Lutaangu 5
5
Nyusukulu baatu bari mu kiteesu kya nsumukunu
1Yaave waleele kuri Moose ti : 2« Yaabisa baala ba Iselili, mu kupalisa bobanso basumuka, bari na bubeeru bwa nkabi, na bubeeru bwa baanda mwooyo, na basumuka mu kubumuna mvuumbi, ku mbasi. 3Kubaandika mu babakala natee mu bakyeetu, luyelemini kubapalisa#5.3 Kumono Bal 13.46. ku mbisa kibeendu kya mpuumunu. Sa lwa bapalisa, mpisi bahele kusumuna manzo mangooto manyiri nyadzakala me ha kakati dya bo. » 4Baala ba Iselili bayirika bubwo : Bo babapalisa ku mbisa kibeendu kya saba, bunu bwadzoonsiri Yaave kuri Moose, baala ba Iselili bayirika bubwo.
Bwakusiila mu muutu wusinini mangisi
5Yaave waleele kuri Moose ti : 6Yaabisa baala ba Iselili ti : « Mubakala bunu pele mukyeetu wuyirikiri mamabi kuri mbaasi, lo tobiri masumu ha busu bwa Yaave, muutu wunde sa kaba kunsa lumvuki. 7Nde yelemini kutaambula masumu maandi makayirikiri, na sa kabweese ndaandu ya kitini kyabitaanu ha yulu kitotolo kikabvutula kuri ngaa-kyo, bukuri wuri kunsa lumvuki kuri muutu wunde. 8Mbuti ngaa kitotolo wafwa na wahele na mwiisi-kaanda wukiholo, lo sa bakibvutula kuri Yaave, kuri ngaanga-Nzaambi, ha yulu kimeeme kyamulumi kya kikabu kya ndoombolo mpemisi#5.8 Bit. 5-8 : Kumono Bal 5.20-26. mu kyo basiila wabwa buungu mpemisi. 9Bikuuku byobinso bibayusula mu bikabu byangisi, biba bya ngaanga-Nzaambi. 10Bitotolo byangisi bya mpisi muutu bya nde-meene. Bi kayakisa kuri ngaanga-Nzaambi sa biba bya nde#5.10 Maampu ma mu Kihebereho mahele kubvula kutswiikisa na mbangukulu yahele na deredee.. »
Mukyeetu wubabotolo ti wuri na kimpala
11Yaave waleele kuri Moose ti : 12Yaabisa kuri baala ba Iselili ti : Muutu wuri mukasi waandi soongiri ndyaatulu yayibi, mu kubwa mu mvuutunu yadika, 13Mbuti mubakala mukimi wukwebuuruma na nde kuri mulumi wahele kuyaaba, mbuti sumukini mu mansweeki, kwahele mbaangi yi mu mwiini na kwahele kumukwaata, 14ngo mulumi wukwemubotolo na kumusiila bukwa, bunu mukasi wasumuka ; bunu pele mulumi wukwemubotolo na kumusiila bukwa, ngo mukasi wahele kusumuka ; 15lo mulumi sa kanata mukasi kuri ngaanga-Nzaambi, na ndaambu yakuumi ya fufu dya bwaangala bunu kikabu mu mukasi waandi. Ngo kari nyitikila maasi na kufiitisaa libano ko, bukuri kikyo kikabu kya bukwa mu mbambukulu mwooyo mu lumvuki. 16Ngaanga-Nzaambi sa kakokosolo mukyeetu na kumutelemese ha busu bwa Yaave. 17Ngaanga-Nzaambi sa kaholo maampa mangisi#5.17 Maampa mangisi : Mbangukulu maampu yahele kutswiikisa ; bahele kuyaaba kari maampa makebe ku nzo yangisi, bunu pele maampa mafumuna ku muwiila yangisi. mu kiyobi, mu kumasaanga na fuundu di katolo ha butoto buri munsa nzo yangisi. 18Ngaanga-Nzaambi sa katelemese mukyeetu ha busu bwa Yaave, sa kamunyangina mfu, na kumukwaatisa kikabu kya mbambukulu mwooyo mu bukwa ha myooko myaandi. Ngaanga-Nzaambi nde-meene sa kakwaata maampa mankari#5.18 Sa kamunyangina mfu : Kitsiitsa kuba kidiimbu kya mpasi, kisoongo bufwiiri (kufwanikisa na Bal 10.6). - Maampa mankari : Maampa mangisi masaanga na fuunda. matwaala mpopi. 19Ngaanga-Nzaambi sa kaleele kuri wamukyeetu mu kulaba maalu « mbuti bakala wahele kuyaaba kimpene kya ye, na mbuti ye wahele kuta kimpala mu kuwuna mulumi waaku, lo ye waluuluka mu mpopi ya maampa mankari mamama. 20Ngo mbuti ye sumukini, na wunini mulumi waaku, mbuti mubakala mukimi wabuurimini na ye... » 21Ngaanga-Nzaambi sa kamulabisa maalu na kumuleele ti : « Yaave kakuseembe mu mpopi yiba kuburiri ha kakati dya baatu baaku, ka kukitula kisita na kakutuundisa mwooyo, 22na maampa mamama matwaala mpopi ma kukoto mu mwooyo mu kumutuundisa na kukukitula kisita ». Wamukyeetu sa kabvutula ti : « Bunubwo, bunubwo ».
23Ngaanga-Nzaambi sa katina mampopi mamo mu mukaanda na kumayaala mu maampa mankari. 24Sa kanwiisa mukyeetu maampa mankari mamo, matwaala mpopi, kuri makoto mu nde. 25Ngaanga-Nzaambi sa kaholo kikabu kya bukwa ha myooko mya mukyeetu mu kusoongo kuri Yaave, na kukinata ha dziku dya Nzaambi. 26Nde sa kayusula kikuuku kya kikabu kya "mbambukulu mwooyo#5.26 Kumono Bal 2.2 na matina." mu kuyoko ha dziku dya Nzaambi, na kunwiisa mukyeetu maampa. 27Bu kamunwiisa maampa, na mbuti wamukyeetu wasumuka kuri mulumi mu kuta kimpala, lo maampa mankari mamo sa makoto mu mwooyo waandi, mu kutuundusa na kumukitula kisita. Na nde sa kaba mukyeetu wa mpopi wubaholo kifwaani kunsa baatu baandi. 28Ngo mbuti wamukyeetu wahele kusumuka, mbuti watsyeemeke, lo sa bamuluulukisa : Nde sa kabaka bilesi.
29Yiyo ngisi yitariri ntiilu yabukwa, mu ntoono yiri mukyeetu wuri mu lutumu lwa mulumi sumukini kuri mulumi na kuta kimpala. 30Bunu pele mulumi wuri mu kusa bukwa mu mukasi. Lo nde sa kamutelemese ha busu bwa Yaave, na ngaanga-Nzaambi sa kayirika lutumu lulwo mu wamukyeetu. 31Mulumi sa kaba wasaalisa mu lumvuki. Ngo mukasi sa kaha mvutu mu lumvuki lwaandi.
Alliance Biblique du Congo 2024