HOSEA 2
2
1Nü khiung ki, “ I mihtsürü,” tüsho nü chi ki, “ Inü amuzhokhi,” de jiang.
Müthülünkhi Thrünpuh Mihtsürü
2Nü be ki thürühang, thürühang, tümüde anihbe I niube yung tüsho I aniubuh yung. Anihbenü müzammüramkhi tüsho beyapkhi tukloshang. 3Jude yungsho inü anihbe pang khukjihbah tüsho anihbe zübe nimung nangde bünkeang kamshihbah; tüsho anihbe sunglo tüsho akunglo nangde kamshihbah tüsho kethürinü asheshihbah. 4Anihbe tsührübo kheak she inü amuzho mülade alabah, tümütüsho arübo jilihjikhün tsührübo ah. 5Tümüde arü abenü jilihjikhün ahorido; alibe shepünü arü zübekheanü achihbe rhimodo. Tümüde anihbenü tha, “ Inü I muzhorübo dunglim yübah; arünü I kilim yikhap tüsho ke jihchoh, khimlamlam, khimthünak, müdangke tüsho yukhu jihchoh.”
6Jumonü inü anihbe limro ayangbonü arhamdobah; tüsho anihbe ki rhünü akhiungdobah, junangde anihbe limro müngükhuk. 7Alibenü anihbe muzhorü müshambah; tüshe arü müyanphuh; tüsho alibenü arü yimbah, tüshe arü müyimkhit. Jushu alibenü athabah, “ Inü ayübah tüsho atan I niubuh kilim rholobah, tümüde kheakü kheaknü I atsübe lakheah.”
8Inü anihbe ki hi, yukhu tüsho müdangke tüsho anihbenü Baal kingaünkhi ching ahorikhi suna jihkheah de alibenü mümükheah. 9Jumonü akim ching inü I hi tüsho akheahmünchi ching I yukhu lulobah; tüsho anihbe pang yihdokhi I khimlamlam, khimthünak luabahbah. 10Kheakü inü alibe muzhorübo mük ki anihbe achihbe mülüpdojih, tüsho shenü she I khah chingnü alibe mükhümkhit. 11Inü anihbe asühako, thüniobo, khinu asobo, amunibo tüsho akhukhitkhi thüniobo alala kheamshihbah. 12Inü anihbe kurungasobo tüsho khubasodungbo thsümünimjihbah, küpü dünkheak alibenü tha, “ I kilim jihkhi I mihkhahmo ah.” Inü jurü murung kamshihbah tüsho mütüm shiwühbonü atsühbah. 13Inü Baal thünio nimungbo thsungkheak alibe thsümüchibah, küdüki alibenü arü kheak rhümthüneabe jihkhea tüsho yingkhüm le mürelungnü anihbe züt thsükhea, tüsho anihbe muzhorü dunglim yü, tüsho I mihkhea, Atungpuhnü thachoh.
Thrünpuhnü Amihtsürü Muzhokhi
14Jumonü, kheakü inü alibe münitbah, tüsho anihbe sunglo ching bede yüzahbah, tüsho alibe ki muzhode athabah. 15Ju chingnü inü alibe ki anihbe kurungasolubo jihbah tüsho Akor Jindükhün ju mulonglam ripit khülang kamshihbah. Ju ching alibenü anihbe athunu kim ching nangde, anihbe Ijip lomi chingnü akhiukchoki kim nangde alabah. 16Atungpuhnü thachoh, ju nimung nünü I ki, “ I niubuh,” de ajibah tüsho I ki kheaküa, “ I yo Baal” de müji. 17Tümüde Baal mungbo amün chingnü yihkhita bahjihbah, tüsho arübo mungnü müjilo. 18Ju nimung nü thsungkheaknü inü mütüm shiwühbo, apung wuhnubo, tüsho alo kheak abüde atsahbe kheak tangzüng khülang thsübah; tüsho inü sanglüh, nukshang, tüsho thirithsü lomi chingnü akheamshihbah; tüsho inü nü mungtsü tüsho atsokhitkhi ching lashihbah. 19Tüsho inü nü lünnü I niube thsüpü lubah; inü nü thiyuro-lungki, thiyuro, muzhodakkhi, tüsho mihmüthsüm chingnü I niube thsüpü lubah. 20Inü nü athülünkhi chingnü I niube thsüpü lubah; tüsho nünü Atungpuh mükheahbah.
21Ju nimung inü alobah, Atungpuhnü thachoh,
inü thüningbo ki alobah tüsho arünü alo ki alobah;
22tüsho alonü hi, yukhu, tüsho müdangke ki alobah,
tüsho arünü Jezreel ki alobah;
23tüsho inü anihbe I lo ching yangbah.
Tüsho inü Lo-ruhama kheak amuzho labah tüsho inü Lo-ammi ki thabah,
“ Nü I mihtsürü ah”;
tüsho apinü athabah, “ Nü I Thrünpuh.”
Zur Zeit ausgewählt:
HOSEA 2: YIMCBSI
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.