Tito 3
3
Kidziingu kyamoono mu Kiristo
1Baambula mwooyo kuri bo ti, bayelemini kuba batumuma kuri baatu balukiinsu, na kuri bari na lutumu ; baba na bintambukulu, na baba bayirima mu mpisi kiyiriki kyakibwete. 2Muutu kutuka pe, kuba pe bangaa-bikiindu, baba na bumpoombo, basoongo bundeembu kuri baatu bobanso. 3Mukwongo, mu ntaangu yayikulu beetu-meene se twaba biwulu, bangaa-nko, badziimbila, twaba mu bunkutu bwa nyiimunu na biminu bya bitsuumbu-bitsuumbu, twaba kwelutisa ntaangu mu mamabi na mu musoki, twaba baatu bari bababele na bakwebelesene bo na bo. 4Ngo mu ntaangu yamonokini mbweeyulu na ntiilu bya Nzaambi, Mubvuukisi weetu mu baatu, 5nde watubvuukisa, kari mu ntoono biyiriki byansuungumunu, bitwaba twayirika ko, ngo mu ngebe dzaandi, mu muswaaka wa mbutukulu yamoono, na mu nkitukulu yamoono ya Mpeeve Yangisi. 6Mpeeve yiyo nde kari katsaamuna ha yulu beetu, kwa mansaalisi mu Yisu Kiristo Mubvuukisi weetu, 7mpisi heki mu bweese bwaandi, tuba twalulukusu, na tuba bakondiri basaala, bunu buri nsiitu dza mwooyo wa bibvu ngo bibvu. 8Maampu mamama mayelemene mu kusiila kanyi, na me ntiiri ti ye yirika kutswiikisa dyaambu didyo, mpisi heki bamwaasiila kanyi mu Nzaambi, batsimina na baheele mutima mu biyiriki byabibwete. Mimyo miri myamibwete na miri mufunu kuri baatu. 9Yelemini kwebata mpaka dza buwulu, miloongo mya kinkaaka, mayumu na kubakana mu mitariri mangisi : Bibyo byahele mufunu na byabuunu. 10Muutu wukwekotoso mpambukusu, wumanaa kumulubula lwatete na lwadzoolo, wumuwuungiri. 11Ye yaari kuri ti, muutu wabubwo wawumuka, wuyirikaa masumu, na wabwiisa nyutu yaandi nde-meene.
Mandoongi mampotulu na mamboto
12Mu ntaangu yi nyisindika me Artema kuri ye, bunu pele Tisike, lo salila makwa mu kwiisa ku nyiri me ku Nikopoli, bukuri kukwo, me nyiri nyatsima kulutisila ntaangu ya kyoosi. 13Ha kuri Dzena, nzoonsi, na Apolo bibari na nzala byo mu budyeengi bwaaku, mpisi heki baba kibahelele pe. 14Baatu ba beetu-meene se, bayelemini kuyika kuheele mutima mu biyiriki byabibwete, mu kubaka bibari na nzala byo bya mufunu, mpisi heki bahele kuba baatu bahele na bimbutu.
15Bobanso bari na me hamaha, bakuheekiri mboto. Ha mboto kuri banduku baturi mu kanyi. Bweese buba na beenu-banso.
Alliance Biblique du Congo 2024