Beliebte Verse in ฮิบ​ลู 11

Teilen

เสียน ฟิม เซ เสียน ตี่ง บัว ม่าย ลั่ม ฮนั้ม อ๋อย ตุ๊ เญย หฒะเก้ง อ๋อย ตุ๊, หย่า เสียน ตี่ง บัว หมั่ง ไม้ ปวัด เญย หฒะเก้ง ม่าย. โล์-ฮนอย เมี่ยน เหว่ย ม่าย เสียน ฟิม ตุ๊ ทิน-ฮู่ง อะเฮน้ย นิ่น บัว.

สี ก๊อง เมี่ยน ไม้ ม่าย เสียน ฟิม, ไม้ ไฮ่ โหฒว ปุน ทิน-ฮู่ง อะเฮน้ย. เหว่ย หฒุ หาย เต้า ต้าย ล์อ ทิน-ฮู่ง อ๋อย หฒุ เสียน หฒะเก้ง ม่าย ทิน-ฮู่ง เญย, หย่า เสียน ทิน-ฮู่ง เหธย ฒี่ง เหญ่ย ปุน หล่ง เฮญี้ยว ล์อ นิ่น วั้ว เต๋ย เมี่ยน.

เหว่ย บัว ม่าย เสียน ฟิม บัว หธีง ต้าย เม่ง แปะ ทิน-ฮู่ง ขูง ก๊อง ธ้วด หว่า ฮนั้ง ฯฒฯ เหฒย ธ้วด หม่าน หมวด ต้าย. ฮนั้ง หน่าย, หมั่ง ตุ๊ ปวัด เญย เซ เยียม หมั่ง ไม้ ปวัด เญย เหฒย ธ้วด ต้าย.

เหว่ย อับ​ลา​ฮัม ม่าย เสียน ฟิม, ทิน-ฮู่ง เห่ว นิ่น ธ้วด มี่ง เถา แล์ง เหธย ปุน นิ่น หฑิบ เญย เต่ย-ปูง, นิ่น หมวัง ทิน-ฮู่ง เญย หว่า. นิ่น ธ้วด มี่ง, ฒู้ง ไม้ ฮิ้ว ตุ๊ นิ่น มี่ง หาย. เหว่ย อับ​ลา​ฮัม ม่าย เสียน ฟิม, นิ่น ฯฒฯ เยียม ทิน-ฮู่ง แล์ง ปุน วั้ว นอม เต่ย-ปูง ฮนั้ง โหฒว แคะ เมี่ยน เยียม กั้น ฝีง เมี่ยน เญย เต่ย-ปูง นอ. นิ่น เยียม ด๊บ-ลิ่ว ฮนั้ง อี​สัก เหธา ยา​โค้บ, ต้ง เหธา นิ่น เสี่ยว ทิน-ฮู่ง แล์ง เญย หว่า วั้ว เต๋ย.

เหว่ย โน​ยา ม่าย เสียน ฟิม, ทิน-ฮู่ง หธีง บั๋ว นิ่น บู้ง ฆะฮ้า ฮี้ง ไม้ แก้ง ปวัด เญย สี่. โน​ยา ท่าย ทิน-ฮู่ง ฯฒฯ เอย เจี๊ยน ทิน-ฮู่ง บั๋ว เญย หว่า โหฒว. นิ่น กั๊บ โผว ฑั้ง ต้าย เหว่ย เหฌียว นิ่น เญย ฮมวั้ง ต่อย. ฮนั้ง หน่าย, เหว่ย โน​ยา ม่าย เสียน ฟิม, นิ่น ตี่ง ป้าม เกน เญย ฒุ์ย, หย่า ตุ๊ เสี่ยว เหธา ทิน-ฮู่ง หอบ เฮญี้ยว เญย เมี่ยน ตุ๊ เญย ป่วน.

เหว่ย เอ​โน้ก ม่าย เสียน ฟิม, ทิน-ฮู่ง ฒิบ นิ่น ฝาว หมี่ อ๊ะ, นิ่น ไม้ หฒุ ไต่. ไม้ ม่าย หาย เต้า ไฮ่ ล์อ ตุ๊ ปวัด นิ่น, เหว่ย หฒุ ทิน-ฮู่ง ฒิบ นิ่น ฝาว หมี่ อ๊ะ. กีง-โซว ก๊อง, ทิน-ฮู่ง ไม้ แก้ง ฒิบ เอ​โน้ก ฝาว วั้ว หฒั่น, เอ​โน้ก โหฒว ตุ๊ หอบ ทิน-ฮู่ง เญย เฮญี้ยว.

เหว่ย อา​แบน ม่าย เสียน ฟิม, นิ่น หล่ง เหฒี่ย ปุน ทิน-ฮู่ง เญย กะน้าย เก้า หลง คา​อิน เญย. ทิน-ฮู่ง หย่า ฒิบ อา​แบน เหฒี่ย เญย กะน้าย ฯฒฯ ปุน ธีง อา​แบน โหฒว ตุ๊ หอบ ทิน-ฮู่ง เญย เฮญี้ยว. เหว่ย นิ่น ม่าย เสียน ฟิม, ไม้ กุ๊น นิ่น ไต่ หมี่ อ๊ะ, เซ ฮนั้ง นิ่น หธ่อ ก๊อง เจี๊ยน หว่า นอ.

เหว่ย ม่าย เสียน ฟิม, ไม้ กุ๊น อับ​ลา​ฮัม โก๋ ไห่, ซา​ลา หย่า ไม้ ไฮ่ ม่าย แซง-ยู์ง, อับ​ลา​ฮัม ตุ๊ โหฒว เตีย, เหว่ย หฒุ นิ่น เสียน ทิน-ฮู่ง อ๋อย เหฒียบ ฒัวะ เญย เอย นิ่น แล์ง เญย หว่า โหฒว.

อับ​ลา​ฮัม ฒั้ว เจี๊ยน ม่าย กอน-โด๊ะ วั้ว นอม ฒี่ง, ต้ง ทิน-ฮู่ง กั้น ต๊า หฒะเอ๋ย เหธย หย่า โหฒว หฒั่ง เมี่ยน เหธย เจี์ย เญย ฒี่ง.

เหว่ย โม​เซ ม่าย เสียน ฟิม, นิ่น โฮล ต้าย วั้ว หฒั่น นิ่น ไม้ อ๋อย ดาม เม่ง โหฒว ฟา​โล ฮู่ง เญย เซียะ เญย ตอน. นิ่น หญุ่น เหธา ทิน-ฮู่ง เญย แปะ ฝีง หฒุ เสี่ยว โค้ว หย่า ฝุน เซ เก้า หลง ตุ๊ หธาม ป๊า ฒุ์ย เญย เฌียน-โย่ว. นิ่น ฝุน เหว่ย กี​ตู่ เตี๊ย ไญ้ เก้า หฒี่ อี​ยิบ เต่ย-ปูง จ๋าย เจี๋ย เญย ฒิ่น ฒ่อย, เหว่ย หฒุ นิ่น ฮนั้ม เถา ฆะฮ้า ฮี้ง อ๋อย ตุ๊ เญย ฒี่ง เหญ่ย. เหว่ย โม​เซ ม่าย เสียน ฟิม, นิ่น เปย๋า ธ้วด อี​ยิบ หย่า ไม้ กั้ม เหฑีย ฮู่ง เตี๋ย โน์ว. นิ่น หย่า ไม้ ต๋าว ฆาง เหว่ย หฒุ นิ่น ฮนั้ง หมั่ง ตุ๊ ปวัด ต้ง เมี่ยน เญย มฒีง หมั่ง ไม้ ปวัด เญย ทิน-ฮู่ง.

เหว่ย อับ​ลา​ฮัม ม่าย เสียน ฟิม, ทิน-ฮู่ง เสย นิ่น วั้ว หฒั่น, อับ​ลา​ฮัม เฒาะ นิ่น เญย ตอน, อี​สัก, อ๋อย เหฒี่ย ปุน ทิน-ฮู่ง. อับ​ลา​ฮัม ฒิบ ทิน-ฮู่ง แล์ง เญย หว่า มป่า หธ่อ หญุ่น เฒาะ นิ่น เญย โดะ ตอน อ๋อย เหฒี่ย ปุน ทิน-ฮู่ง

เหว่ย หม่าย ป๊วน-ซิน วั้ว เต้า มเซียะ ตอน, ลา​หับ, ม่าย เสียน ฟิม, นิ่น อะเฮน้ย ฒิบ ธ้าย จั๊วะ วั้ว เต๋ย อิ​สะ​ลา​เอน เมี่ยน ฯฒฯ ไม้ เหธา ไม้ หมวัง ทิน-ฮู่ง เญย หว่า วั้ว เต๋ย เมี่ยน หฒุ ไต๋.

เหว่ย อิ​สะ​ลา​เอน เมี่ยน ม่าย เสียน ฟิม, นิ่น บัว เจี๋ย ค้อย-ซิ ฮนั้ง ยั่ง เจ๊า-ฆาย นอ. มป่า อี​ยิบ เมี่ยน เสย เจี๋ย ก๋า, ฯฒฯ หฒุ ววม เหยียม ไต่ เหฑ่ง หมี่ อ๊ะ.

เหว่ย อิ​สะ​ลา​เอน เมี่ยน ม่าย เสียน ฟิม, นิ่น บัว ฮวีง เย​ลี​โค ฒี่ง เสี่ย ฮนอย, ฒี่ง หลาด ฯฒฯ บาง หมี่ อ๊ะ.

เหว่ย โม​เซ ม่าย เสียน ฟิม, นิ่น ฯฒฯ เหลียบ เจี์ย เสีย แหม่ง ฒิบ หย่า หัด เมี่ยน หล่ง ฑย้าม ฟุ วั้ว แก้ง ด่าง, เหว่ย ไม้ ปุน ไต๋ เมี่ยน วั้ว เต้า ฟิน-เมี่ยน ไต๋ อิ​สะ​ลา​เอน เมี่ยน เญย โม์ว เต้า ตอน-หละเก๊า.

เหว่ย โย​เซ้บ ม่าย เสียน ฟิม, นิ่น อ๊า ลั่ม เกวย เสย เญย เฒี่ยง โห่ นิ่น จา-ด่าง ก๊อง เหฒียง อิ​สะ​ลา​เอน เมี่ยน อ๋อย ธ้วด อี​ยิบ เต่ย-ปูง เญย เจ๊า-โหล่ว, หย่า พ้าย เหฒียง หว่า, ธ้วด วั้ว หฒั่น อ๋อย หฒุ ต้อ เจี๊ยน นิ่น เญย บู๊ง มี่ง.

เหว่ย ยา​โค้บ ม่าย เสียน ฟิม, นิ่น อ๊า ลั่ม เกวย เสย เญย เฒี่ยง โห่ นิ่น ปวัง หว่า ปุน โย​เซ้บ เญย อี เต้า ตอน, หย่า หล่ง นิ่น เญย ปย๊า-บย่า แหธง เจี๊ยน ซิน ป๋าย ทิน-ฮู่ง.

เหว่ย อี​สัก ม่าย เสียน ฟิม, นิ่น หธีง ต้าย ปวัง หว่า ปุน ยา​โค้บ เหธา เอ​ซาว ฆะฮ้า ฮี้ง ตุ๊ ทิน-ฮู่ง เญย ฟุ.