MIKA 3
3
Limberübo Thürühkhi
1Tüsho inü tha: Aniang, nüsa Jakob akuthsürübo tüsho Israel yamkhün yakzanshuhrübo! Nüsanü thiyuro mümükheahbea de?– 2nüsa sherünü atsü thraneancho tüsho amütsü muzhocho, sherünü I mihtsürü küp tüsho arü robo kheaknü shihtsü khukkhicho; 3sherünü I mihtsürü shih tsühcho, arü küp khukkhicho, arü robo adütre kamde yihnakcho, tüsho dubo le phühto ching lakhi shih nangde khapthünakcho. 4Judüki arünü Atungpuh ki zhibah, tüshe apinü arü ki malojih; ju kim ching apinü amiro arü kheaknü ajikbah, tümütüsho arünü mihbukmuyukde rhimodo.
5 Atungpuhnü I mihtsürü bephülaprü wukihrübo dünkheak ha thachoh, sherünü tümükhüh atsühpü lachoki “Mungtsü” zhicho, tüshe sherünü arü mün ching tümü muyukjihnü arü azhihde thirithsü thakhitjihchoh. 6Jumonü michih mülade nüsa azhing labah tüsho akhiuka huhkhi mülade nüsa ki mitingbah. Wukihrübo kheak ani yüzahbah tüsho arü kurungkheak nimung amürak labah; 7angürübo mungchihbah, tüsho müchitrü achih ngübah; arü alalanü arü münküp muhiudobah, tümüde Thrünpuh kilimnü alojihkhi müla.
8Tüshe I thsungkheak a, Jakob ki apinü alakmihkhi tüsho Israel ki api neak thapü, I kheak wu, Atungpuh me, thiyuro tüsho sühmühnü mide lah. 9Ha aniang, nüsa Jakob yamkhün limberübo tüsho Israel yamkhün yakzanshuhrübo, sherünü thiyuro thraneancho tüsho alim alala bephülapcho, 10sherünü thiyih bukkhinü Zion thsücho tüsho amülimnü Jirusalem thsücho! 11Yakzanshuhrübonü buknim dün mahkhapchoh, amükeamrübonü adün mo thsangyuchoh, wukihrübonü sho mo müchitchoh; tütüshe arünü Atungpuh kheak angükihchoh tüsho thachoh, “Tsükjide Atungpuh isa lung lah! Isa kheak athsümünim marü.”
12Jumonü nüsa dünkheaknü thulu nangde Zion wochakbah; Jirusalem ju athsümünim mujung kambah, tüsho arüngyam wung ju murung kambah.
Zur Zeit ausgewählt:
MIKA 3: YIMCBSI
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
