MIKA 5
5
1Jirusalem mihtsürü, nüsa thirithsürübo bemukhungang! Isa yandoa lah! Arünü Israel limberü müchip kheak tsonü rhapchoh.
Yakzanshuhrü Arüpü Alokhikhi
2Tüshe nü, O Bethlehem Ephratha#Juda guk mung ah. shepü Juda gukbo ching aninibe la, nü kheaknü I thsungkheak Israel ching yakzan shuhpü arübah, shepü ying awün chingnü, jipü nimungbo chingnü la.
3Jumonü thsünüde alakhi liberünü müzübeyi kim khiungde apinü arü bahyukbah; jushu aningkhi api keoniorü Israel mihtsürü kilim alode arübah. 4Api azhipbah tüsho A TU N GPU H sühmüh ching, api Thrünpuh Atungpuh wüntre-müretah mung ching api namfimihnubo yimkipbah. Tüsho arü tsokhita labah, tümüde kheakü alomi akheambo khiungde api ato labah; 5tüsho api ju mungtsü khülang labah.
Bekhitkhi tüsho Thsümüchi
Mürangkhüh Asiriarü isa lomi ching azahsho tüsho isa lo kheak jungsho, isanü isa limberü sühmüh larü arü bede keochihshihpü yüshihbah. 6Arünü Asiria lomi nukshangnü, tüsho Nimrod lomi nukshang dukkhitbah yakzan shuhbah; mürangkhüh arünü isa lomi ching yungsho isa aredungyean ching thrümsho arünü Asiriarü kheaknü isa khümkhitbah.
7Judüki mihtsürü ahihdonü zündoa lakhi aningkhi, mihtsürü kheak mangükhi yungsho mihtsürü she maleangkhi Jakob ju Atungpuh kilimnü ayinke nangde, sangrung kheak tsüngbo nangde alabah. 8Tüsho trükshih bolung ching aningkhi Jakob, mihtsürü ahihdonü zündoa lakhi ju, mütüm shiwüh bolung kekhüzü khülang nangde, namfimihnu boto lung hode yüchoki junakkhi, abekhitrü she mülade adütre kamde thonakkhi kekhüzü nunu khülang nangde alabah. 9Nü azhihrü kheak nü khah shuhkihbah, tüsho nü riri alala dükheakshihbah.
10 Atungpuhnü thachoh, ju nimung ching inü nüsa khorabo tüsho khora-lolungbebo nüsa bolungnü akheamshihbah; 11tüsho nüsa lomi kiutobo dükheakshihbah tüsho nüsa chipibo thokheambah; 12tüsho inü nüsa khah chingnü wurük dükheakshihbah tüsho kuhi-kheahrü mülade alabah; 13tüsho inü nüsa bolungnü mejakbo tüsho dungjingbo dükheakshihbah, tüsho kheaküa nüsanü nüsa khah rhimo ki mukhukning; 14tüsho inü Ashera sangthsübo nüsa bolungnü arukkhitbah tüsho nüsa kiutobo thsümünimbah. 15Bukakhiukkhi tüsho mulong zhipzhip ching inü mihyumanikhi trükshihbo kheak royimbah.
Zur Zeit ausgewählt:
MIKA 5: YIMCBSI
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.