Beliebte Verse in Kōrosa 3

Teilen

ꞌIna kōrua ko hōrou ko riri mo te rua; e haka rehu te meꞌe taꞌe tano aŋa atu. Pa he haka rehu iŋa e te ꞌAtua i te kōrua hape, pē ira ana haka rehu takoꞌa i te hape o te rua.

Te kī: e haŋa mo riro o te kōrua noho iŋa, noho iŋa tano o te taŋata ka noho ena ꞌi te raŋi, taꞌe ꞌō pa he noho iŋa o te nuꞌu o te ao nei taꞌe haŋa ki te ꞌAtua.

Taꞌatoꞌa meꞌe o kōrua mo aŋa, e aŋa hai māhatu pa he meꞌe: e aŋa ꞌā kōrua ki a Ietū ꞌe taꞌe ki te taŋata.

Te ꞌAtua e haŋa rō ꞌana ki a kōrua ꞌe ko haꞌataꞌa ꞌana i a kōrua māꞌana. ꞌO ira, e riro kōrua nuꞌu māhatu ꞌaroha, nuꞌu riva, nuꞌu taꞌe manaꞌu i hau rō atu ki te rua, nuꞌu haumārū, ꞌe nuꞌu ꞌite i te haꞌaoromaꞌi.

E te taina, e maꞌu te roŋo ꞌa Ietū Kiritō ꞌi roto i te kōrua māhatu, ki haka tika ai nei roŋo i te kōrua manaꞌu ꞌe i te kōrua meꞌe aŋa. E hāpī ꞌe e hatu ki te rua, hai mārama-rama, mo haꞌatura o rāua ki te ꞌAtua. E hīmene kōrua i te vānaŋa o te ꞌAtua aŋa mo hīmene, i te tētahi hīmene haꞌahana-hana mo te ꞌAtua, ꞌe i te meꞌe haka hīmene e te ⌊Vārua Maitai⌋ koia ko māuru-uru ki te ꞌAtua hai māhatu. Te meꞌe taꞌatoꞌa kī ꞌe aŋa e kōrua, e tano o te nuꞌu ꞌa Ietū Kiritō. ꞌE e māuru-uru e oho ki te ꞌAtua Matuꞌa mo te meꞌe taꞌatoꞌa aŋa e Ietū mo kōrua.

ꞌE ki te ŋā meꞌe taꞌatoꞌa nei e ꞌāmui te haŋa mo te rua. Hai haŋa, paꞌi, e ai ena te taina e tahi mau nō manaꞌu.

E te taina, ꞌi te meꞌe era ko haka ora ꞌana e te ꞌAtua i a kōrua ꞌi muri i a Ietū, te auraꞌa, ko vaꞌai atu ꞌana i te noho iŋa ꞌāpī, e haŋa kōrua ki te meꞌe o te raŋi, he kona ꞌi ira a Ietū e noho ena ꞌi te pāꞌiŋa mataꞌu o te ꞌAtua.

ꞌE mo te haumārū vaꞌai e Ietū Kiritō e hāꞌūꞌū atu mo ꞌite o kōrua he aha te meꞌe tano mo aŋa. Te ꞌAtua ko haꞌataꞌa ꞌana i a kōrua i te nuꞌu haka moe i te manaꞌu ꞌi ruŋa i a Ietū mo riro e tahi mau nō hakari ꞌe mo noho o kōrua taꞌatoꞌa ꞌi roto i te haumārū. ꞌE, e ꞌite kōrua mo māuru-uru mo oho ki te ꞌAtua.

E te taina, e haka kore tahi te meꞌe taꞌe tano aŋa ꞌi muꞌa ꞌā. ꞌIna kōrua ko moe i te viꞌe ꞌo i te taŋata taꞌe he viꞌe ꞌo he kenu o kōrua, ꞌina ko aŋa e tahi meꞌe taꞌe tano ꞌe hano-hano haŋa e te hakari, ꞌina kōrua ko haꞌatiꞌa ki te meꞌe taꞌe tano pohe e te hakari mo haka tere atu, ꞌe ꞌina takoꞌa ko nou-nou. (Te nou-nou, paꞌi, e tuꞌu rō ꞌā pa he meꞌe ena: e haꞌamuri ꞌana kōrua ki te ꞌītoro, ꞌe rā ꞌītoro he taoꞌa).

A kōrua, paꞌi, ko mate ꞌana, te auraꞌa, ko haka rē ꞌana te kōrua noho iŋa raꞌe era. ꞌE hora nei, te kōrua noho iŋa ꞌāpī ena pa he meꞌe: ꞌi muri i a Ietū Kiritō ꞌi muꞌa o te ꞌAtua. Te noho iŋa nei ꞌina he aŋi-aŋi e te taŋata

ꞌE, ꞌi te hora nei, te meꞌe o kōrua mo aŋa he haka kore mai ruŋa i a kōrua i te riri, i te riri taparahi-taꞌata, i te aŋa iŋa i te meꞌe taꞌe tano, i te vā-vā ꞌe i te parauꞌino.

ꞌIna kōrua ko reo-reo. Te huru ꞌe te noho iŋa taꞌe tano, paꞌi, o kōrua o muꞌa ꞌā ko haka rē tahi ꞌana. Te ꞌAtua ko vaꞌai atu ꞌana i te huru ꞌāpī, ꞌe ꞌāꞌana te aŋa te oho atu ꞌi roto i te kōrua māhatu mo riro o kōrua pē ia, ki ꞌata māhani ai kōrua i a ia.

E te kenu, e haŋa ki te kōrua ŋā viꞌe; ꞌina ko tōtōā ki te hora hopeꞌa.

E te ŋā poki, e haꞌatura ki te kōrua matuꞌa i te meꞌe taꞌatoꞌa, he meꞌe koa o te ꞌAtua.

E te ŋā viꞌe, e haka rē mo te kōrua kenu e haka tere atu, he oho iŋa tano o te ŋā viꞌe haka moe i te manaꞌu ꞌi ruŋa i a Ietū.