Eksodus 2
2
Dineythyans Moyses
1Lemmyn yth eth gour a'n chi a Levi ha kemmeres myrgh a Levi, 2An venyn a omdhuk ha dineythi mab. Pan welas y vos teg, hi a's kudhas tri mis; 3mes pan na ylli hi y gudha na fella, hi a gemmeras kanstell gwrys a bapyrus, orth hy gorgudha gans bitumen ha pyg, ha'y gorra y'n geunegenn war lann an Nil; 4ha'y hwoer a wortas a neb pellder dhe wodhvos pandr'a hwarvedha dhodho. 5Ha myrgh Faro a dheuth dhe omwolghi y'n Nil. Hy maghtethyon ow kerdhes war lann an Nil, ha hi a welas an ganstell yn mysk an geunegenn ha dannvon hy maghteth, neb a's kemmeras. 6Hi a's igoras ha gweles an flogh, hag otta, maw owth oela! Ha hi a gemmeras truedh anodho ha leverel, ‘Ottomma onan a'n fleghes ebrow.’ 7Ena y hwoer a leveris dhe vyrgh Faro, ‘A wrav vy mos dhe gyrghes mammeth a'n Ebrowyon a wra maga an meppik ragos?’ 8Ha myrgh Faro a leveris dhedhi, ‘Ke.’ Ytho an vowes eth dhe gelwel mamm an maw, 9ha myrgh Faro a leveris dhedhi, ‘Kemmer an maw ha'y vronna ragov, ha my a re dhis dha arveth’, ha'n venyn a gemmeras an maw ha ri bronn dhodho. 10An maw a devis, ha hi a'n dros dhe vyrgh Faro. Ev o avel mab dhedhi ha hi a'n henwis Moyses, ow leverel, ‘Drefenn my dh'y denna mes a'n dowr.’
Moyses a Dhienk dhe Midyan
11Dell hwarva, y'n dydhyow na, pan o Moyses tevys, yth eth dh'y vreder ha mires war aga beghyow, ha gweles gour ejyptek ow kweskel gour ebrow, onan a'y vreder. 12Ev a dreylyas omma hag ena ha gweles nag esa denvyth, ha ladha an Ejyptyan ha'y gudha y'n tewes. 13Yth eth ternos, hag otta, dew Ebrow owth omladh. Hag y leveris dhe'n drogoberer, ‘Prag y hweskydh dha gentrevek?’ 14Hag yn-medh ev, ‘Piw a'th wrug penntern ha breusyas warnan? A wredh ow ladha par dell ledhsys an Ejyptyan?’ Ena own a'n jevo Moyses ow leverel, ‘Yn sur, an dra yw aswonnys.’
15Ha Faro a glewas a'n dra, ha hwilas ladha Moyses. Mes Moyses a fias dhe'n fo a-dhiworth Faro, hag a drigas yn pow Midyan; hag ev a esedhas ryb puth. 16Lemmyn oferyas Midyan a'n jevo seyth myrgh neb a dheuth ha tenna, ha lenwel an newyow, dhe dhowrhe flokk aga thas. 17Mes bugeledh a dheuth ha'ga fesya; ytho Moyses a sevis dh'aga sawya, ha dowrhe aga flokk. 18Hag y teuthons dhe Reuel aga thas, hag yn-medh ev, ‘Prag y fistensowgh dehweles hedhyw?’ 19Yn-medhons, ‘Gour ejyptek re'gan livras a dhorn an vugeledh, hag ynwedh tenna dowr a'n puth ragon ha dowrhe an deves.’ 20Yn-medh ev dh'y vyrghes, ‘Ha ple'ma ev? Prag y hessowgh an gour? Gwrewgh y elwel may teppro bara.’ 21Ha Moyses a assentyas triga gans an gour, neb a ros Sippora y vyrgh dhe Moyses, 22ha hi a dhineythis mab ha gelwel y hanow Gershom, rag y leveris, ‘Alyon re beuv yn bro estren.’
23Dell hwarva y'n termyn hir na, myghtern Ejyp a verwis. Mebyon Ysrael a gynis drefenn an gethneth ha kria, ha'ga kri a yskynnas dhe Dhuw, drefenn aga hethneth. 24Duw a glewas aga hynvann ha Duw a borthas kov a'y gevambos gans Abraham, gans Ysak, ha gans Yakob. 25Ha Duw a welas mebyon Ysrael, ha Duw a's aswonnis.
Zur Zeit ausgewählt:
Eksodus 2: ABK
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© Kesva an Taves Kernewek 2004, 2024
© Cornish Language Board 2004, 2024
