Mankuma 6
6
Kwekoto pe mu kwebele bibiimbu bya bakimi
1Mwaana waami, mbuti ye kumbuturyee ntulu mu kubakisa mbaasi yaaku,
na mbuti mu ntoono munzeense ye waburiri makuuku,
2wakaangisa nyutu mu ntoono maampu ma munwa waaku,
wabakama mu mweete mu mawuri watambukila.
3Yirika bubwo, mwaana waami mu kukuuluka,
bukuri ye wadzakala munsa kikaayi kya mbasi yaaku.
Yende kuri nde wumukurimina, mu kupala mu ntoono.
4Yaa bwiisa miisu myaaku tolo ko,
yaa tala se ko bibu bwa miisu byendekele tolo.
5Kuuluka kwaaku, bunu nkabi na noni mu myooko mya mulebeke myeete.
Yaa ba mubolo bunu pele kilyeebe ko
6Ye wakilyeebe, yende kuri kinoni,
mono bu kasalila nde, na baka madyeele.
7Kyo kyahele na kapita ti dimosi,
kyahele na mutari, kyahele se na mutumi.
8Mu ntaangu ya kisiku,
kyo kiyirikaa byandya, wubikutukisaa mu ntaangu ya ntololo.
9Natee nkya ntaangu, ye kilyeebe, wuba waneŋene ?
Mu nkya ntaangu ye wusiimbuka mu tolo ?
10Mwaa tolo twantele, mwaa miisu kutsunga,
mwaa kuneŋene kwantele kuri wadziinga myooko.
11Tumi buwelu sa bwiisa kuri ye bunu ngaa-kwiibi,
na manyoongi buni muyongolo.
Nzelu ya ngaa-bumpitu-bumpyoongo
12Muutu wukwetsyamikisaa misamu mampya, wahele na mufunu, nde wukweyirika mamabi.
13Nde wupyeete diisu, wudyaata kuulu, na wubiindika mileembu.
14Bumpitu-bumpyoongo buri munsa mutima waandi,
kwetaasila mamabi mu mpisi ntaangu,
kwebvulumuna mayumu.
15Mu didyo, mpasi sa dzimutubukila na sisu,
wakosoko na butsiina ti bebele pe.
Mya bele Yaave
16Misamu misaamunu kampe nsaamu miri Yaave katyaanaa ko,
myansisi kuri nde :
17Miisu mya masiiku, munwa mampya,
myooko mitsyaamuna makila mahele na kibila,
18mutima wukwesa bitaasi bya nsumukunu,
miilu mibingukila mu ntiinu mu kweesa bubi,
19kimbaangi kyampya, mpya dza suumbulu,
wukwebutisa mayumu ha kakati dya bampaangi.
Kukikebe mu kimpala
20Mwaana waami, kebe ntumunu dza taayi dyaaku,
yaa bwoongolo nyikusulu dza nguri yaaku.
21Kaanga byo mu mutima waaku,
kuta byo kwakinkulu mu nkiingu yaaku.
22Ha baanaa wukweyende,
hemese byetwaalisa ye,
ha wuneŋene, byekebe ye ;
bu siimbukiri, byekuyoloso.
23Bukuri ntumunu dziri bunu mwiinda,
maampu ma Yaave ngo buungi,
ndubukulu na nyikusulu ngo nzila ya kidziingu.
24Sa bikukebese mu mukyeetu wuri na bifu byabibi,
mu ludimu lwa lupyelu lwa mukyeetu wanzeense.
25Yaa nyiima mukyeetu kunsa mutima waaku ko, ti bukuri wabweeye mu kidziri ;
yaa bwa mu ntoono ndetukulu miisu mya nde ko.
26Bukuri mukyeetu wakiyala wumoonaa kiminu mu kitsuri kya mpa,
ngo mukyeetu wakweele, wulebekaa mweete mu kuholo kidziingu kya ntalu.
27Buri lo banetikini mbaawu mu pwooso,
kwahele kuyoko kinkutu ?
28Buri lo muutu dyeeti ha yulu makeengele,
kuri lo bitaambi biheri kuya ?
29Bwobumosi buri, kuri wunde wukwenama mukasi mbaasi yaandi ;
mpisi wunde wupala na nde, lo naanguni mukanu.
30Babakilaa ngaa-kwiibi kyaari ko, ha baanaa wuyiba
mu kuyukutisa manzala maandi.
31Mbuti bamudzuukiri mu kuyiba, lo sa kabvutula minsaamu ku minsaamu.
Sa kaha busina bwobunso buri mu nzo yaandi.
32Mpisi wunde wuta kimpala lo wahele na mutima wamutsiina,
wukwesa nyutu yaandi mbeesi nsa-nsaanda.
33Nde sa kabwaana nkwaasulu na kufwa nsoni ;
maseembu ma nde mayaalikaa ko.
34Bukuri bukwa bwa mubakala bumukitulaa ngaa-nkesi,
nde lo kamono ngebe ko mu kubvutula kitete.
35Kataambula kimbwanga ko,
kabvutuka mambisa ko, ti hayuku lumufunisini bimbwanga.
Alliance Biblique du Congo 2024