EZEKIEL 45
45
Lomi Chamnakkhi
1Küyimki nüsanü yamrüplurüp khülang nangde alo chambanü, nüsanü Atungpuh thsungkheaknü amüsüh lomi shihcham ashanglim khahnap 25,000 tüsho atolim khahnap 20,000 chamkhita zoang; ha mükeak alala amüsüh labah. 2Ha chingnü athrip aban khahnap 500 ju arüngakopung thsungkheak labah, ju lung mühide wungdo thsungkheak khahnap 50. 3Lomi chamnak amüsüh ching nüsanü dangkhüh ju ashanglim khahnap 25,000 tüsho atolim 10,000 akeang. Ha ching arüngakopung, khide Amüsüh Dangpung labah. 4Ha arüngakopung ching tankihrü tüsho Atungpuh miki tankihpü thüninde arürü amükeamrübo thsungkheak lomi shihcham amüsüh labah. Ha arü yampungbo tüsho arüngakopung thsungkheak amüsüh dangpung labah. 5Mükeak ashanglim khahnap 25,000 tüsho atolim khahnap 10,000 ju arüngyam ching tankihrü Levirü lapung kiutobo thsübah.
6Amüsüh lomi chamnak shihcham zokhi yean nüsanü kiuto lopung thsüpü atolim khahnap 5000, tüsho ashanglim khahnap 25,000 zoang; ha Israel yamkhün athrünkhi yo thsübah.
7Amüsüh lomi chamnak tüsho kiuto lopungnü thrip aban arekhi lo ju kiulongthsüpuh yo thsübah. Ha aniakhiuklimnü aniyüzahlim khiungde, ayunglim ju aniyüzahlimnü trükbo kilim jihkhi shihcham arihde aniakhiuklim aredung khiungde ajihbah. 8Ha Israel ching api lakhit-kukruk thsübah. Tüsho I yo kiulongthsürübonü küyimkishe I mihtsürü mujuno; tüshe arünü Israel yamkhün kilim arü trük yande alo lushihbah.
9Atungpuh Thrünpuhnü ha thachoh: Suhdo, O Israel kiulongthsürübo! Athsümünim tüsho junokhi bahyukang, tüsho tümü thiyuro tüsho alungkianü rhimoang. Nüsanü I mihtsürü yankhitkhi arün thsang, Atungpuh Thrünpuhnü thachoh.
10Nüsanü adünara tüsho akeara thiyuro labeah. 11Epha tüsho bath ane ju rukhüh labeah, bath ching ju homer 10 ching shihchamkhüh zahlah, tüsho epha ching homer 10 ching shihchamkhüh zahlah; ane chido thsungkheaknü homer ju amünchi akekhi labeah. 12Shekel ju gera 20 labah. Nüsa thsungkheaknü shekel 20, shekel 25, tüsho shekel 15 ju mina khülang labah.
Kingaün Jihkhibo tüsho Amüsüh Nimungbo
13Nüsanü kingaün jihpü ju ha labah: wheat hi homer aban chingnü epha 6 ching shihchamkhüh, tüsho barli hi homer aban chingnü epha 6 ching shihchamkhüh labah, 14tüsho müdangke bathnü adünkhi ju, kor aban chingnü bath 10 chingnü shihchamkhüh labah (kor ju homer nangde, bath 10 zahlah); 15tüsho Israel rimlopung chingnü, namfimihnu 200 aban chingnü namfimihnu 1 labah. Ha kingaünbo ju arü dünthsükhipü hi kingaün, taka kingaün, tüsho mungtsü kingaün labah, Atungpuh Thrünpuhnü thachoh. 16Lomi mihtsürü alalanü ha kingaün Israel ching kiulongthsüpuh jihbah. 17Tüshe taka kingaün, hi kingaün, tüsho ayungbe kingaün, thüniobo, khinu aso, amunibo, Israel yamkhün yo akhukhitkhi thünio alala ching thsungkheaknü kiulongthsüpuh rhimo ha labah: apinü neak kingaün, hi kingaün, taka kingaün tüsho mungtsü kingaünbo Israel dünthsükhipü jihbah.
18Atungpuh Thrünpuhnü ha thachoh: Akhuhbe khinu, atan ni, nüsanü lapha mükihkhi moshipung 1 lubah tüsho arüngakopung müsühkhitbah. 19Amükeambuhnü neak kingaünkhi thiyih khürü lubah tüsho arüngyam ripit dungbo kheak, kingaün sadam düthrün mühit phüyi ching, tüsho alungbe khikzhakpung ripit dungbo kheak yihkihbah. 20Nüsanü ju ruk khinu ching nimung thüne ni müreanglimnü alakmihkhi yungsho makhakhi hode neak yihbeakrü thsungkheak rhimobah; junangde nüsanü arüngyam thsungkheak dünthsükhibah.
21Akhuhbe khinu ching, thürükheak phüyi ni, nüsanü phunghothünio arüngbah, tüsho nimung thüne phaüm muyukkhi yikhap tsühbah. 22Ju nimung kiulongthsüpuhnü anihbuh tüsho lomi mihtsürü alala thsungkheak neak kingaünpü moshipung 1 jihbah. 23Tüsho nimung thüne thünio lachoki apinü Atungpuh kilim taka kingaünpü lapha mükihkhi moshipung 7 tüsho namfimihnupung 7, nimung thüne thüne aban ni jihbah; tüsho nimung aban neak kingaünpü mihnu pung 1. 24Apinü moshipung aban epha 1, namfimihnupung aban epha 1 tüsho epha aban müdangke pungdüchi 3 hi kingaün jihbah. 25Khinu thüne ching nimung thürükheak phüngü ni tüsho nimung thüne thünio thsungkheak apinü neak kingaün, taka kingaün, hi kingaün, tüsho müdangke rukhüh lang ajihbah.
Zur Zeit ausgewählt:
EZEKIEL 45: YIMCBSI
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
