DANIEL 10
10
Tigri Ayung ki Daniel Michih
1Persia kiulongthsüpuh Sairus kam asampü ching Belteshazzar de ajikhi, Daniel ki thiyu akhiuka huh. Tüsho akhiuka huhkhi yu ju thiyuro lakheah, tüsho ju anikhitpü khide chakde#Yungsho thirithsürü ato dünkheak lakheah. alakheah. Thiyusheak anikhitkhi ju michih khülang ching api kilim arü.
2Judüki kim ching, I Daniel amu-khip mahsam tüzhode alakheah. 3Inü tsühyungpü atsü, shih mütsüh yungsho yukhu muyung, tüsho amu-khip mahsam khiungde tümü mümujumüra. 4Akhuhbe khinu mukukheak phüyi nipü, I Tigri ayung ato yean zhipde lachoki, 5inü mürünga kheah, tüsho kheahang, mihtsürü khülang khimthünak phuyubah, achim ju suna atsüdaknü rüma lakheah. 6Api pang ju mürelung nangde, amiro ju chinchobe nangde, amükbo ju tsün thsahkhi nangde, api binbo tüsho jingbo ju müwayinchi phezhingzhingkhi nangde, tüsho api düsheak ju boto alankhi nangde alakheah. 7Tüsho I Daniel langzünü michih ju angükheah, tümüde I lung zhiprü mihtsürübonü michih ju müngü, tüshe ajanpü ato arü kheak yükih, tüsho arübo ajikpü tsoabah. 8Junangde ha michih ato kheahpü I langzü aninga lakheah. I sühmüh mülade kam, tüsho I miro pheakmulukdo kamabah, tüsho I tümü müthsükhukde kam. 9Küyimki inü api düsheak sokhea, keakeashahshahde kambah I miro alo lim kheahbah lunga yap.
10Tüshe khah khülangnü I qiu tüsho I khah le mukhukbo ajande wusushih. 11Apinü I ki tha, “Daniel, tode muzhodakkhi, inü nü ki asukpü lakhi ju aniang. Zhipang, tümüde I nü kilim arüshihkheah.” Jumonü apinü ha yu I ki asukde lachoki inü ajande zhip. 12Apinü I ki tha, “Dütre Daniel, tümüde nünü alü anikhitpü tüsho nü Thrünpuh miki azhihayihpü nü lümkhi jihkhi akhuhbe nimung chingnü, nü yubo sodo, tüsho nü yubo hode I arükheah. 13Tüshe Persia kiulongthsü yakzanshuhrünü I nimung mukukheak khülang azhih. Jumonü Maikel, ato yakzanshuhrü#Ha yunirü ah. bolung khülang I rungpü arü, tümütüsho I Persia ching I langzü lakheah, 14tüsho akheam nimungbo ching nü mihtsürübo kheak tümü dünjibanü nü anikhitshihpü rungpü arükheah. Ha arübe thsungkheak michih khülang lah.”
15Apinü harü yubo I ki asukde lachoki, inü I miro alo lim abinabah tüsho thiyu müthadebah. 16Judüki mihtsürü kiphahkhi khülangnü I münküp kheak qiu, tüsho inü thiyu asukpü I mün khimshuhbah I miki zhipbuh ki tha, “ I tungpuh, michih hode hadürü thsünü I kheak arükhinü I sühmüh mülade lah. 17Küde thsah I tungpuh yamlarünü I tungpuh ki asukkhukpü? Tümüde I ajanchoh, I kheak sühmüh müla, tüsho I kheak sheak müla.”
18Kheaküshe mihtsürü kiphahkhi khülangnü I qiu tüsho I reangzahde kamshih. 19Apinü tha, “Dütre, tode muzhodakbuh, nü mungtsü laang. Reangzahang tüsho mulong toang!” Küyimki apinü I ki asukkhea, I reangzahde kam tüsho tha, “ I tungpuhnü asukang, tümüde nünü I reangzahde kamshihdo.” 20Jushu apinü tha, “Tümü thsüpü I nü ki arükheanü nünü mükheahla shi? Tüshe kheakü I Persia yakzanshuhbuh bede keochihpü alode ayübah, tüsho küyimki I yübanü, Greek yakzanshuhbuh arübah; 21tüshe akhuhde Thiyuro Hüm ching tümü thrüta lanü inü nü ki thabah: Maikel kheak hode I rungrü she müla.
Zur Zeit ausgewählt:
DANIEL 10: YIMCBSI
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.