Esayi 45
45
Syrusi wunde wubyaalisiree Nzaambi
1Bumabu Yaave kaleeriri
kuri waandi wasakumuna :
« Kuri Syrusi wu nkweetee mu lubakala lwaandi,
mu kusuusa makaanda kunsa lutumu lwa nde,
mu kubwiisa mpiinu dza bambyaasi,
na mu kudzibula myeelu mya mabvula
myakaanga ha mankula ma ye.
2Me sa nyeende ha mankula ma ye
mu kusuunguka bibeendu byateengeme,
mu kubula myeelu mya mayele
na bikaangulu bya biseengu. »
3Me sa nyikuha bisweekulu byasweeme
na busina bwafukuma,
mpisi ye yaaba ti me nyiri Yaave,
wukuteele mu nkuumbu yaaku,
me ngo Nzaambi ya Iselili.
4Mu ntoono ya kisari kyaami Yakobi,
na mu Iselili, kaanda dyaami dyasoolu,
me nteeriryee ye mbila mu nkuumbu yaaku.
Me nyikudzaangisiri
kuri ye wahele kuyaaba me.
5Me nyiri Yaave, kuri mukimi ko.
Ha yulu me, kuri nzaambi yikimi ko.
Me nyikukaangiri musweele mu luketu,
kuri ye wahele kuyaaba me.
6Mu kuri baatu bayaaba ti,
kuholosono kupalilaa ntaangu natee kuyidyaamaa,
kwabuunu, kuri mukimi ko,
ha yulu wuni me Yaave.
7Me nyiyirikaa buungi
na nyibwiisaa mampimbisi.
Me nyihaanaa kiyeengi
na nyikotisaa ngebe.
Me Yaave nyisaanaa
myominso mimyo.
8« Hemese mayulu, kuni kinsoongo-yulu,
dinokoso mufwoofo !
Na matuti manyaka
nsungumunu !
Hemese butoto budzibuka
mu kuri mvuukulu yibuta bimbutu,
na nsungumunu yiha bifulu ha kimosi !
Mamo me Yaave nyayirika. »
Tubuumbi na mubuumbi
9Kyaari kuri muutu wusaka yumu
kuri wunde wamuyirikiri,
buni lo nde wuri buni kisa
kya tubuumbu ha kakati dya bisa byamosi !
Tubuumbu lo tufuuriri kuri muutu wutusalila ti :
« Nki wuri mu kuyirika ? »
Kisa lo kileeriri kuri mubuumbi ti :
« Wahele na myooko#45.9 Kumono mu Lom 9.20. ! »
10Kyaari kuri muutu wuleele kuri taayi ti :
« Nkya tsuumbu dya mwaana ye wuri wabuta ? »
Bunu pele kuri nguri ti : « Nkya tsuumbu dya mwaana ye wabutiri ? »
11Bumabu Yaave, Wangisi wa Iselili,
kari mu kuleele, wunde wayirika
kaanda dya Iselili :
« Me lufuula mu mamo makwiisa
mu ntoono baala baami,
na me luha lutumu
mu ntoono ya biyiriki bya myooko myaami ?
12Me nyayirika butoto
na baatu badzakala mu bwo.
Me nyayalamina mayulu
na nyitumaa bambwetete bari mu mo.
13Me, kunsa nsungumunu, mpeekiree muutu wunde,
na me sa nsuungika manzila maandi momanso.
Nde sa katuunga bvula dyaami
na kubvutula babo bayitikiri mu kusweeme,
kwahele ntalu na kimbwangi,
bu leeriri Yaave ngaa-mikaangu momanso ! »
Iselili, Nzaambi wuri kuri ye
14Bumabu Yaave kaleeriri :
Kimbutu kya kisalu kya bari Ngipiti,
ndaandu ya byobinso bya bari Etyopi,
na baatu ba Seba, babakala badzaangama,
bo na byobinso sa biisa kuri ye,
mu kuba ba ye.
Baatu babo sa bakunama ha mambisa, kuri bakaanga mu mindala mya biseengu ;
bo sa baluta ha busu bwa ye
na sa bakutsukumina mu kukusaambila :
« Kuni kuri ye kitsu kuri Nzaambi, kwahele mukimi,
banzaambi bamosi babuuna. »
15Mu ngwanwa ye wuri Nzaambi yasweeme,
Nzaambi ya Iselili yibvuukisaa !
16Bayiriki ba biteki
sa babafwiisa nsoni na sa babasukisa.
Bobanso mu kintwaari sa bafwa nsoni.
17Ngo Yaave sa kabvuukisa Iselili,
na mvuukulu yiyo sa yiba kwalunkulu.
Beenu lufwa nsoni ko,
na balukulila ko,
natee mu mibvu ngo mibvu.
Mvuukulu yayaabisa bukensikilee
18Bumabu Yaave kari mu kuleele,
nde wayirika mayulu,
Nzaambi wabuumbiri
na wayirikiri butoto kwa bukeketee.
Nde wahele kubuyirika bwamukangala,
kasi wabuyirikiri mu kudzakala.
« Me nyiri Yaave
kwahele mukimi.
19Kari mu nsweeki me nzoonsiri ko,
ha kibeendu kiri mampimbisi mu nsi.
Me nyahele kuleele
kuri baala ba Yakobi
mu kusaka me hari mukangala.
Me Yaave kudzoonso masuunguma,
na kuyaabisa misamu myayelemine. »
Nyiingulu madyeele ya makaanda
20Bweese kubvuutina na waseenu,
kokisilee mu kintwaari,
beenu babvuukiri bari mu makaanda.
Bahele na nyaabulu,
babo bakwenata biteki bya miti,
na bakwesaambila banzaambi bampya
bari lo babvuukisa ko.
21Yaabisee maluri na mo,
na twaalee bimbaangi byeenu ;
heleseneenu mandoongi mu kintwaari.
Na wayaabisiri mamonoko lumalu,
kuholosono mu ntaangu yayikulu ?
Na watekisiri kumayaabisa ?
Buri, kari me Yaave ko ?
Kuri na nzaambi yikimi ko, ha yulu wuni me kitsu,
me nyiri Nzaambi yasuunguma na yibvuukisa,
wuungu-wuungu me, kuri mukimi ko.
22Syeetikee kuri me
na benee babvuuka,
beenu bobanso bari ku nsukulu butoto,
bukuri me nyiri Nzaambi, na kuri mukimi ko.
23Me nyilabaa maalu mu me-meene,
mu kupalisa nsungumunu mu munwa waami,
me nyiyiinga maampu mamo ko.
Maboongo momanso sa matsukuma ha busu bwa me,
na mandiinga momanso sa malaba maalu#45.23 Kumono mu Lom 14.11 ; Fil 2.10-11. mu me.
24Munu mu ntoono ya me Yaave bo sa baleele ti :
« Kukwo kuri nsungumunu na makwa. »
Bo sa biisa natee kuri me
na sa bafwa nsoni bobanso,
babo babakiri nkesi kuri nde.
25Mu Yaave, bo sa baba baluuluka,
na sa bakeembele,
bilesi byobinso bya Iselili.
Alliance Biblique du Congo 2024