Beliebte Verse in Hebreodyes 11

Teilen

Meꞌ shupquiꞌ mọꞌ anicyedyeꞌ tsun. Anicyejaꞌyaꞌ Jenꞌcheꞌ tsun aty chị́jaꞌ anic raꞌ soꞌmac tsun mọꞌ bisjaꞌsiꞌ tsun, chimeꞌdye anicyedyeꞌ jiꞌchäquiyisinꞌ meꞌ tsanꞌ jam cạvepja Jenꞌsiꞌ jedyeꞌ muꞌ, mọꞌyaꞌ qui namꞌ muꞌ. Chimeꞌdye muꞌin urucyaꞌmuntyiꞌ jiquej in maꞌjotac Jenꞌyaꞌ in anicyedyeꞌyaꞌ muꞌin.

Jam anicyejaꞌ Jenꞌcheꞌ jụijyaꞌ tsun, jam raꞌ junꞌ maꞌjotac Jenꞌyaꞌ tsun. Mạꞌjeꞌ c̣hẹiꞌyaꞌjeja Jenꞌ jụijyaꞌ, jemoñeꞌ tashcheꞌ chum anicjeja junꞌ chuc muꞌ muꞌyaꞌ, junꞌ chuc soꞌmacsi bijodyeꞌ muꞌin fer dyijtutety in.

Anicyedyeꞌyaꞌ tsun chị́jaꞌ junꞌ buty muꞌ Jenꞌ p̂eyacdyeꞌyaꞌ muꞌ jämꞌtyeꞌ ọij jac judyeyaꞌ mạyedyeꞌ jiquej. Räj jämꞌtacdyeꞌ muꞌ cạvejas q̂uinꞌ, jam jorojĉansiꞌ jedyeꞌ jämꞌtacsaque jiquej muꞌ.

Chimeꞌdye muꞌ Abraham anicyedyeꞌyaꞌ muꞌ chiquete Jenꞌ, yoquiꞌdyemꞌ jafaijtiyaꞌ jiquej u, yocsiꞌve qui jac jịjcaij, mọꞌ jasoꞌmitis raꞌ Jenꞌ. Anicjete muꞌ, farajjeyactaqui ĉụiꞌsiꞌ jac muꞌ, sacjeꞌ muꞌ, mijam chịj junꞌve chuc raꞌ jịjcaij muꞌ. Anicyedyeꞌyaꞌ muꞌ, bäꞌyi yoctyisĉan jac in, jam ĉụiꞌsimꞌ, mọꞌ Jenꞌ jasoꞌmitis yódyes jajitidyemꞌ tashcheꞌ jiquej u, yi: "Yụ raꞌ soꞌmeye." Yóĉandyemꞌ bäꞌyi u quịꞌsiꞌ acaꞌ muꞌ, mọꞌ tinates muꞌin, vaj meꞌdye jeñej muꞌ Isaac judyeyaꞌ muꞌ Jacob, muꞌ Jenꞌ soꞌmacsi p̂eyacdyeꞌ muꞌ. Meꞌ tsanꞌ jambiꞌ cạ̈tsiꞌ Jenꞌsiꞌ p̂eyacdyeꞌ, mijambiꞌ soꞌmac jac in, yejĉoij qui namꞌ anicyi in.

Meꞌdye muꞌ Noé chimeꞌ anicyedyeꞌyamꞌ chiquepte Jenꞌsiꞌ p̂eyacdyeꞌ muꞌ, mọꞌ jasoꞌmitis jiquej, yiꞌ junꞌ chuc raꞌ ayij mọꞌ bänedyeꞌ. Meꞌ tsanꞌ jambiꞌ mọꞌ jorojĉan cạveꞌ jiquej, jäꞌmiij muꞌ tashcheꞌ jämꞌte covamba, muꞌcheꞌ c̣hoñi muꞌ räjtumdye chätidyeꞌ muꞌ. Anicyedyeꞌyaꞌ muꞌ Noés, Jenꞌ rụij jayuꞌti judyeyaꞌ chimeꞌ soꞌmacsi vaꞌtacdyeꞌ jacchety muntyiꞌ in, räj p̂uti in ojñiꞌĉan in.

Meꞌdye muꞌ chimeꞌ Enoc anicyedyeꞌyaꞌ muꞌ rụiꞌcuꞌ cạc mạyedyeꞌcheꞌ, jácabun Jenꞌ. Mijam muꞌ säñi mijam tyi dạĉajte úcheꞌ jaccheꞌ in, ĉaĉaij na memꞌ rụiꞌquenꞌ moñi, Jenꞌ jácabun. Yiꞌ sánacdyeꞌ jambiꞌdyemꞌ jácabunyaꞌ muꞌ, tashcheꞌ jamaꞌjotyiti Jenꞌ.

Anicyedyeꞌyaꞌ muꞌ Abelsiꞌ, mọjoꞌchas mus jämꞌsiꞌ tucdyeꞌ muꞌ soꞌmete Jenꞌ, jam jeñej Caínsiꞌ tucdyeꞌ muꞌ, ọyaꞌyaꞌ. Anicyedyeꞌyaꞌ muꞌ Abel, Jenꞌ rụij jayuꞌti judyeyaꞌ jamaꞌjotyibuti tucdyeꞌ muꞌ. Meꞌ tsanꞌ itŝij q̂uinꞌ muꞌ Abel, p̂eyacdyeꞌdyety mọꞌyamꞌ, mọꞌ tucdyeꞌ muꞌ mọꞌ jorojĉanjisinꞌ anicjete Jenꞌ muꞌ.

Abraham chimeꞌ, meꞌ tsanꞌ säräꞌ buꞌyis p̂en muꞌ Sara, meꞌ tsanꞌ muꞌ ishoꞌ, anicyedyeꞌyaꞌ qui namꞌ muꞌ soꞌmac aꞌsiꞌ ferdyeꞌ muꞌ paj qui ạvaꞌyi, ĉaĉaij na muꞌ chị́yete Jenꞌ anic jịꞌcätseꞌ p̂eyacdyeꞌ jasoꞌmitis jiquej.

Meꞌ tsanꞌ muꞌĉan bäꞌyi in, muꞌ qui namꞌ Abraham dyijtuiꞌ biseꞌ mọꞌ anicsis bäꞌyedyeꞌ, mọꞌ dyijtuiꞌsiꞌ Jenꞌ judyeyaꞌ jämꞌtyes chimeꞌ, mọꞌ jam p̂ucushyiꞌsiꞌ mijam raꞌ mọtsis chimeꞌ.

Aty rijtiyaꞌ muꞌ Moisés, tupuj tsanꞌ ayoꞌtyiꞌ vịyaꞌ muꞌ yụꞌtac, tupuj tsanꞌ ayoꞌbuꞌyi muꞌ. Anicyedyeꞌyaꞌ qui na muꞌ jam jụjyi. Dadamꞌ dyijtuiꞌ muꞌ paj qui muꞌmun jịꞌñibeꞌcac chimeꞌ Jenꞌtyiꞌtum muntyiꞌ muꞌ. Mijam mọꞌ dyijtuiꞌ maꞌjotyeꞌ juchaj ĉaĉaij na chịj muꞌ, mọꞌsiꞌ maꞌjodyeꞌ mijam raꞌ yejĉoiꞌ mọꞌ, cavin raꞌ jiyimꞌ. Muꞌ jụjyi paj qui Jenꞌdyes bäꞌyi, meꞌ raꞌ tsanꞌ Cristodyes ñiñete in, ọyaꞌyaꞌ dyijtuiꞌ jacches jedyeꞌ Egiptoĉansiꞌ, yaꞌiꞌsiꞌ, mọꞌ mọmoꞌ dyijtuiꞌ bijodyeꞌ jasoꞌmitis raꞌ Jenꞌ. Moisés anicyedyeꞌyaꞌ muꞌ yacchuiꞌ jiquej Egipto, meꞌ tsanꞌ ayoꞌ jafaquiti, muꞌ qui namꞌ jam quijñete. Moisés dyichyedyeꞌtum dyich buꞌyi, jeñej buꞌyi cạvete Jenꞌ, muꞌ jam jorojĉantyiꞌ.

Abraham anicyedyeꞌyaꞌ muꞌ ĉụiꞌtyiꞌ ạvaꞌ muꞌ Isaac soꞌmete Jenꞌ, jajiꞌĉujtiyaꞌ muꞌ Jenꞌ jiquej. Tashcheꞌ jiquej jasoꞌmiti p̂eyacdyeꞌ Abraham junꞌ chuc raꞌ dayi vóshiꞌ muꞌ. Muꞌ yi: "Isaacyaꞌ raꞌ cạ̈tsiꞌ mọꞌ p̂eyacdyeꞌ yụꞌtyes yụ jiquej, muꞌtyiꞌĉan raꞌ vóshiꞌ muꞌ, yụ raꞌ jịꞌcätseꞌ mọꞌ p̂eyacdyeꞌ soꞌmeyes yụ", yi. Meꞌ tsanꞌ meꞌ, Abraham qui namꞌ jam quijatutyete ạvaꞌ muꞌ Isaac, ĉaĉaij na muꞌ

Mọꞌ Rahab, meꞌtaquis p̂en, anicyedyeꞌyaꞌ mọꞌ c̣hoñiꞌ. Jam mọꞌmun säñiꞌ jam jeñej muꞌĉantyiꞌ in, muꞌin jam chiquetety Jenꞌ in, ĉaĉaij na mọꞌ tiĉunacsiꞌ cạvequety jac jiquej in.

Anicyedyeꞌyaꞌ muꞌin sapaꞌjeꞌ in mọꞌ Mar Jäijnäs, chañejcheꞌ tyeij miꞌi in. Jäquiꞌve muꞌin Egiptoĉantyiꞌ in cäc̣henꞌ tsanꞌ muꞌĉan tyeij in, tas qui namꞌ p̂uti muꞌin in, judyeꞌdye chaꞌshacsi in.

Anicyedyeꞌyaꞌ muꞌin Israeltyiꞌ vóshiꞌ in, muꞌ Jenꞌ jivaꞌchabiꞌ räj Jericós naꞌrumꞌ, aty yävätidyeꞌ mạyedyeꞌ cọijtiyaꞌ in mọꞌ bäꞌyedyeꞌ jiquej.

Chimeꞌdye anicyedyeꞌyaꞌ muꞌ Moisés räj chiquepte Jenꞌsiꞌ p̂eyacdyeꞌ muꞌ cäc̣häꞌchuiꞌ mọꞌ Jiꞌc̣honacdyedyes feshta, judyeyaꞌ jutacsi paj qui räj taiꞌtyeꞌ chäsh chụiꞌdyeꞌyaꞌ muꞌin, paj qui muꞌ ijacsity anjer jam qui junꞌtacsebi tashchety ạvaꞌ muꞌin.

Aty säñiyaꞌ raꞌ muꞌ José jiquej, anicyedyeꞌyaꞌ muꞌ yi p̂eyaqui jéyaqui chätidyeꞌ muꞌ junꞌ chuc raꞌ jábiyaꞌ in muꞌin Israeltyiꞌ vóshiꞌ in yacchuiꞌ raꞌ in Egipto. Jäꞌmiij muꞌ jéyacsetaqui meꞌ ca raꞌ tsanꞌ jindyety muꞌ, cạc ca raꞌ mọmomꞌ.

Aty säñiyaꞌ raꞌ muꞌ Jacob jiquej, anicyedyeꞌyaꞌ muꞌ cọdyete Jenꞌ muꞌindyes in Josétyidyes ạvaꞌ muꞌ, pärenꞌdyes cọdaqui muꞌ paj qui muꞌ ñịbeꞌjitidyesyaꞌ nọ́tacsi muꞌ Jenꞌ. Mutyudyeꞌdyety jañutyiti, uts na timaꞌquete Jenꞌ.

Isaac jiquej jäꞌmiij p̂eyeꞌ junꞌ chuc raꞌ muꞌ Jenꞌ soꞌmacsi ñịbeꞌjitidyes muꞌin Jacob judyeyaꞌ muꞌ Esaú, ĉaĉaij na muꞌ anicjete Jenꞌ junꞌ chuc raꞌ muꞌ.