Beliebte Verse in ꞌEvereo 12

Teilen

ꞌI te ꞌite o tātou e ai rō ꞌā meꞌe rahi nō atu nuꞌu ꞌi raꞌe ki a tātou ⌊haka moe i te manaꞌu⌋ ꞌi ruŋa i te ꞌAtua ꞌātā ki te hopeꞌa, ꞌe a rāua pa he nuꞌu haka haŋu mai, e toꞌo mai ruŋa i a tātou te meꞌe paŋahaꞌa taꞌatoꞌa haka tu-tuki mai, ꞌe i te hara haka hihi-hihi mai mo tuꞌu o tātou ki te hopeꞌa o te ꞌāꞌati haka rē mai e te ꞌAtua, te auraꞌa, mo tuꞌu o tātou ki te roa haŋa e ia mo tātou. Te tātou mata a ruŋa i a Ietū ana uꞌi ꞌo te ai mai i a ia te haka moe iŋa nei o tātou i te manaꞌu ꞌi ruŋa i te ꞌAtua ꞌe ꞌāꞌana te haka tī-tika. A ia, paꞌi, i haꞌaoromaꞌi rō i tōꞌona mate ꞌi ruŋa i te tātaurō, ꞌe ꞌina kai tapa atu i te haꞌamā o te mate iŋa tuꞌu pē ira ꞌo te ꞌite ki oti te ꞌati he koa a ia. ꞌE hora nei, ko noho ꞌā ꞌi te pāꞌiŋa mataꞌu o te ꞌAtua.

ꞌIna e tahi ūtuꞌa au ꞌi te hora o te haka ūtuꞌa; te meꞌe mo ŋaroꞌa e koe he mamae. Ka ai atu pē ira, mo ravaꞌa ōꞌou mo haka tī-tika i tuꞌu haka tere iŋa hai rā ūtuꞌa, he ravaꞌa ia e koe te noho iŋa tano ꞌi roto i te haumārū.

E uꞌi kōrua i te rāveꞌa mo noho hai haumārū ananake ko te taŋata taꞌatoꞌa ꞌe mo tano te kōrua noho iŋa ki te mata o te ꞌAtua. ꞌIna, paꞌi, e tahi kope taꞌe tano ki tōꞌona mata mo takeꞌa i a ia.

E haka topa te tātou manaꞌu pē hē a Ietū i haꞌaoromaꞌi ai i te meꞌe taꞌatoꞌa taꞌe tano aŋa e te nuꞌu hara ki a ia; ꞌo ira ꞌina kōrua ko rohi-rohi ꞌe ꞌina ko hōriŋa

ꞌO ira, ki māuru-uru tātou ki te ꞌAtua ꞌo te ai o tātou ꞌi roto i te nūnaꞌa taŋata haka tere e ia, he meꞌe e ko ŋaro ki te hora hopeꞌa, ꞌe ki haꞌamuri tātou ki a ia hai māhatu ꞌe hai moꞌa, pa he meꞌe haŋa e ia.

E haꞌaoromaꞌi te ꞌati e ꞌamo mai ena e kōrua, he meꞌe mo haka tī-tika atu i a kōrua. Te ꞌAtua, paꞌi, e hāpaꞌo ena i a kōrua pa he ŋā poki ꞌāꞌana. ¿E ai mau rō ꞌana hō te matuꞌa taꞌe ture taꞌe haka tī-tika i tāꞌana ŋā poki?

ꞌIna ko rehu i a kōrua: te tātou ꞌAtua pa he ahi haka kore tahi i te meꞌe taꞌe tano.

Te matuꞌa o tātou o te ao nei, matahiti taꞌe rahi nō i ture i haka tī-tika mai ai i a tātou ki te rāua manaꞌu. ꞌE te ꞌAtua e ture e haka tī-tika mai ena mo te tātou riva-riva, mo riro o tātou pē ia ꞌā ꞌina e tahi hara.

ꞌi te hora tōtōā atu e te nuꞌu hara. A kōrua, paꞌi, kai mate pē Ietū ꞌi te aŋa iŋa mo rē ki te hara.