Beliebte Verse in Ruum 8

Teilen

Oilaan tokou do Kinoringan nopo nga popisuput do onuu nopo i aandai ko araat supaya osiliu do aandai si tulun di au kojuu Disido, irino tulun di linoouJo do maja di tomodon Disido laaid.

Do noilaankuno marong do au kojuu i Kinoringan daton mantad di Koristus Yisus i Tuhan tokou, irino do ausono iiso kadapat poporijang daton mantad Disido, adapo om i kapatajan, ko i kovijaan, ko i tongomoloikat, ko i tongorogon, ko i momponguasa di tosundu vokon, ko onuu nopo i korosijan maino, ko i rumikot do insan tadau, ko i silo savat, ko i silo saralom tana, insan iri nopimvovorun vokon nga au kadapat poporijang daton mantad di ginavo do Kinoringan do au kojuu daton.

Om irad nogi dino i Tatod do Kinoringan mongoi monguup daton do oluoi i ginavo. Do au tokou koilo nong potingkuro kasasambayango tokou diri apatut, nga i Tatod do Kinoringan kondiri muup daton mokianu do Kinoringan do itokou pokionuan, om mongodoi Isido gosob do au koobus di pokionuonJo.

Sabap diri, onupo tangaron tokou maino pasal dino? Nong si daton i Kinoringan isaipo bato kalavan daton? Ausoi. Do atatapi i Kinoringan si daton.

Om irad nopo diri do maino, tulun nopo di nokopiiso di Koristus Yisus nga auno oukuman do Kinoringan

Do nong mongondom i tongotulun diri kouvangan do kojuvanjo, koompusan nopo dii nga kapatajan. Nga nong mongondom i tongotulun diri kouvangan di Tatod do Kinoringan, koompusan nopo diri nga kovijaan om kasandadan do ginavo.

Nga insan koinam tokou kasangkat do irad diri, aupo insan do au tokou kamanang, do pamanangon tokovi soumur-umur di Koristus iri au kojuu daton.

Do osoromoku nopo nga au apatut do potuuk iti kasansaraan do maino om iri vinaang do kagajaan di iintalang si daton do insan tadau.

Nong au kojuu i Koristus daton kivaro naku iri kadapat poporijang daton do mantad Disido? Auso. Insan kasansaraan, ko kosusaan, ko pokorualan do tulun, ko mononlikop, ko kosimpitan do pakaian, ko potingkabangpo kapatajan ko matai nga auso.

Om oilaani do Kinoringan onuu si ginavo kasangkat di tongotulun, om oilaan nogi Disido i kouvangan di TatodJo, sabap mokianu i TatodJo si di Kinoringan do tokou i tulun songonuvon di Kinoringan pokionuan kangaam di kouvangan do Kinoringan.

Do kasangkat tulun di piangat-angatan di Tatod do Kinoringan nga irino tangaanak do Kinoringan.

Do tongotulun nopo do maja di kouvangan do kojuvan nga mongondom noopo diri kouvangan do kojuvan. Nga tongotulun nopo do maja di tongokouvangan di Tatod do Kinoringan nga mongondom nopo diri kouvangan di Tatod do Kinoringan.

Do antangaipo nga agaan i ginavo Disido pataak di TanakJo kondiri do sabap ditokou kasangkat. Jadi nong pinataak do Kinoringan i TanakJo sabap ditokou, misti onuan tokou Disido do onuu nopo.

Om i Tatod do Kinoringan nogi nga miiso di tatod tokou do popoilo do itokou diti nga tangaanak marong do Kinoringan. Om nong tangaanak tokouno Disido, obuli tokou nogi sumanganu di barakat i nijanji do Kinoringan si daton, i tangaanakJo. Om poimvaja tokou di Koristus do sumanganu di barakat i nijanji do Kinoringan si Disido. Om nong kavaja tokou di kinasansaraan di Koristus, tantu do kokoruang tokou Disido do poinggojoon.

Om nogi nong okuasa i sinoromo di tongotulun di kouvangan do kojuvan, nga irino kopimusuan do Kinoringan sabap kouvanganjo au uvang minsuribak di undang-undang do Kinoringan, om auno marong kadapat iolo do irad diri.

Do kasangkat diri vinorunno di Kinoringan nga miintong marong do pointalangon tokou Disido i tongotangaanakJo

Do oilaan tokovi do didiino sampai maino do kasaangkat diri nopimvovorunno nga miirad do songodoi-odoi do orualan irad di tongondu do monsusu.