Mankuma 5
5
Madyeele mu mukyeetu ngaa-kimpala
1Mwaana waami, sa madyeele mu ma nyikuha me,
na taamba kutu mu nyukulu yaami,
2mpisi heki ye kebe nsimunu,
na bibori bya ye nyaabulu.
3Bukuri bibori bya mukyeetu wamunzeense bipalisaa maasi ma nyosi,
mu munwa waandi maasi.
4Na ha mambisa, nde wuri bunu musya wasekusu,
bunu mbeesi ya mbeesi yayila yiri na miinu kibari na kibari.
5Miilu mya nde mikulumusaa ku lufwa,
bitaki byaandi binataa ku nsi ya bafwa.
6Nde kari mu nzila yamwooyo ko,
wahele se kuyaaba ti misoki myaandi midziimbisaa.
7Na mu lumalu baala baami, ywiilee me,
yaa lulooso manyileele me ko.
8Yaa ba nkati-nsi na mukyeetu wunde ko ;
nzila yaaku, yaa yikokosolo na ya mweelu nzo yaandi ko.
9Mu kubata ti ye wukwiisa kuha lukiinsu waaku kuri baatu bakimi,
na mibvu myaaku kuri mudzusi.
10Mu kubata ti minzakikiri bayukuta mu bya ye,
bisalu bya mu nzo ye kuri munzeense.
11Ku manunu ye sa kuuma,
heki seke muswiinyi waaku na nyutu yaaku.
12Ye sa leele ti : « Dyaburi me nyanyaafuni nyikusulu,
na mutima waami ndubukulu.
13Me nyasiiri ywiila mbeembu bayikisi baami ko,
nyasiiri taamba kutu kuri babo babeeri yikisa me ko.
14Ha ntele ha siiri, nyabeeri mwaakoto kunsa mpopi,
mu kuba kunsa lukutukunu na kunsa mpuumbu. »
Kutya mukasi wa butuuti bwaaku
15Nwa maampa mapala mu mbiinda yaaku,
na makuumba ha kakati dya kitekulu kyaaku !
16Buri lo miwiila mya ye miri kwekuumbisa maampa ku mbasi,
na mikeri mya maampa mu bibeendu bya bobanso ?
17Hemese kaba wa wunu ye kitsu,
kwahele kintwaari na banzeense.
18Hemese mukeri waaku kaba wasakumunu,
na keembe mu mukasi wa butuuti bwaaku.
19Mukasi nkabi wasalama, nsyese yatoloko ;
mabeene ma nde makuyukutisa bunu malu mu mpisi ntaangu,
na ye ba wakaangama mu ntiilu yaandi kwakinkulu.
20Mu nki ye wuwumuka, mu mukyeetu wanzeense mwaana waami ?
Buri lo weenyumbutina ntulu mukyeetu wanzeense ?
21Manzila ma muutu mari ha miisu mya Yaave,
nde wuri kwetala manzila maandi momanso.
22Lumvuki lwa ngaa-bubi, lumukaanga bunu mweete,
na sa kakaangama mu bikonyi bya masumu maandi.
23Nde sa kafwa mu nyikusulu yiri yo pe,
na buwulu bwaandi bubvuri sa bwamulawukisa.
Alliance Biblique du Congo 2024