OBADIA 1
1
1Obadia michih. Atungpuh Thrünpuhnü Edom dünkheak ha thachoh:
Isanü Atungpuh kilimnü thiyusheak khülang sodo,
tüsho yunithsürü khülang trükshih bolung thiyido:
“Asürang! Isanü Edom bede keochihpü yüanü!”
Atungpuhnü Edom Thsümüchibah
2Tsükjide inü trükshih bolung nü aninibe kamshihbah;
nü kakde mükhemükimbah.
3Nü mulong kükheangkhinü nü mülapyukdo,
nü lungku ching larü,
shepü lapung achang ching la.
Nünü nü mulong ching tha,
“Shenü I alo kheak bekhipü?”
4Nünü müleang nangde phinkihkih she,
nü sap chining bolung lalashe,
inü nü ju chingnü thokhibah,
Atungpuhnü thachoh.
5Küyimki azhing ching ahührü arübanü,
arünü arü künkhi lang luchoh.
Küyimki mihtsürünü kurungaso rhobanü,
arünü kamruhroro anükhüh aningshihchoh.
Tüshe nü riribonü nü shahde phüta bahdo.
6Esau tsühsoniusobo, nüsa rahpungbo yankhia ludo.
7Nü müshiprü alalanü nü mülapyukdo,
arünü nü aredungyean yana yüshihdo;
nü kheak arihde alarübonü nü azhihde kukdo;
nü yikhap tsührübonü nü thsungkheak azheang zojihlah–
ju shenü she mümükheah.
8 Atungpuhnü thachoh, ju nimung inü Edom ching lümlung larü,
tüsho Esau müzüng chingnü anikhitkhi dükheakshihbah.
9Nü rithsürübo ajanbah, O Teman,
junangde Esau müzüng ching bonungrübo laksahbah.
Edom Thsümüchikhi Amütsanbo
10Nü niurü Jakob laksahkhi tüsho thiyih bukkhi dünkheak achihnü nü zhidobah,
tüsho nü lünnü lipkhia bahbah.
11Nü jukmuwuh-a zhip nimung,
jaksorünü api lakhit hana lukhi nimung,
tüsho khiungkerünü api chipiripitbo ching yüzahchoki,
nü she arü nangde alakheah.
12Tüshe nünü api kuhi mütsükhi nimung nü keoniorü mükhenopü lado;
nünü Juda mihtsürü thsümünim nimung masühachihpü lado;
lümthsünü nimung nünü mükükheangpü lado.
13Nünü arü thsümütsü nimung I mihtsürü chipiripit ching müyüzahpü lado;
nünü arü thsümütsü nimung Juda lümthsünü khenokhi ching mübepü lado;
nünü arü thsümütsü nimung arü kukruk yankhia mulupü lado.
14Nünü atsokhirü tholopü thsüde limdübeak
kheak müzhippü lado;
nünü lümthsünü nimung thiriri kilim arü müjihpü lado.
Trükshih Mahkhapbah
15Tümüde trükshih alala azhihde Atungpuh nimung thüninde lah.
Nünü arhimokhi nangde, nü ki rhimobah;
nü rhimobo nü ku kheak alodarübah.
16Tümüde nünü I yo amüsüh müzüng kheak yungkhi nangde,
nü mühirü trükshih alalanü ayungbah;
arünü ayungbah tüsho ayingyingbah,
tüsho arünü küyimkishe müthsüa kheahkhi ruk labah.
Israel Akuk Ngükhi
17Tüshe Zion Müzüng kheak atsokhitrü labah tüsho ju amüsüh labah;
tüsho Jakob yamkhünnü arü yankhita bahrü yamalo lubah.
18Jakob yamkhün ju mo nangde,
Josep yamkhün ju motru nangde alabah,
tüsho Esau yamkhün a hitsüt nangde alabah;
arünü jurü takbah tüsho aniuabahbah,
tüsho Esau yamkhün chingnü she mülade alabah;
tümüde Atungpuhnü asukdo.
19Negebnü Esau wungbo lubah tüsho Shephelanü Filistiarü lo lubah;
arünü Ephraim tüsho Samaria lo lubah,
tüsho Benjaminnü Gilead lubah.
20Hala ching lakhi Israel ramtsorünü Zarephat khiungde Phoenikia lubah;
tüsho Sepharad ching lakhi Jirusalem ramtsorünü Negeb kiuto lubah.
21Sherü khümkhita lanü Zion Müzüng ching Esau wungbo yakzan shuhpü wutubah;
tüsho kiulongthsü ju Atungpuh yo labah.
Zur Zeit ausgewählt:
OBADIA 1: YIMCBSI
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.