Nahumi 2
2
1Miri mu kwiisa, ku yulu milaandu
miilu mya munati musamu wamubwete :
Nde wuyaabisa kiyeengi !
Yuuda, keembese minkeembu myaaku,
kukisa bitaasi byaaku !
Bukuri Belyali kabweese kulutila mu nsi yaaku ko ;
bamwaamuyusula.
2Kinsyaamina weki mu kunwaanisa ye.
Kebe lupaangu lwa bvula,
talila ha nzila,
yirima mu mudziingu,
lwaata kibakala, ba na mpinu dzalaka.
3Bukuri Yaave wubweese kubvutula
kimweese kya Yakobi,
wubvutula se kimweese kya Iselili,
bukuri bangaa-kwiibi bameeni kubayiba na bitotolo,
na babvukiri bikuni bya bo.
Ninive baholo na basa kwiibi kwahele nsoni
4Bankanyi ba mukaangu
bari na bikakusulu byabeenge,
na balwaata binkutu byabeenge.
Bikokolo biluluka bunu byuufu bya mbaawu,
mu kiluumbu kya kubatarimisa.
Mata ma misomono mari mu kunyingina.
5Bikokolo bikotiri mu manzila mantele,
na biri mu kubingukila mu manzila mamanene,
mu kubimono lo bunu byuufu bya mbaawu,
biri mu kudzumuna mu mawasu, bunu mansereme.
6Mbyaasi Ninive wuteele bamfumu ba bayongolo,
ngo bakwebwa makubu mu nzila.
Baatu bari mu kubingukila ku kibaka,
mu kuba ha kisweemunu.
7Myeelu myatalisa ku manyari#2.7 Bvula dya Ninive dyaba dyatuunga mu teteke dya manyari moolo, Tingere na muwiila waandi Koseri.
bamitaandiri,
na kisaangala kikotiri mu nzo mbyaasi.
8Kiteki kibeeri kyatelemese bakiyariri, bakineti ;
bisari byaandi byabakyeetu biri mu kuyaya
bunu budililaa mabeembe ;
bo bateeteke myooko mu yulu mitu.
9Mu mantaangu momanso, bvula dya Ninive dyabeeri bunu kidzinga kya maampa,
ngo mari mu kuwa kupala.
« Telemeenu, telemeenu »,
ngo, ti mosi pe mu bakweyitika wukebekele.
10Manee kuwoolo palata, manee kuwoolo woolo.
Busina bwaandi bwahele mpwiilu,
bvula dyaluula mu bitotolo byantalu.
11Byobinso bameeni kuwoolo, bameeni kubula na bameeni kutsaamuna.
Bobanso bito bi bahoriri ;
maboongo matsuka ha nsi,
nyutu yoyinso yitekete
na bidziri biyandiri.
Ninive yeki bunu nkosi yi bakaangiri
12Kisweemunu kya bankosi#2.12 Nkosi yimonokoso lutumu lwa bari Asiri, kisweemunu ngo bvula dya Ninive. kiri hari ?
Kyabeeri kidiilu kya baala ba bankosi.
Mu ntaangu yabeeri kweendaana mulumi nkosi, lo mukasi siiri,
kuri muutu ti mosi ko wabee pamunaa baala baandi.
13Nkosi yabeeri kaakalaana bibulu mu kudiisila baala baandi,
na kubipina ha diinga mu kuha kuri mukasi waandi.
Na wabeeri luulusaana miduku na bisweemunu
mu toongo twa bibulu byakaakulu.
14Me nyikutungukila, mbikululu dza Yaave ngaa-mikaangu :
« Me sa nyayoko bikokolo bya ye kuri lo byeeki mwiisi na mwiisi,
baala ba bankosi baaku sa bafwiila mu mbeesi yayila.
Me sa nyusula bi wabee woolaana ha butoto,
kababweese kuyuka mbeembu ya banati-mikeensu ba ye ko. »
Alliance Biblique du Congo 2024