AMOS 4
4
Israelnü Thrünpuh kilim Murholo
1Ha yu aniang, nüsa Samaria müzüng kheak lakhi Bashan moshi dretobo, sherünü zhochihrü junocho, sherünü müthsümülarü zünakcho, sherünü niubuhrü ki thacho, “Tümükhüh ayungpü lubah arang!” 2Atungpuh Thrünpuhnü api müsühkhinü thiyuchihchimdo: Nüsa mihbüm aban thüngüh wuhbe khoyangnü awuhpü kim tsükjide arüchoh. 3Nüsa mihbüm aban rhü abitkhi chingnü mikhuhlim tsobah; tüsho nüsa Harmon lim yana yüshihbah, Atungpuhnü thachoh.
4Bethel lim yüang tüsho neak yihbeakang; Gilgal lim yüang tüsho neak alü kamshang; yapsu aban nüsanü laksah-a kingaünkhibo lubah arang, nimung asampü aban ching thürü shihcham lubah arang; 5phaüm yukkhi yikhapnü makshe jihkhi kingaün handarang, mulongkhi kingaün zhiyukang, jurü dünkheak kükheangang; tümüde judürü rhimopü nüsanü muzholah, O Israel mihtsürü! Atungpuh Thrünpuhnü thachoh.
6Inü nüsa kiuto alala ching khümzung handarü, tütüshe nüsanü I kilim murholo, Atungpuhnü thachoh. 7Tüsho kheaküshe yimlupü khinu mahsam lachoki inü nüsa kheaknü tsüng tuklo; inü kiuto khülang lungki tsüng arüshih, tüsho püpü kiuto lungki tsüng marüshih; thulu khülang lungki tsüng arüshih, tüsho tsüng marükhi thulu ju mukuhabah; 8jumonü kiuto mahne yungsho mahsamnü ke yungpü kiuto khülang ching yüla arüla thsü, tüsho reangmükeamde lakheah; tütüshe nüsanü I kilim murholo, Atungpuhnü thachoh.
9Inü sangrung-tukthsü tüsho mokrinü nüsa shik; inü nüsa wündo tüsho kurungasolubo thsümünimjih; tangkhonü nüsa khubasodung tüsho oliv sangdungbo tsühabah; tütüshe nüsanü I kilim murholo, Atungpuhnü thachoh.
10Inü Ijip kiphahde nüsa bolung arüm-tukthsü arüshih; inü nüsa athrününgtsüngbo nukshangnü laksah; inü nüsa khorabo hande tso; tüsho inü nüsa binkheampung shuhrhüm nüsa nupung khün ching wutushih; tütüshe nüsanü I kilim murholo, Atungpuhnü thachoh.
11Thrünpuhnü Sodom tüsho Gomorra lahyuka bahchoki nangde inü nüsa khürü lahyuka bah, tüsho nüsa ju mo takkhi chingnü adukkhitkhi mozhuh nangde alakheah; tütüshe nüsanü I kilim murholo, Atungpuhnü thachoh. 12Jumonü inü ha nü ki rhimobah, O Israel; tümütüsho inü nü ki ha rhimobah, nü Thrünpuh shorupü thsakhamang, O Israel!
13Tümütüsho, shepünü müzüngbo thrünchonü,
apung thrünchoh,
api lümkhi mihtsürübo ki huhchoh,
yapsu ju amiting kamshihchoh tüsho alomi achangbo kheak tsahchoh–
Atungpuh , Wuto Thrünpuh ju api mung lah!
Zur Zeit ausgewählt:
AMOS 4: YIMCBSI
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.