HOSEA 5
5
Israel azhihde Mahkhapkhi
1Ha soang, O amükeamrübo! Aniang, O Israel yamkhün! Aniang, O kiulongthsüpuh yamkhün! Tümüde mahkhappü ju nü yo lah; tümüde nü ju Mizpa ching qimürip khülang lakheah, tüsho Tabor kheak jipkihkhi keang khülang lakheah, 2tüsho Shittim ching shingkung kiukhi asük lakheah; tüshe inü arü alala thsümüchibah. 3Inü Ephraim mükheahlah, tüsho Israel I kheaknü jika müla; tümüde kheakü, O Ephraim, nünü yüliyüra ahorido; Israel müneana lah.
4Arü rhimobonü arü Thrünpuh kilim rholode ayüpü mümülü. Tümüde yüliyüra me arü kheak lah, tüsho arünü Atungpuh mümükheah. 5Israel lülüshishikhinü arü azhihkhi huhchoh; api mülimkhi ching Ephraim jing mükhechoh; arü lung Juda she jing mükhechoh. 6Arü mihnu tüsho moshi boto lung arünü arü Thrünpuh yimde ayübah, tüshe arünü api müyimkhit; arü kheaknü api tsoabahdo. 7Arünü akin mülade Atungpuh ki rhimodo; tümüde arünü mihtsüzahkhi tsührübo zübedo. Jumonü kheakü arü le arü lobo nahde thsümünimbah.
8Gibea ching shihjuh mütang, Rama ching hulipungpung mütang. Beth-aven ching arhunganim düsheak thsang; nü dunglim mürüngang, Benjamin! 9Ephraim ju thsümüchi nimung ching azhik khülang labah; Israel trük bolung ching tümü tsükjide lanü inü khipkhitchoh.
10Juda limberübo ju arelung lah-a bahrü nangde kamdo; arü kheak inü ke nangde I bukakhiukkhi dungkihbah. 11Ephraim junoa lah, mahkhapkhi ching zünaka lah, tümütüsho apinü akeangkeang dunglim yüpü lümkih. 12Jumonü I a Ephraim ki musobo nangde, tüsho Juda yamkhün ki ashuhkhi nangde lah.
13Küyimki Ephraimnü anihbuh tukthsükhi, tüsho Judanü anihbuh mü ngükhea, judüki Ephraimnü Asiria kilim yü tüsho ato kiulongthsüpuh kilim yüshih, tüshe apinü nü müthsüngukhuk yungsho nü mü mungushih. 14Tümüde I ju Ephraim ki kekhüzü nangde, tüsho Juda yamkhün ki kekhüzü nunu nangde alabah. Inü achakthünakbah tüsho tsoabahbah; inü arü hande atsobah, tüsho shenü she arü mükhümkhit.
15Arünü arü mülimkhi muhuhyi khiungde, inü I mihtsürü bahyukbah. Tüsho arünü I miro yimbah; arü thsünükhi ching arünü mushude I yimbah.
Zur Zeit ausgewählt:
HOSEA 5: YIMCBSI
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.