JOEL 1
1
1Pethuel tsührü Joel kilim arükhi Atungpuh yu ha lah.
Mihtsürübonü Tüzhokhi
2Ha aniang, O azothsürübo,
nükhün muphoang, lomi ching larü alala!
Hadürü nüsa nimungbo, yungsho nüsa jipürü nimung ching dünjidü de?
3Nüsa tsührübo ki ha thaang,
tüsho nüsa tsührübonü arü tsührübo ki,
tüsho arü tsührünü lün püpü ki thashang.
4Tümü anguhshakbe tangkhonü aningshih-a la,
tangkho botonü tsühdo.
Tümü tangkho botonü aningshih-a la,
ajukbe tangkhonü tsühdo,
tüsho tümü ajukbe tangkhonü aningshih-a la,
athsümünimbe tangkhonü tsühdo.
5Asürang, nüsa amüshangrübo, tüsho tripang;
tüsho nüsa yukhu yungrü alala amühdo yukhu dünkheak tüzhoang,
tümüde ju nüsa mün kheaknü mülade kamdo.
6Tümüde trükshih khülang I lomi ching azahdo,
sühmüh lakhi tüsho mükhebinkhi;
ahü ju kekhüzü hü ah,
tüsho kekhüzü dreto hülangpü nangde lah.
7Hanü I yo kurungaso thsümünimdo,
tüsho I yo khubasodungbo müjakdo;
akhahbo müyedo mükamyi khiungde aküp khuka bahdo.
8Anünürü khülangnü arhangpü thsüchoki nihbe müyambuh shekhi shungliukhim phuyubah tüzhokhi nangde tüzhoang.
9Hi kingaün tüsho ayungbe kingaün Atungpuh yam chingnü tuklodo.
Atungpuh tankihrü, amükeamrübonü tüzhochoh.
10Thulubo thsümünima lah, alonü tüzhochoh;
tümüde hi thsümünima lah,
yukhu kunga lah, müdangke müla.
11Mulong dükheakang, nüsa thulu thsürübo,
tüzhoang, nüsa kurungasolu thsürübo,
wheat hi tüsho barli hi dünkheak;
tümüde thulu ching hibo thsümünima lah.
12Kurungaso kungabahdo,
khubasodung yiuhabahdo.
Tsarümkiu, ashisang, tüsho mukhiuk–
thulu sangdung alala yiuhabahchoh;
tsükjide, mihtsürü bolung asühpü kungabahchoh.
13Shungliukhim phuyuang tüsho tüzhoang, nüsa amükeamrübo;
tüzhoang, nüsa kingaün sadam kheak tankihrübo.
Arang, shungliukhim chingnü tsüngre hoshang,
nüsa I Thrünpuh tankihrübo!
Hi kingaün tüsho ayungbe kingaün nüsa Thrünpuh yam chingnü tukloa lah.
14Khümkeak khülang lapü zhiyukang,
amüsüh amukhung khülang lapü jiang.
Azothsürübo tüsho lomi mihtsürü alala Atungpuh nüsa Thrünpuh yam ching mukhungang tüsho Atungpuh ki zhiang.
15Nimung thsungkheak aha!
Tümüde Atungpuh nimung thüninde lah,
tüsho athsümünimpü Wuto kilimnü arüchoh.
16Isa mük kinü tsühyungpü, asühachih tüsho asühpü isa Thrünpuh yam chingnü mutuklo de?
17Müjihbo alo akung khüp dütsüpabahchoh,
zowupungbo thsümünima lah;
jakambo lunga lah, tümütüsho hi müla.
18Küdükhüh shiwühbonü khungcho!
Moshi boto rümde tsahchoh
tümütüsho arü thsungkheak rim müla;
namfimihnu boto she küpkhukchoh.
19O Atungpuh , nü ki inü zhichoh:
Tümüde monü sunglo rim muliuabahdo,
tüsho motrunü thulu sangbo alala takabahdo.
20Mütüm shiwühbonü she nü ki khungchoh tümütüsho kenübo ngah-a lah,
tüsho monü sunglo rim muliuabahdo.
Zur Zeit ausgewählt:
JOEL 1: YIMCBSI
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.