Beliebte Verse in Гелип чыкыш 49

Teilen

Шалык хасасы Яхуданың элинден дүшмез, онуң несиллери шалык сүрер элмыдам, Ол Шило гелер, миллетлер оңа боюн боларлар.

Юсуп бир мивели агачдыр, булак башындакы мивели дарагтдыр, шахалары дивардан ашяр. Яйчылар газап билен хүҗүм этдилер Юсуба, оны атып, ызындан ковдулар онуң.

Эмма Якубың Гудратлы Худайы, Ысрайылың Чопаны, Гаясы тарапындан онуң яйы берк, голлары гуҗурлы эдилди. Атаңың Худайыдыр саңа медет берҗек, ёкардакы асманың берекетлери билен, ер астындакы чуңлукларың берекетлери билен, эне гөвси хем эне ятгысының берекеди билен Гудратыгүйчли Худай ялкаҗакдыр сени.

Эй, Яхуда, элиң душманларыңың якасында болар, доганларың сени өверлер, атаңың огуллары саңа боюн эгерлер. Эй, оглум Яхуда, сен ав авлап, авуны ийип, доланып гелен шир баласы киминсиң, сен шир дек, эне шир дек чөкйәң-де ятяң. Шири еринден гозгамага милт эдйән ёкдур.

Эй, Рубен, мениң новбахар оглум, гүйҗүм-кувватым, җахыллык чагымың илкинҗи мивеси, хемме огулларымдан иң мертебелиси ве иң гүйчлүси сенсиң. Сув кимин дурнуксызсың сен, индиден бейләк мертебәң беленде галмаз сениң, чүнки сен өз атаң дүшегине гечип, оны харама чыкардың.