Tito 2
2
Nyikusulu dzataasulu kuri binuni
1Ye ngo wuri leele, myayelemene na nyikusulu dzadzibwete. 2Babakala ba binuni baba na ndiilu na nwiinu byayelemene, baba bakiinsuma, basoongolo, bakuma mu kanyi, mu ntiilu, na mu kifiki. 3Bakyeetu ba binuni se bwobumosi, mu kidziingu kya bo basoongo nzelu yayelemene mu bangisi. Yaa baba na makele ko, yaa baba bankutu ba nwiinu malu ya mawaamba ko, ngo baba bayikisi ba mamabwe, 4mpisi heki bayikisa bantuumba, bwakutiila balumi na baala, 5baba basokomo, bakiinsa manyutu maaku, bakwesa bisalu mu nzo, babweeye mutima, bakwetumuma kuri balumi baaku, mpisi heki maampu ma Nzaambi mahele kuba masaanu.
6Syaamisa minkuula se bwobumosi, baba basokomo 7mu myominso. Ye-meene se, soongo kifwaani mu biyiriki byabibwete, nsyemukunu na lukiinsu kunsa nyikisulu. 8Maampu ma ye hemese maba matsyeemeke, mahele na bwa kumanwaanisina, mpisi heki bataatu bafwa nsoni, bahele kubaka ntoono yayibi yi batuseembele.
9Bankutu baba batumuma kuri bamfumu ba bo-meene mu myominso, baba na mbweeyulu, yaa baba na muhaawu ko, 10yaa beyiba ko, ngo mu myominso basoongo kanyi dyadibwete, mpisi babweeye mu myominso, mu nyikusulu dza Mubvuukisi weetu Nzaambi.
11Mukwongo, bweese bwa Nzaambi Mubvuukisi, bwamonokono kuri baatu bobanso. 12Bwo buri mu kwetuyikisa, mpisi heki bu tubisiri bungooyi na nyiimunu dza nsi, twenata kidziingu kya ntaangu ya lumalu, mu kusokomo, mu nsungumunu na mu kinzaambi, 13mu kwekiingila nsiitu yayibwete, na monokunu nkeembu ya Nzaambi wadzaangama, na ya Mubvuukisi weetu Yisu Kiristo. 14Nde wayekiri nyutu yaandi mu ntoono beetu, mpisi katukuula mu momanso mamabi, na kutsyeemese kaanda dya nde-meene dyasoolu, diri na kuheme mu biyiriki byabibwete. 15Ye yelemini kudzoonsolo mu mamo, kusyaamisa na kuseembe mu lutumu lwolunso. Muutu yaa kakunyaafuna ko.
Alliance Biblique du Congo 2024