Sioné 2
2
Ko e Mali ‘i Kena
1PEA ‘i hono tolu ‘o e ‘aho na‘e fai ha ta‘ane ‘i Kena ‘i Kāleli; pea kuo ‘i ai ‘a e fa‘ē ‘a Sīsū. 2Pea na‘e tala foki ‘a e ta‘ane kia Sīsū, pea ki he‘ene kau ako. 3Pea kuo si‘i ‘a e uaine, pea lea kia Sīsū ‘e he‘ene fa‘ē, ‘o pehē, ‘Oku ‘ikai ha‘anau uaine.
4Pea folofola ‘e Sīsū ki ai, Fefine, ko ho hā au? kuo te‘eki hoko mai hoku taimi.
5Pea lea ‘e he‘ene fa‘ē ki he kau sevāniti, Neongo pē ko e hā ha me‘a te ne tala kiate kimoutolu, mou fai.
6Pea na‘e tu‘u ai ha ‘angavai maka ‘e ono, ‘a ia na‘e tuku ai koe‘uhi ko e fakama‘a faka-Siu, ‘e hao ai takitaha ha pate ‘e ua pē tolu. 7Folofola ‘a Sīsū kiate kinautolu, Mou fakafonu vai ‘a e ngaahi ‘angavai na. Pea nau fakafonu ngutungutu ia. 8Pea ne pehē kiate kinautolu, Fakatau leva, pea ‘ave ki he ‘eiki ‘o e kātoanga. Pea nau ‘ave. 9Pea ‘i he kamata ‘e he ‘eiki ‘o e kātoanga ‘a e vai kuo hoko ‘o uaine; (‘osi na‘e ‘ikai te ne ‘ilo ‘a e potu na‘e ‘omi mei ai, ka na‘e ‘ilo pē ‘e he kau sevāniti, ‘a ia na‘a nau fakatau ‘a e vai) pea ui ange ‘e he ‘eiki ‘o e kātoanga ‘a e ‘eiki ta‘ane, ‘o ne pehē ki ai, 10Ko e anga ‘o e tangata ke tomu‘a fokotu‘u ‘a e uaine lelei; pea ka konā ‘a e kakai, pea toki fokotu‘u ‘a e uaine ‘oku faka‘ange‘ange: ka ko koe kuo ke ta‘ofi ‘a e uaine lelei ki he taimi ni.
11Na‘e fai ‘eni ‘e Sīsū ‘i Kena ‘i Kāleli, ko e ‘uluaki ‘o ‘ene ngaahi mana, pea ne fakae‘a ai hono lāngilangi; pea na‘e tui pīkitai kiate ia ‘ene kau ako.
12Hili ‘eni na‘a ne ‘alu hifo ki Kāpaneume, ‘a ia, mo ‘ene fa‘ē, mo hono ngaahi tokoua, mo ‘ene kau ako: pea nau nofo ai, kae ‘ikai fuoloa.#Māt 4.13
Ko Sīsū ‘i he Temipalé
(Māt 21.12-13; Ma‘ake 11.15-17; Luk 19.45-46)
13Pea na‘e panaki ‘a e Pāsova ‘a ha‘a Siu, pea ‘alu hake ki Selusalema ‘a Sīsū,#‘Eki 12.1-27 14pea ne ‘ilo ‘i he Temipale ‘a e kau faifakatau pulu mo e sipi mo e lupe, mo e kau fetongi pa‘anga ‘oku nau nofo ai: 15pea ne ngaohi ha uipi ‘aki ‘a e ngaahi afo, ‘o ne fakateka kotoa pē mei he Temipale, mo e fanga sipi foki, mo e fanga pulu; ‘o ne hua‘i ‘a e pa‘anga ‘a e kau fetongi pa‘anga, mo ne fulihi ‘enau ngaahi tēpile, 16pea ne folofola kiate kinautolu kuo ‘omi lupe ke fakatau, ‘ave ‘a e ngaahi me‘a na; pea ‘oua ‘e ngaohi ‘a e fale ‘o ‘eku Tamai koe fale fakatau. 17Pea manatu ‘ene kau ako ne tohi ‘o pehē, Ko e mamahi‘i ‘o ho fale te ne kai ‘o ‘osi au.#Saame 69.9
18Pea tali ‘a ha‘a Siu ‘o nau pehē ki ai, Ko e hā ha faka‘ilonga ‘oku ke tuku mai, ho‘o fai ‘a e ngaahi me‘a ni?
19Pea tali ‘e Sīsū ‘o ne folofola kiate kinautolu, Holoki ‘a e fale tapu ni, pea te u toe fokotu‘u ‘i ha ‘aho ‘e tolu.#Māt 26.61; 27.40; Ma‘ake 14.58; 15.29
20Pea lea ai ‘a ha‘a Siu, Kuo ‘osi ‘a e ta‘u ‘e fāngofulu mā ono mo e langa ‘o e Fale Tapu ni, pea te ke fokotu‘u ‘e koe ‘i ha ‘aho ‘e tolu pē.
21Ka ko ‘ene lea na‘e kau ki he fale tapu ko hono sino. 22Ko ia ‘i he hoko hono fokotu‘u mei he pekia, na‘e manatu ‘e he‘ene kau ako kuo ne lea pehē; pea nau tui ki he folofola, pea mo e lea kuo fai ‘e Sīsū.
Ko e Mahino kia Sīsū ‘a e Anga ‘o e Kakaí
23Pea lolotonga ‘ene ‘i Selusalema ‘i he Pāsova, ‘i he fai ‘o e kātoanga, na‘e tui ha tokolahi ki hono huafa he‘enau mamata ki he‘ene ngaahi mana na‘a ne fai. 24Ka ko Sīsū na‘e ‘ikai te ne tui ‘e ia, ‘o tuku ia kiate kinautolu, koe‘uhiā ko ‘ene vavanga‘i ‘a e kakai kotoa pē, 25pea koe‘uhi na‘e ‘ikai te ne ‘oua ke faka‘ilo ‘e ha taha ha me‘a ‘oku kau ki ha tangata; he na‘a ne mea‘i ‘iate ia pē ‘a e me‘a ‘oku ‘i he tangata.
Zur Zeit ausgewählt:
Sioné 2: TMB
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Tongan Moulton Bible © Bible Society of the South Pacific, 2011.