Lutaangu 6
6
Ngisi mu nsiilulu dza munadziri
1Yaave waleele kuri Moose ti : 2Dzoonso kuri baala ba Iselili ; baleele ti : Mbuti wamubakala bunu pele wamukyeetu, siiri nsiilulu dza munadziri#6.2 Munadziri wabasoongaa ti wuri mu kusalila Nzaambi mu bidiimbu byoolo : Nde wababisaa kunwa malu na kutabula mfu. mu kuba ha luteke na kukiha kuri Yaave, 3lo kahoto bviinya na malu makolo#6.3 Kumono Luk 1.15., nde kari nwiini se malu mansa mayirika mu bviinya ko ; ti bviinya dyansa dyayirika mu malu makolaa : Nde kari nwiina malu ti mamosi mabayirika mu bimbutu bya bviinya ko, kari ndiilu bimbutu bya bviinya bya maampa na byakana ko. 4Mu biluumbu byobinso bikaba ha luteke, nde kari ndiila ti kimosi kya muti bviinya ko, kuholosono mu miikina natee biyubulu bya bimbutu. 5Mu biluumbu byobinso bya nsiilulu dzakuba ha luteke, saamba kuluta pe ku muutu nde, natee kukuka biluumbu bikaba ha luteke mu ntoono Yaave, nde sa kaba wangisi, sa kahemese mfu dzaandi dzi buuka mu kidzuunu#6.5 Kumono Bal 13.5 ; 16.17 ; 1 Sa 1.11.. 6Biluumbu byobinso bikari ha luteke mu ntoono Yaave, lo nde kukokosolo pe kuri mvuumbi ; 7ti hayuku mvuumbi taayi, ya nguri, ya mpaangi bunu pe ya kibusi kyaandi, lo nde wahele kusumuka, bukuri wuri na kidiimbu kya bunadziri mu ntoono Nzaambi yaandi.
8Biluumbu byobinso bya bunadziri bwaandi, nde sa kaba wangisi mu ntoono Yaave. 9Mbuti muutu fwiiri nkabala bebele na nde, na sumuni mutu waandi mu bunadziri, lo nde sa katebe mutu mu kiluumbu kya nsyemusunu yaandi. 10Mu kiluumbu kyampoomo, sa kanata biduku byoolo bunu pele baala ba mabeembe boolo kuri ngaanga-Nzaambi ha nkotulu nzo yangooto ya mbwanukunu. 11Ngaanga-Nzaambi sa kaha mosi mu kikabu kya mpemusunu masumu, na mosi mu kikabu kya kuyoko, sa kasa ha yulu nde nsyeemusunu mu sumu dikatobiri mu ntoono mvuumbi. Mu kiluumbu kikyo sa kaseme mutu waandi. 12Nde sa kabweese kuba ha luteke kuri Yaave biluumbu bya bunadziri bwaandi, na sa kaha mwaana kimeeme wa mubvu mosi mu kikabu kya lumvuki ; biluumbu byatekisiri byahele mu lutaangu, bukuri beeri wasumuka mu bunadziri bwaandi.
13Yimayi ngo ngisi yitariri bunadziri. Kiluumbu ki kakukisa biluumbu bya bunadziri, sa bamunata ha nkotulu nzo yangooto ya mbwanukunu 14Nde sa kanata bikabu kuri Yaave : Mwaana kimeeme wamulumi wa mubvu mosi wahele kipfuumi mu kikabu kya kuyoko, mwaana kimeeme kyamukasi kya mubvu mosi wahele kipfuumi mu kikabu kya mpemusunu masumu, kimeeme kyamulumi kyahele kipfuumi mu kikabu kya kiyeengi ; 15kitunga kya mampa mahele lufunusu, bindaatini byahele lufunusu byasobo mu maasi, na mambeete mahele lufunusu manyaka maasi, na kikabu kyabikunu na kya bviinya. 16Ngaanga-Nzaambi sa kanata bikabu bibyo ha busu bwa Yaave, sa kaha kikabu kya mpemusunu masumu na kya kuyoko. 17Kimeeme kyamulumi kuha mu kikabu kya kiyeengi kuri Yaave, ha yulu haho kitunga kya mampa mahele lufunusu. Ngaanga-Nzaambi sa kaha kikabu kyabikunu na kya bviinya. 18Munadziri sa katebe, ha nkotulu nzo yangooto ya mbwanukunu, mfu dzaandi dza bunadziri ; sa kaholo mfu dzaandi dza bunadziri na kudzituba ku mbaawu yiri mu kululuka ha nsuku kikabu kya kiyeengi. 19Ngaanga-Nzaambi sa kaholo heembu dya kimeeme kyamulumi kya ya, na kindaatini kyahele lufunusu mu kitunga na mbeete yahele lufunusu ; Sa kasuusa byo ha myooko mya munadziri, kuri nde mwaa tebe mfu. 20Ha mambisa haho, ngaanga-Nzaambi sa katsingisa bikabu bibyo mu kubiyaangisa ha busu bwa Yaave. Byo sa biba byangisi, na bya ngaanga-Nzaambi, ha yulu kikuuku kya ntulu ki bayaangisiri na kya kito kibayusiri. Ha mambisa haho munadziri wuri na miswa mu kubweese kunwa malu.
21« Mamo mangisi matariri munadziri wusa nsiilulu mu kukiha bunu kikabu kuri Yaave. Bibyo bikabu bya kuha kuri Yaave, kwahele kutaanga byabimosi. Nde yelemini kukukisa nsiilulu dzaandi, bunu buri mu kuloombo mangisi ma kuba ha luteke#6.21 Bit. 13-21 : Kumono Biy 18.18 ; 21.23-24.. »
Maampu ma lusakumunu
22Yaave waleele kuri Moose ti : 23Yaabisa Aaroni na baala baandi ti : Bumabu luyelemini kusakumuna baala ba Iselili ; sa lwaleele kuri bo ti :
24Hemese Yaave kalusakumuna na kalukebe !
25Hemese Yaave katsyeemese kidziri kyaandi
ha yulu beenu na kalusiila mpemisi !
26Hemese Yaave katalisa kidziri kyaandi
kuri beenu na kaluha kiyeengi !
27Bubwo bo basuusa nkuumbu yaami ha yulu baala ba Iselili, na me sa nyabasakumuna.
Alliance Biblique du Congo 2024