Yaakobo 3
3
Ludima
1Bampaangi baami, yaa luba balaka mu kweyikisa ko, yaabeenu ti mutsuundu wa beetu bayikisi, sa kabvula makwa. 2Mukwongo, beetu bobanso turi mu kwebwa kwalaka. Mbuti muutu wahele kubwa mu nzoonsulu, lo wunde muutu wakuka, wubangisina kutwaalisa nyutu yaandi yoyinso. 3Mbuti tukaangaana kisuungukulu mu minwa mya makavaalu, lo mu kuri ti batumuma kuri beetu, na tutwaalisaa manyutu ma bo momanso. 4Monee se mabwaatu, bwooso mabeele mu bunene, masindukulu mu biteembu byamakwa, lo mo mari matwaalusu mu mwaa kisuungukulu kyantele, kunu kutiiri munati. 5Bunubwo se, ludima mwaa kinamu kyantele, ngo kikwebilika mu bitotolo byabinene.
Monee meti ! Mwaa mbaawu yantele yikooyokaa musitu, bwooso kabeele mu bunene. 6Ludima se luri bunu mbaawu, nsi ya bubayi ; ludima lwasuusa ha kakati dya binamu byeetu, lusumunaa nyutu yoyinso, na luyokaa kidziingu kyokinso, bu luri lwanamuku mu mbaawu lubila. 7Mukwongo, mpisi kitsuumbu kya bibulu bya ku bitiiti, kya banoni, kya banyoko, na kya bibulu bya mu maampa, kyayukusu na kyayeki kyayukusu kuri kitsuumbu kya muutu. 8Ngo ludima, kuri ti mosi mu baatu, wubangisina kuluyukusa ko, bubi buri bwakubwiisila pe, lwaluula mu misya midzusaana. 9Mu lwo, tusakumunaa Mfumu wuri Taata ; na mu lwo se tubulilaa baatu mampopi, bari mu kifwaani kya Nzaambi. 10Mu munwa ndemosi mupala lusakumunu na mampopi. Bampaangi baami, bwahele kuyelemene ti buba bubwo. 11Buri mu nto yoyimosi, lo mukeri palisiri maampa madzuuna na mankari ? 12Bampaangi baami, buri mungenge lo butiri mfilu, bunu pele mubviinya lo butiri ngenge ? Pele, nto ya maampa ma mungwa, ka yitsiitsa kupalisa maampa madzuuna ko !
Madyeele ma ku yulu
13Nani mu beenu wuri ngaa-madyeele na wayika ? Kasoongo dyo mu ndyaatulu yayibwete, na mu biyiriki byaandi bya kidzuunu na bya madyeele. 14Ngo mbuti beenu luri na musoki wankari, na mpeeve ya nwanusunu mu mitima myeenu, lo yaa luba na masiiku ko, na yaa lwekitula ngwanwa mu mpya ko. 15Madyeele ma bubwo, makoofumunaa ku yulu ko, ngo ma nsi, ma kimuutu na ma mampeeve mamabi. 16Mukwongo, haho hari musoki na nwanusunu, hanaho se hari kisaangala, na nsalulu yoyinso yayibi. 17Ngo madyeele ma ku yulu, hatete mari nkati matsyeemeke, tumi makiyeengi, madzuuna, matumuma, maluula mu ngebe na mu bimbutu byabibwete, mahele na munsoori na mahele na bumpitu-bumpyoongo. 18Kimbutu kya nsungumunu kiri kyakunu mu kiyeengi, kuri babo basalila kiyeengi.
Alliance Biblique du Congo 2024