Eksodus 36
36
1Besalel hag Oholiab ha pub krefter konnyk ynno may hworras Duw furneth ha konvedhes dhe wodhvos gul oll ober vyth yn gwrians an sentri a wra oberi herwydh oll re worhemmynnis an Arloedh.
An Bobel a Dhre Lies Offrynn
2Ena Moyses a elwis Besalel hag Oholiab ha pub krefter konnyk ynno may hworras Duw godhvos yn y golonn, peub a vo kolonnek, dhe dhos dhe wul an ober; 3hag i a dhegemmeras dhiworth Moyses oll an offrynnow re dhrosa mebyon Ysrael yn ober servis an sentri. I a besyas dri offrynnow bolonjedhek pub myttin, 4may teuth pub krefter konnyk esa ow kul pub eghenn a oberennow war an sentri, pubonan dhiworth an oberenn esa ow kul, 5ha leverel dhe Moyses, ‘An bobel a dhre moy es lowr dhe wul an ober re worhemmynnis an Arloedh y wul.’ 6Ytho Moyses a ros gorhemmynn, ha'n ger a veu gelwys der an kamp, ‘Na as gour na benyn dhe wul ober moy rag offrynn rag an sentri.’ Yndellma an bobel a veu lettys a dhri moy; 7rag an daffar a's tevo o lowr dhe wul an ober oll ha moy.
Gwrians an Tabernakel
8Pub krefter konnyk yn mysk an weythoryon neb a wre ober an tabernakel a wrug deg kroglenn; gwiys gans sendal plethys ha pann glas ha purpur ha kogh ha cherubim, ober gweythor kweth. 9Hys pub kroglenn o eth kevelin warn ugens; ha les pub kroglenn peswar kevelin; ha pub kroglenn a's tevo an keth musur.
10Ev a goplas pymp kroglenn an eyl dh'y ben, ha'n pymp kroglenn arall ev a goplas an eyl dh'y ben. 11Ev a wrug stagellow a bann glas war amal pella kroglenn an kynsa bagas; keffrys ev a's gwrug war amal pella kroglenn an nessa bagas; 12ev a wrug hanter-kans stagell dhe'n unn groglenn, hag ev a wrug hanter-kans stagell war amal an groglenn bella a'n nessa sett; yth esa an stagellow an eyl a-dal hy ben. 13Hag ev a wrug hanter-kans bagh a owr ha kelmi an kroglennow an eyl dh'y ben gans baghow, may feu an tabernakel unnsys dien.
14Ynwedh ev a wrug kroglennow a vlew gever rag tylda a-ugh an tabernakel; ev a wrug unnek kroglenn. 15Hys pub kroglenn o deg kevelin warn ugens; ha les pub kroglenn peswar kevelin; an unnek kroglenn a's tevo an keth musur. 16Ev a goplas pymp kroglenn a'ga honan, ha hwegh kroglenn a'ga honan. 17Ev a wrug hanter-kans stagell war amal an pella kroglenn a'n unn bagas, ha hanter-kans stagell war amal kroglenn an bagas arall. 18Hag ev a wrug hanter-kans bagh a vrons dhe gopla an tylda war-barth may fe unnsys dien. 19Ev a wrug kudhans dhe'n tylda, a greghyn rudhhes a hordhes, ha kudhans a greghyn a liw hyasinth#36:19 a greghyn a liw hyasinth: war-lergh an Septuagint. Ebrow a greghyn morhoghespo a greghyn broghes a-ughto.
20Ena ev a wrug framyow rag an tabernakel a brenn akasya, a'ga sav. 21Deg kevelin o hys pub fram, ha kevelin ha hanter les pub fram. 22Pub fram a'n jevo dew denon, rag desedha war-barth; ev a wrug hemma rag oll an framyow a'n tabernakel. 23Framyow an tabernakel ev a's gwrug yndellma: ugens fram dhe'n barth dhyghow; 24hag ev a wrug ugens sel a arghans yn-dann an ugens fram, diw sel yn-dann unn fram rag y dhew denon, ha diw sel yn-dann fram arall rag y dhew denon. 25Ha dhe nessa tu an tabernakel, dhe'n barth kledh, ev a wrug ugens fram; 26ha'ga ugens sel a arghans, diw sel yn-dann unn fram ha diw sel yn-dann fram arall. 27Ha dhe'n tu a-dryv an tabernakel dhe'n howlsedhes ev a wrug hwegh fram. 28Ev a wrug dew fram dhe gornellow an tabernakel dhe'n tu a-dryv. 29I o an keth dhe-woeles, ha junys dhe-wartha, dhe'n kynsa lagasenn; ev a wrug dew anedha yndellma, rag an dhiw gornell. 30Ytho yth esa eth fram gans aga krawyow a arghans, hwetek kraw, dew graw yn-dann bub fram.
31Ev a wrug prennyer a brenn akasya, pymp dhe'n framyow dhe unn tu a'n tabernakel, 32ha pymp dhe'n framyow dhe du arall an tabernakel, ha pymp barr dhe framyow an tabernakel dhe'n tu a-dryv, dhe'n howlsedhes. 33Ev a wrug dhe'n barr kres tremena a benn dhe benn yn kres an framyow. 34Hag ev a worlownas an framyow gans owr, ha gul aga lagasennow a owr rag synsi an prennyer, ha gorowra an prennyer gans owr. 35Ev a wrug an vayl a bann glas ha purpur ha kogh ha sendal plethys; i a veu gwrys gans cherubim, ober gweythor kweth. 36Rygdhi ev a wrug peder koloven a akasya, ha'ga gorowra gans owr; aga higennow o a owr, hag ev a deudhis ragdha peder sel a arghans. 37Ynwedh ev a wrug kroglenn rag porth an tylda a bann glas, purpur ha kogh ha sendal plethys, brosys gans brosweyth; 38ha'y fymp koloven gans aga higennow. Ev a worlownas aga fenn-kolovenyow, ha'ga bondow o a owr, mes aga fymp kraw o a vrons.
Zur Zeit ausgewählt:
Eksodus 36: ABK
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© Kesva an Taves Kernewek 2004, 2024
© Cornish Language Board 2004, 2024
