Nahumi 3
3
Bvula dya badzusi ditsaamukini
1Kyaari mu bvula dya badzusi,
dyaluula mu mpya, na mu kwiibi
na dyahele kuhoto kuwoolo bitotolo.
2Lusuku lwa bikoti,
lusuku lwa miluungu :
Mikiindu mya makavaalu,
kidumu kya bikokolo.
3Banati ba makavaalu bakotiri mu mudziingu,
mambeesi mamala mari mu kuseme,
mata mansyaari mari mu kusereme :
Fundu-fundu dya basuumbuka !
Bamvuumbi bahele lutaangu !
Baatu bakwekaka mu bamvuumbi...
Ninive yaluula mu nsoni
4Mu ntoono buyala bwa mawaamba bwa kiyala, Ninive,
wamubwete na wuri na bweese,
mukuutu buloki,
wusuumbaana mansi mu buyala bwaandi,
na makaanda mu buloki bwaandi.
5Me nyikutungukila, mbikululu dza Yaave ngaa-mikaangu :
Me sa nyaba mutaatu ye.
Me sa nyayalila dzweele dyaaku natee ku busu,
na sa nyasoongo kimpene kyaaku kuri makaanda,
na nsoni dza ye kuri mansi.
6Me sa nyakuyirikila misamu myansoni,
sa nyakusaana,
na kusa ye, kifwaani kya kuseyele.
7Mpisi wu kumono sa kayitika la na ye,
na sa kaleele ti : « Ninive yatsaamuka !
Na wunde wumubakila ngebe ?
Kuri nyibakila babo bamuboondo ? »
Ninive sa kabaka maseembu momamosi na Tebese
8Buri ye bvuri bubwe ti na No-Amone,
bvula dyatuungu ha kakati dya miwiila,
diri dyadyengekele mu maampa,
na dyakakusulu bunu kibaka mu maampa ma nyari yiri bunene bunu mubu ?
9Nubya na Ngipiti baba mpinu dza nde,
dziri mpwiilu pe.
Bari Puti na bari Libi,
baba bindaandi byaandi#3.9 Puti : Kumono mu Esa 66.19 na myatina..
10Baatu ba nde se,
babaneti ku bunkutu mu nsi yabunzeense.
Baala baandi bantele babakosini
mu makuumbu ma manzila momanso.
Bamfumu baandi babateele wari,
na bakuutu baandi bobanso babakaangiri bikonyi.
11Kuri ye se, Ninive
mpasi sa dzakwootono mu ye,
ye sa wasweeme,
ye sa wasaka kisweemunu,
la na mutaatu.
Ninive wahele kubangisina kutanda
12Manzo maaku mamakwa ma nkalulu bula momanso mari bunu ngenge dzabeenge :
Bu banyingisa muti,
dziwiiri kusonoko,
mu munwa wa wunde wutiiri kudya.
13Mono baatu basiiri kuri ye, bani bakyeetu,
myeelu mya nsi yaaku,
myadzibula ha busu bwa bataatu baaku :
Bibindukulu biwiiri kunyeenge mu mbaawu.
14Teke maampa maaku,
bukuri lubweese kubaka bwakupalila ko,
kumisa manzo maaku mamakwa ma nkalulu bula,
sobo toto, yirika tubuumbu
holo kibululu kya bibiriki.
15Kunsa bvula didyo,
mbaawu sa yakunyeengese,
mbeesi yayila sa yakukeke, sa yakukweenye bunu kinkookoto.
Funina bunu bambambala, funina bunu bambambala.
Baatu bawiiri
16Ye wafunusini bangaa-mumbungu baaku,
kubvuriri ti na bambwetete ba ku yulu :
Biyeeye bitaanda nsala na bidumukini.
17Bakebi baaku bari bunu bambambala,
Bamfumu ba bayongolo baaku bunu musuku biyeeye,
bakwesunduka mu yulu bifulu mu ntaangu ya kyoosi :
Ntaangu bu yinaangukini, badumukini,
na bahele kubweese kuyaaba kibeendu ki babeeri.
Asiri dyatsaamuka kwakinkulu
18Mbyaasi ya Asiri,
batari ba bibulu baaku bari tolo,
bakuutu ba bayongolo baaku badzakala.
Baatu baaku batsamikina mu yulu milaandu
na kwahele muutu wubakutukisa.
19Mpasi dzaaku dzahele kuleenge,
mputa yaaku yahele kubeeleke.
Babo bayuka makubwiiriri,
basimuna na babula makuuku mu ye.
Bukuri na wuri kasiiri kumono mpasi dza bubi bwa ye,
mu mpisi ntaangu ko ?
Alliance Biblique du Congo 2024