1 Tesalonaika 1
1
1 #
Fol 17:1
Emavo, yau Faulo, Sailasa wata Timoti taiadi 'a vekaiwa 'waimie. 'Omi Keliso yana 'Aila'a 'wa miamiani 'atamana Tesalonaika 'waineye, Yaubada Tamada wata 'ada Toveimea Iesu Keliso yadi tomotoga, 'waimie 'a kilukiluma.
'A vevelu'ui faifaimi, nuanuama Yaubada ma yana nuakalikali i na vevesauluva 'atumaina 'waimie wata nuanua bikana i na velevelemi mia 'atumaina taiadi.
Faulo ma enavo i vekaiwa me Tesalonaika yadi sauluva faifaina
2Tutuya fuedi 'a vevekaiwa Yaubada 'waineye matatabumi faifaimi, wata 'a vevelu'ui 'waineye bega i na 'i'ivaisemi. 3Yama vekaiwa Yaubada Tamada 'waineye faifaimi, fai tutuya fuedi 'a nuanuanimi yami vetumagana ma 'ana 'eba 'isa, yami folova toketokena fai ma yami nuakalikali, wata vita 'waidie 'wa totokemaigemi fai yami vetumagana 'wa yato-vagaseni 'ada Toveimea Iesu Keliso 'waineye.
4-5Emavo 'a 'asetai Yaubada i nuakalikaliemi wata i venua'ivinemi, fai tutuyanina Iesu Valana 'Atumaina 'a viweni 'waimie, 'Anu'anunu Magemagetana i 'imoso'ieni bega kebu vona 'aisena 'wainega, wata Yaubada yana toketokena i vemi bega 'wa ve'awamogitana. Yama sauluva 'akonadi 'wa 'asetai tutuyanina taiadi ta miamia, yami 'eba 'isa wata 'ami 'aivaita.
6 #
Fol 17:5-9
Yama sauluvanidi wata 'ada Toveimea Iesu yana sauluva 'wa vetutuyamedi. Avinodi vita fuedi 'wa veluagadi Keliso 'ana tovedumwe'ai'ai 'waidiega, siwe ma yami sosoana 'Anu'anunu Magemagetana 'wainega, taunimi 'wa tauyemi Vala 'Atumaina 'waineye. 7Keliso 'ana tovetumaganavo 'awalawa Masidonia wata Akaia#1:7 'Awalawa bwaikina Kulisi nageneye 'idi 'ailuga, yavalatayega 'awalawa Masidonia wata bolimanayega 'awalawa Akaia. Tesalonaika 'atamana bwaikina Masidonia nageneye. Tutuyanina Faulo i miamia Kolinita lubulubu de'e i kilumi i miamia Kolinita, 'atamananina 'awalawa Akaia nageneye. nagedie yami sosoana wata yami tokemaiga i 'isedi yadi 'eba 'isa, nika i na vetutuyamemi. 8Bega tutuya de'e 'waineye Toveimea Keliso Valana 'ana awavemogitana 'omi 'waimiega 'akonadi i vevebwaika 'awalawa Masidonia wata Akaia nagedie. We'e yami vetumagana valana i vaganago 'aila'a tulina tulina 'waidie bega tutuyanina 'atamananidi 'waidie 'a le'waga, tomotoga fuedi i veveifufu yami vetumagana faifaina. A noganogai, begaidi kebu i da lubwainema 'waidie wata 'a na veveifufu. 9Tomotoganidi i lulu'ivona basenadi ma yami sosoana 'wa lu'uma'umaiema faifaina, wata kumaea 'waidie taunimi 'wa tauyemiga 'akonadi 'wa vedumwe'ai'aiedi. Nika 'wa nuavilami taunimi 'wa tauyemi Yaubada miamia-vagaina 'waineye 'wa vetofolova faifaina. Taunina 'aiseotogina mogitana Yaubada. 10Wata tomotoganidi i lulu'ivona 'omi 'wa lulukamata Yaubada Natuna yana vila-vaitugana abamayega faifaina. Natunanina Iesu, kumanina basenadi i sivetovoia wafayega bega i 'i'ita'ita'ieda Yaubada yana nuasako wata yana vematavuloga 'awaie i na souyedi 'waidiega.
Zur Zeit ausgewählt:
1 Tesalonaika 1: YML
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Copyright © 1984, 1988, 2025 Wycliffe Bible Translators, Inc., and SIL Papua New Guinea; CC-BY-ND-NC