nyor-kpalu-a' 'yu, ti a :se-or' 'sor-dih:, 'do :wor or mu 'de :yi-dih:.

'Bhoi-yu :korn or 'ye or-a'a: nyor :klaba' deh-' 'ye

(Lu 12.41-48)

45:Yee' :Yusu' dhele-uh-: dih, or 'dae:, :Or 'dhu 'bhoi-yu: :or 'dhu-a :dhehehn-nyor-', 'de :or :korn-a :toror' :eh? Or-: 'o, or-a'a: nyor :klaba'-a po 'de 'bhoi-nynuu: :on :ne-a 'de or 'bli 'gbu 'dlu bo, :or 'ye-uh' an-a'a: dii-deh⧾ 'nyi, 'do ti on :korn on 'ye-a' deh :di-dih: bo. 46Eh mu 'yi dih :nmor 'do 'bhoi-yu: :dao' bo, :mor or 'si 'o deh :dao', eh-a' no 'da, 'de or-a'a: nyor :klaba' 'ye-or' ken :yeh-dih:. 47Dhih 'jeh, 'an zela a :gwluhuh', or-a'a: nyor :klaba'-a mu or-a'a: :kororn-deh⧾-a' klehkpeh 'de or 'kwa :po. 48Jorwor: :mor eh 'dhu deh-', 'de 'bhoi-yu: :dao', or-a' :porluh 'ye worn :nyni :dee', or mu :ao' 'da-:, 'do or-a' 'jeh-a' :porluh ken, 'An-a: nyor :klaba' :gwle 'de 'weh. 49:Yee' :mor or no :ao', :yee' or mu 'o or 'be 'bhoi-nynuu: :yuh :dao', an-a' bla 'da 'kpa-:. :Yee' or mu 'de nomor 'na-nyor⧾ 'klu-' 'kpa-:, 'de or 'ye deh :di-eh-: nomor 'na-eh-: ken 'kpa. 50:Yee' eh mu 'we-eh :korn, ti 'bhoi-yu: :dao', or se-a or-a'a: nyor :klaba' 'sor-dih:, 'do :wor or mu 'de :yi-dih:. 51:Yee' or mu-or 'kle 'ye-eh: 'dlu :po, 'de or 'ye-or 'de nyor⧾-a' 'yli 'ye-nyor⧾ 'nyne-' po, 'do :dha 'vin-a'-: 'dekorn: 'nyne 'i :di-dih-eh-: en mu-a :ne.

Zur Zeit ausgewählt:

Matio' 24: TCHKR

Markierung

Kopieren

Vergleichen