Yaakobo 2
2
Kuhele kusalila bubayi
1Bampaangi baami, yaa lusalila bubayi ko, mu kanyi di luri na dyo mu Yisu Kiristo, Mfumu yeetu yankeembu. 2Mukwongo, mbuti muutu mosi, walwaata lungele lwawoolo, na binkutu bikweseme, kotiri mu nzo-nkutukunu yeenu, na wamuwelu se walwaata binkutu byamviindu kotiri, 3ngo beenu lusyeetuka kuri walwaata binkutu bikweseme lumuleeriri ti : "Ye, dzakala ha kibeendu kyakibwe ki" ; na kuri muwelu lumuleeriri ti : "Ye ngo wuri teleme hamaha, bunu pele dzakala ha nkata-miilu mya me ha". 4Buri haho kari nsobokoso luri mu kusa mu beenu-meene ko ? Na kari lweki batsuundisi bari na nswiikusulu yayibi ko ?
5Bampaangi baami ba mutima, yukeenu : Buri kari Nzaambi ko, wasooriri bari bawelu mu mya nsi, ngo bisina mu mitariri kanyi, na bakondiri ba Kimfumu, kikari kasa lusiilulu kuri babo bamutyaanana ? 6Ngo beenu lwasaanini muwelu. Buri kari bisina bakookwelubamisaana, na bakookwelunataana ha mbasi ya mutsuundu ko ? 7Buri kari bo bakwesaana nkuumbu yayibwe, yibari balutangukina ko ?
8Mbuti ngwanwa beenu lukukisaa ngisi ya kimfumu bunu buri Matinu : "Tya mbaasi yaaku bunu ye-meene", haho lo luyirikaa mamabwe. 9Ngo mbuti beenu luri bangaa-bubayi, lo luyirika masumu, na lwabwa mu mitariri mangisi, bukuri lweki basinini ba mangisi. 10Bukuri wunde wukebaa mangisi momanso, ngo bwiiri mu ntoono mosi, lo bakimini mu momanso. 11Mukwongo, wunde waleele ti : "Yaa ta kimpala ko", waleele se ti : "Yaa dzusa ko". Ngo mbuti ye wahele kuta kimpala, kasi dzusiri, lo ye weki musinini mangisi. 12Mu didyo, dzoonseenu na salileenu, bunu beenu luba batsuundusu, mu ngisi ya bunsaalisi. 13Mukwongo, mutsuundu wahele na ngebe kuri wunde wahele na ngebe ; ngo muutu ngaa-ngebe wahele na boomo bwa mutsuundu.
Kanyi na biyiriki
14Bampaangi baami, mbuti muutu wuleele ti nde wuri na kanyi, ngo wahele na biyiriki, lo nkya ndaandu ? Buri kanyi dya bubwo lo dimubvuukisiri ? 15Mbuti mpaangi mosi, bunu pele kibusi kimosi, bari mpene, na bahele na byandya bya mpisi tsuku, 16ngo mosi mu beenu wubaleeriri ti : "Yendeenu mu kiyeengi, lwateenu binkutu bya kyoosi, na yukuteenu", ngo wahele kubaha biri mufunu mu nyutu, lo nkya ndaandu ? 17Bunubwo se buri mu kanyi, mbuti dyahele na biyiriki, lo dyafwa mu dyo-meene.
18Ngo muutu habaanaa wuleele ti : "Ye wuri na kanyi, ngo me nyiri na biyiriki. Sa soongo me, kanyi dya ye kwahele biyiriki, na me nyikusoongo kanyi mu biyiriki bya me." 19Ye wutaambula ti Nzaambi yoyimosi yiri, bwabubwe wuyirikaa ; mampeeve mamabi se mataambula na matekitaana. 20Dzeeke dya muutu ! Yaaba kuri ti, kanyi dyahele na biyiriki, lo dyahele mufunu. 21Buri Abarahami, taayi dyeetu, kari mu biyiriki kari kalulukusu, bu kaheeri mwaana waandi, Isaki, mu kikabu ha yulu dziku ko ? 22Wumono ti, kanyi dyaba salisinaa na biyiriki byaandi, na mu biyiriki, kanyi dyatubuka mu kiteesu kyakuka. 23Matinu mayende mu mana : "Abarahami kasaanaa kanyi mu Nzaambi, ngo bamwiini dyo ti wasuunguma, na bamuteele ti nduku Nzaambi". 24Lumono ti muutu wuri walulukusu mu biyiriki, nkani ka munu mu kanyi kitsu ko.
25Bunubwo se, Lahabi ngaa-buyala, mu biyiriki kari kalulukusu, bu kataamburi bantumu, na bu kabayitikisi mu nzila yikimi. 26Mukwongo, bunu buri nyutu yahele na muwuumunu yiri yafwa, bunubwo se kanyi dyahele na biyiriki diri dyafwa.
Alliance Biblique du Congo 2024