Matio' 18
18
:Or 'dhu nyor :klaba' :eh?
(Mk 9.33-37; Lu 9.46-48)
1:Yee' 'do ti :dao' 'di, 'do :wor :Yusu'-a'a: bo :na-nyor⧾ :yi-dih: 'o or bo. 'De on dhele-or dih, on 'dae:, :Or no nyor :klaba' 'do Nyorsoa-a' nyor⧾ wlu 'ken :korn-eh 'zorn :eh?
2'De :Yusu' 'da 'yu-yu-beh :due' 'de or bo. 'De or dhe-or dih 'do an-a' gwea, 3'de or 'dae:, Dhih 'jeh, 'an zela a :gwluhuh', :mor a se-' dih 'bili:, a se 'nynuu: :nyene' gweh, :yee' a 'se 'ba 'de Nyorsoa-a' nyor⧾ wlu 'ken :korn-eh 'zorn pa. 4Nyor :or ya-a or-a' 'jeh ya, :ka 'yu-yu: :daa or :ne-a, or-: 'dhu nyor :klaba'-' 'de nyor⧾ :on :ne-a 'de Nyorsoa-a' nyor⧾ wlu 'ken :korn-eh 'zorn 'klu-'. 5:Yee' nyor :or kpon-a 'yu-yu dih, 'de 'an 'nyne 'di, :ka :yor :daa or :ne-a, :yee' nyor :dao', 'mor-: 'o or kpon dih.
:An-a' :no-eh' 'de nyor-a' :no-' deh-zon
(Mk 9.42-48; Lu 17.1-2)
6Jorwor: nyor-beh-nyor-beh: :or mu-eh :no, 'de 'nynuu: :nyene' :daa :on po-a 'an dhih dhih 'jeh-', on 'ye-a' 'o :gwie: 'jeh 'i 'wluh, 'de on 'ye-a' :gwie-zon kpa, :yee' eh mu 'yi dih :nmor 'do nyor :dao', sobu' :klaba' 'ye 'o or :gwlii' :san-dih-eh:, 'de or 'ye 'o yobo'-a' :wloo' :po-eh:, 'de or 'ye 'meh. 7'Chlo dha yao 'zorn-a' klehkpeh bo, 'do deh⧾ :dhulu' :en no-eh, 'de nyor⧾-a no-a deh⧾-zon⧾. Deh⧾ :daa, en :korn en 'ye 'de yi. Jorwor: 'chlo 'do nyor :dao', en mu-a-' :yi-dih: bo.
8:Yee' :mor eh 'dhu, :an-a' son-: :eh beh :an-a' buh-: no-eh, 'de :on 'ye deh-zon no, :yee' chehn-uh 'o, :on 'ye-uh' 'kwla po. Eh :nmor-: 'yi :on 'ye :nea:, 'de mor :on 'ye :klor, 'de :on 'ye 'de Nyorsoa 'bli yai' mu, :eh :zi 'o 'ble son⧾ 'sororn'-: buh⧾ 'sororn'-: 'de :on 'ye 'de 'kmo :sie: neh-' :po-eh:. 9'De :mor :an-a' 'yli-eh no-eh, 'de :on 'ye deh-zon no, :yee' za-eh 'de, :on 'ye-eh' 'kwla po. Eh :nmor-: 'yi :on 'ye 'yli-eh :due' 'ble, 'de :on 'ye 'de Nyorsoa 'bli yai' mu, :eh :zi 'o :on 'ye 'yli 'sororn' 'ble, 'de :on 'ye 'de 'ku 'bli-neh-' :po-eh:.
'Blae' :eh 'ma-a, eh-a' 'dlan
(Lu 15.3-7)
10A 'dhu a-a' 'jeh :dhororn', a :ne-' 'nynuu: :daa an-a' nyor :due' :vlehn. Deh no-eh, 'an zela a :gwluhuh' :ka 'enjor-nyor:⧾ :on :ne-a 'de Nyorsoa 'bli yai', :on :korn-a 'de on bo, :an 'dhu-uh-a 'yli-eh bo, mo-: :an pobo 'On-ba: :or :ne-a 'de yai' or-a' 'yuba: ya, ti-a' klehkpeh bo. [ 11:Yee' :Yusu' 'dae:, 'Yu an 'da-dih-a Nyor-kpalu-a' 'yu yi-: 'de, or 'ye nyor⧾ :on 'ma-a 'puh-dih:.]
12:Yee' :Yusu'-a kpa or-a' wlu 'dlu bo, or 'dae:, :Kaa a-a' :porluh⧾ no eh-a' 'ye-a' :eh? :Mor eh 'dhu, nyor-kpalu :due' 'ble 'blae'⧾-a' :kehehn' :due', 'de :due' 'ye 'o 'wluh, eh 'ye 'ma. :Mor eh :ne :ao', :yee' or :se 'o 'blae'⧾ :dao' :en :korn-a :kwlaa :meheh' :nyieh 'yor :ne-a :meheh' :nyieh 'do tluh ken :sie: i, 'de or 'ye :yeh :eh 'ma-a 'bhorn 'da mu :e? 13:Yee' :mor or 'ye-eh, dhih 'jeh, 'an zela a :gwluhuh', 'mona-a' :yor or 'kpa-a 'do eh bo, eh :zi 'o :kwlaa :meheh' :nyieh 'yor :meheh' :nyieh :dao' :en se-a 'ma-' 'weh. 14'Ka-: 'o :kpeheh: a :Baa' :or :ne-a 'de yai', or-a' dhih :ne. Or :se-' 'bhorn 'nynuu: :nyene' :daa :sloror', an-a' nyor :due'-beh 'ye 'ma.
'De-di' :or no-a deh⧾-zon⧾ 'do :on bo
15:Yee' :mor eh 'dhu, :an-a' 'de-di' no :on deh-zon 'bhun, :yee' zela-or deh-zon: or no-a, eh-a' dhih or :gwluhuh'. Jorwor: :an-a' :no-dih-eh: 'o nyor⧾ 'nyne-', or-: mor-: a :ne 'sororn' gbai. :Mor or :to :on :dou'⧾ bo, :yee' :on ya-or 'o :dhehehn-gwie 'i 'weh. 16Jorwor: :mor or se :an-a' wlu :dou'⧾ bo :to, :yee' kpa nyor :due', nyor⧾ 'sororn', 'de on 'ye :an-a' dhih-a' klehkpeh bo zela-nyor⧾ no, :ka Nyorsoa-a' 'chlee-deh 'da-a. 17:Yee' :mor eh 'dhu, :mor or se nyor⧾ :dao', an-a' wlu :dou'⧾ bo :to, :yee' zela: dhih :daa 'chore-nyor⧾ :gwluhuh'. :Yee' :mor eh 'dhu, :mor or se 'chore-nyor:⧾ :sloror' :dou'⧾ bo :to, :yee' or :ne 'de a 'nyne-' 'suh, or 'ye :dou' :dhe 'dlu 'bhun-nyor no. :Yee' :ka nyor⧾-a no-a se Nyorsoa yubo-nyor⧾-: 'dekorn: nyor⧾ nyor⧾-a za-dih-a 'taa-deh⧾ bo, an-a' dhih-: :yee' 'ka :wor :on 'ye or-a' dhih no.
Deh a se-a ken dih 'worn-dih:-: 'dekorn: deh a :za-a wlu 'ken-:
18Dhih 'jeh, 'an zela a :gwluhuh', deh-beh: a se-a 'ken dih 'worn-dih: dha yao 'zorn, eh :se-' ken dih 'worn-dih-eh: i 'de Nyorsoa 'bli yai'. 'De deh-beh: a :za-a wlu 'ken dha yao 'zorn, eh mu wlu 'ken :za-eh: :ke 'de Nyorsoa 'bli yai'.
19'De 'an zela a :gwluhuh' :neheh', :mor eh 'dhu a-a' nyor⧾ 'sororn' 'worn-dih: deh-beh-a' dhih ken dih dha yao 'zorn, 'de on 'ye-eh' 'On-ba: :or :ne-a 'de yai' 'yba-dih:, :yee' or mu-eh :no 'do on bo. 20Deh no-eh, :dha-beh: nyor⧾ 'sororn', nyor⧾ taan, on :gweh-dih:-a :dha :due', 'de 'an 'nyne 'di, 'do :wor 'on :ne 'do on 'nyne-'.
'Bhoi-yu: :or se-a :wehlih :korn, or-a' 'dlan
21:Yee' :Piteh' yi 'o :Yusu' bo, 'de or dhele-or dih, or 'dae:, :Gwlor :baa', :mor eh 'dhu 'an 'de-di' :taa 'on deh-zon 'bhun no 'do ti-a' klehkpeh bo, :yee' kpor⧾ dhie 'on 'ye en-' dhih bo 'ma-dih: :eh? Kpor⧾ :meheh' 'sorn :e?
22'De :Yusu' :wlu 'de or bo, or 'dae:, 'An zela: :on :gwluhuh', eh :se kpor⧾ :meheh' 'sorn, jorwor: kpor⧾-a' :kwlaa :meheh' 'sorn-a' 'dlu⧾ kpor⧾ :meheh' 'sorn. 23'Do eh-a' dha, Nyorsoa-a' nyor⧾ wlu 'ken :korn-eh gweh 'keen :due'-a' deh, :or 'bhorn-a :or 'ye-eh' yubo: :ka or-a'a: 'bhoi-nynuu-a no-a 'wlii: or 'nyi-uh'-a, en-' plo-a'. 24:Yee' :yeh or 'dhu-eh glu, :yee' on ya-or 'yu :due' :or 'ble-a or-a' 'sebla-wlii-a' zlo :zloo: pa 'o :pebeh'-', 25jorwor: or se 'wlii 'ble or 'ye or-a' kpa :za. 'Do eh-a' dha, 'keen 'nyi or-a'a: nyor⧾ 'tele' on 'ye-or' plo, or-: or-a'a: 'nynor-: or-a'a: 'nynuu-: 'dekorn: or-a'a: :kororn-deh⧾-a' klehkpeh-: 'de kpa :dao', or-a' dhih 'ye :jla. 26'De 'bhoi-yu: :dao', or 'jli dih 'do 'keen ybei', or bale-or, or 'dae:, :On :korn 'gen. Kpon :an-a' :porluh dih 'do 'on bo. 'An mu :an-a'a: kpa :dao' or-a' klehkpeh :za. 27:Yeh or-a'a: nyor :klaba' 'ye-a deh :dao', :yee' or 'ye :wehlih: 'do or bo, 'de or 'tali: kpa :dao' or-a' dhih dih. 'De or 'tali-or dih, or mu.
28:Yee' :yeh 'bhoi-yu: :dao', or 'si-a 'zorn, 'de or 'ye-a or 'be 'bhoi-yu :due' :or 'ble-a or-a'a: kpa :ke :en no-a 'wlii-kpor-bei, :yee' or kpon-or :bhluun' 'worn dih, or 'dae:, :Za 'an-a: kpa :on 'ble-a. 29'De or 'be :dao', or 'jli dih 'do or ybei', 'de or bale-or, or 'dae:, :On :korn 'gen, kpon :an-a' :porluh dih 'do 'on bo. 'An mu :an-a'a: kpa :dao' :za. 30Jorwor: or :se-' 'worn :gbor :gbor, 'de or po-or :kasue 'di, or 'ye 'de :ne, or 'ye kpa :dao' :za. 31:Yeh or 'bei' 'bhoi-nynuu: :noo' 'ye-a deh :eh :no-eh, :yee' an-a' :porluh⧾ 'kpa-: 'zorn 'gabaa, 'de on mu 'de an-a'a: nyor :klaba' bo, 'de on po-or kuna' 'do deh⧾-a' klehkpeh :en :no-eh bo. 32:Yeh or-a'a: nyor :klaba' 'worn-ih'-a, :yee' or 'da-or', 'de or 'dae:, :Mor 'bhoi-yu: :daa, :or :korn-a :porluh: :nyni-a worn. 'On 'tali: :an-a'a: kpa-a' klehkpeh-: dih, deh no-eh, :on bale: 'on 'weh. 33:On :korn :on 'ye :on 'be-a' :wehlih 'ye, :ka 'on no-a :an-a' :wehlih-a' 'ye-a' :ke. 34:Yee' or-a'a: nyor :klaba' 'kpa-' 'chehn, 'de or 'nyi nyor⧾ 'tele', on 'ye-or' :kasue 'di po, 'de on 'ye-or' 'kle 'ye-dih: :chio'lo:, 'de or 'ye kpa :dao' or-a' klehkpeh :za.
35'De :Yusu' 'dae:, 'Ka-: 'o :ke, 'On-ba: :or :ne-a 'de yai', or mu a-a' klehkpeh-a' dhih :no :ke, :mor eh 'dhu, a se deh⧾-zon:⧾ a-a' 'de-di'-boi' no-a 'do a 'bhun, en-' dhih bo 'ma-dih: 'do a-a' :porluh⧾-a' klehkpeh bo.
Zur Zeit ausgewählt:
Matio' 18: TCHKR
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
The New Testament in Tchien Krahn published as KUO :DELE' © The Bible Society in Liberia, 1995.
