Jonas 2

Nan Lowalon Jonas

2:1-10

1Isnan kawad-an Jonas isnan eges di ikan et ninlowalo isnan apo ay Diosna ay mangwani en,

2“Isnan ligatko et inayagak sik-a apo et nang-idngeka.

Owen, issan matmateyak et nin-adawagak ken sik-a et inidngem sak-en.

3Inpatep-am sak-en isnan baybay ay kad-an di napigsa ay dalloyon

et masapsapowakanak daket maonog isnan kaadaemana.

4Kanak pay no naipakaanak et isnan kad-am

et adiyak et kasin il-ilan nan napateg ay Templom.

5Nalin-ebak isnan danom et map-osanak.

Nalingbanak isnan baybay

dapay kobotan nan logam di baybay nan olok.

6Naipeyak isnan ostoosto ay poon di bilig isnan daem nan batawa ay nan segpana

et naidakig ay adiyet kalokatan ta maid makabala.

Ngem sik-a ay apo ay Diosko et insalakanmo sak-en isnan daemna

isonga daanak ay matmatago.

7Idi naliknak ay matmateyak et daket menlowalo ken sik-a ay apo

et isnan napateg ay Templom, inidngem sak-en.

8Nan mendaydayaw isnan maid silbina ay tinagtago

et dinokoganda nan badangmo ken daida.

9Ngem sak-en et menday-engak ay mangdaydayaw ken sik-a.

Men-idatonak ken sik-a ya ikkak nan inkalik.

Kedkedeng nan apo is makaisalakan.”

10Dat bilinen nan apo nan ikan ta ipabalana si Jonas isnan benget di baybay.

Zur Zeit ausgewählt:

Jonas 2: xnn

Markierung

Kopieren

Vergleichen

Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.

Beliebte Verse in
Jonas 2