JOEL 3
3
Trükshihbo Mahkhap
1Tümüde, ju nimungbo tüsho ju kim ching, küyimki inü Juda tüsho Jirusalem kuhi jihlobanü, 2inü trükshih alala bemukhungbah tüsho arübo Jehoshaphat Jindükhün ching bede akibah, tüsho I mihtsürü Israel tüsho I yamrüplurüp dünkheaknü inü ju ching arü mahkhapbah, tümütüsho arünü arübo trükshih bolung hiumüzütshih. Arünü I lomi chamnakdo, 3tüsho I mihtsürübo thsungkheak azan thsüdo, tüsho athrürübo müzammürampü ching ahori, tüsho anünürübo yukhu mo yin tüsho ju yung.
4O Tair tüsho Sidon, tüsho Filistia kewungbo alala, nüsa ju I ki tümü a? Tümükhüh thsungkheak nüsanü I kilim jihlocho de? Nüsanü I kilim jihlosho, inü nüsa ku kheak nüsa rhimobo nahde tüsho niokheamde ajihlobah. 5Tümüde nüsanü I yo shotoyinchi tüsho suna ludo, tüsho I lakhit rahpungbo nüsa arüngyam ching hanyukdo. 6Nüsanü Juda tüsho Jirusalem mihtsürü arü aredungyean chingnü limshude yankhita Greekrü ki yindo. 7Kheahang, inü arübo nüsanü ayinpung chingnü abekhitbah, tüsho inü nüsa rhimobo nüsa ku kheak jihlobah. 8Inü nüsa tsührübo tüsho tsührübebo Juda mihtsürü ki yinbah, tüsho arünü arübo ju limshude alakhi trükshih khülang, Sabeanrü ki yinbah; tümüde Atungpuhnü asukdo.
9Ha trükshih bolung zhiyukang:
Thirithsüpü thsakhamang,
thirithsürü thurumusuang.
Bonungrü alala phünide bedarang, arü atushang.
10Nüsa wuhbonü nukshangbo kingang,
tüsho nüsa wuhyakbonü thsühbo kingang;
aliuhrünü thashang,
“ I thirithsürü ah.”
11Nahnahde, mühi alala chingnü nüsa trükshihbo alala arang,
nüsabo ju ching mukhungang.
Nü rithsürübo bekhiang, O Atungpuh .
12Trükshihbonü asürüshang,
tüsho Jehoshaphat Jindükhün ching atushang;
tümüde ju ching inü mühirü trükshih alala mahkhapbah.
13Hirhüpbe yukang,
tümüde yimlupü khiunga lah.
Yüzahang, nitang, tümüde yukhu nitpung milah.
Pangjiphühbo zhikhiuklah,
tümüde arü mihbukmuyuk tolah.
14Mahkhappü jindükhün ching mihhihlah, mihhihlah!
Tümüde mahkhappü jindükhün ching Atungpuh nimung thüninde lah.
15Ani tüsho khinu mitinga lah,
tüsho chiningbonü ayin mütah.
Mihtsürübo Müngühjihbah
16 Atungpuhnü Zion chingnü arungchoh,
tüsho Jirusalem chingnü api düsheak thsüchoh,
tüsho thüningbo le alomi niukchoh.
Tüshe Atungpuh ju api mihtsürü tsoyukpung,
Israel mihtsürü thsungkheak amüküp chipi lah.
17Junangde I Atungpuh nüsa Thrünpuh,
I yo müzüng amüsüh,
Zion ching lah de nüsanü mükheahbah.
Tüsho Jirusalem amüsüh labah,
tüsho hanrünü küyimkishe hanü mütsahholo.
18Ju nimung ching müzüngbonü amühdo yukhu atsamkhibah,
awungbo ching niuhke bukbah,
tüsho Juda yungzü alala ching ke bukbah;
kenü khülang Atungpuh yam chingnü abukkhitbah tüsho Akasia Jindükhün dütsütbah.
19Juda mihtsürü ki arü lomi ching arünü amülim-mülarü thiyih bukde amütsü rhimokhi hode
Ijip ju azhikkhi kambah tüsho Edom a abahkhi sunglo kambah.
20Tüshe Juda a lünnü alabah,
tüsho Jirusalem a lün alala ching labah.
21Inü arü thiyih royimbah tüsho mülimkhi mümüsühjih,
tümüde Atungpuh Zion ching lah.
Zur Zeit ausgewählt:
JOEL 3: YIMCBSI
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.