Esayi 44
44
1Mu lumalu, yuka kwakubwe,
ye kisari kyaami Yakobi,
ye Iselili wunyasooriri.
2Bumabu Yaave kaleeriri,
wunde wakuyirika na wa kubuumbiri,
wunde wa kubakisiri
kuholosono mu mwooyo nguri :
Yaa ba na boomo ko,
Yakobi, kisari kyaami,
ye Yesuruni wunyasooriri.
3Bukuri me sa nyayitila maampa
ha yulu butoto bwakana,
miwiila sa mikuumba
ha yulu butoto bwakana.
Me sa nyayitila Mpeeve ha yulu baala baaku,
na lusakumunu lwaami ha yulu makaanda maaku.
4Bo sa babuuka
ha kakati dya bitiiti,
buni miti myamene mu mpele
midzuumba mya maampa.
5Mosi sa kaleele ti : "Me nyiri wa Yaave" ;
wamosi sa bamuteele mu nkuumbu ya Yakobi.
Mukimi sa katina ha yulu kikaayi kyaandi ti :
"Me nyiri mu Yaave"
na sa kaholo nkuumbu ya Iselili.
Nsilukunu banzaambi bampya
6Bu leeriri Yaave, Mbyaasi ya Iselili,
wunde wamukuula,
Yaave ngaa-mikaangu momanso, ti :
« Me nyiri watete,
na me nyiri se wampotulu#44.6 Kumono 48.12 ; kufwanikisa na Nya 1.17 ; 22.13..
Kuri na nzaambi yikimi ko,
ha yulu wuni me kitsu. »
7Na wuri buni me ?
Hemese kadzoonso,
kanyaabisa na kubaangila momanso,
kuholosono bu nyasiiri baatu batete !
Hemese kayaabisa baatu misamu miyirima,
na mimyo mikwiisa ku mankula.
8« Yaa lubaka kinkuukulu ko,
yaa luba na boomo ko.
Kuholosono mu ntaangu yayikulu,
me nyasii kuluyaabisa na kululele ko ?
Beenu luri bambaangi baami ko ?
Buri, wuungu-wuungu me,
kuri na nzaambi yikimi ?
Pele, kwahele tari dikimi,
me nyahele kuyaaba kwaami ti dimosi. »
Bayiriki ba biteki
9Bayirikaa biteki bya banzaambi bampya, bobanso baatu babuuna.
Bitotolo byaaku se bibatiiri byahele mufunu.
Bambaangi baaku bahele kubamono
na bahele kubayaaba.
Mu bubwo bo sa bafwa nsoni.
10Na wuyirikaa nzaambi yampya, bunu pele kubuumba kiteki,
mu kuri kihele kuba na mufunu !
11Tala, bobanso bari kintwaari na byo
sa bafwa nsoni.
Bayiriki ba biteki
bo-meene se baatu kitsu bari.
Hemese bobanso bakutukuna,
biisa bamonoko :
Bo sa baba na boomo
na kufwa nsoni.
12Mutsuri-bitari mu kusekese kikubu,
nde wusalilaa mbaawu,
mu kutsula kyo mu nsina ;
nde wukisulumisaa na kuyirika kyo
mu makwa ma myooko myaandi.
Ngo bu kakolo nzala, lo kwa diwiiri.
Mbuti wahele kunwa maampa,
lo bito bimuhoriri.
13Muhari-miti wuholaa
musiinga mu kuteese muti.
Nde wutyalaa mpeembe muyookolo kwaasa,
na kuleenge muti mu kilengele.
Nde wumuhaanaa kifwafwani kya muutu,
buni muutu wubabweeyisiri,
mu kudzakala mu nzo.
14Bakootabulaa mambuyu,
na kusoolo miti mya midiimbu na mya terebinte,
mibasiisaa mu kubuuka
ha kakati dya miti mya musitu.
Buni pele bakunaa miti mya midiimbu,
mpisi mvula yimibuukisa.
15Sa kaba muti wa kuyoko
mbaawu kuri baatu.
Bubamuholo bayotiri mbaawu
na kulaamba byandya byaaku.
Buni pele kuyirika nzaambi yampya,
mu kutsukumina ha mankula ma yo.
Lo bahariri se kiteki
mu kusaambila kyo.
16Bu bayoko kibari kya muti ku mbaawu,
balaambiri byandya bi badya,
na bubadya bahele kubweese kukolo nzala.
Buni pele bayotiri se mbaawu
mu kuleele ti : « Me nyotiri mbaawu,
mwiini kwaami mbaawu yayibwe ! »
17Mu ndaambu muti yamosi yisiiri,
bo bayirikaa nzaambi yampya,
bayirikaa kiteki,
bayilimaa na batsukumaa ha mankula ma kyo
mu kusaambila ti :
« Kuulu me, bukuri ye wuri nzaambi yaami. »
18Bo bahele kuyaaba,
bo bahele kubakukila.
Miisu myaaku myakaangu
mu kuri bahele kumono,
bahele kubangisina
kuswasikisa mu mutima waaku.
19Kuri ti mosi ko wutsima mu mutima waandi,
kuri na wuri na nyaabulu ko,
bunu pele madyeele mu kuleele ti :
« Me mvukiree mbaawu mu ndaambu muti wunde ;
ndaambiree se byandya mu makeengele mambaawu,
na kuyoko toongo tunidya.
Mu ndaambu muti yisiiri
yi nyisumuka me mu kuyirika kiteki !
Ha mankula ma kitsuri kya muti
me nyitsukuma ! »
20Bo bari mu kuyukuta mu kudya lufutu,
bari mu kukiwuna mu mitima na kuwumuka,
nzaambi yaaku yibakuula ko,
kasi bo-meene sa baleele ti :
« Kinyiri nyakwaata ha kooko kwaami kwa
lubakala yiri nzaambi yampya ko ? »
Ye wuri kisari kyaami, kudzimikina pe
21Baambuka mwooyo mu mamama,
ye Yakobi, ye Iselili :
« Ye wuri kisari kyaami.
Me nyakuyirikiri
mu kuba kisari kyaami.
Iselili, me nyikudzimikina ko.
22Me nyaariree lumvuki lwaaku
buni buyaalukaa tuti,
na masumu maaku
buni buyaalukaa matuti mapiinda.
Wasa bvutuka kuri me, bukuri me nyakukuuriri. »
23Mayulu mayimbila mu kiminu,
bukuri Yaave yirikiri dyaambu.
Musundu wa butoto kafula miloolo.
Milaandu, misitu, na miti myominso
mibikisa mu kiminu,
bukuri Yaave kuuriri Yakobi,
na nkeembu yaandi yimonikini ku Iselili.
Muyiriki nsi wuri mfumu ya mantoono
24Bumabu buleeriri Yaave
wa kubvuukisiri na wakuyirikiri,
kuholosono mu mwooyo nguri :
« Me Yaave, mekaka kitsu, nyayirikiri
byobinso byayalimina mu mayulu.
Me nyayirikiri butoto,
na kwaandi waba kintwaari na me ?
25Me nkabikisi bidiimbu
bya bimoni na babikiri bampya,
me nyiri mu kubadziimbisa
mu kubvutula bangaa-madyeele mambisa,
na nyisoongaa ti nyaabulu yaaku
yiri ya buwulu#44.25 Kumono 1 Ko 1.20..
26Me nyitswiikisaa
maampu ma kisari kyaami,
na kukukisa bitsimi bikaangaa
bantumu baami.
Me nyileele mu Yerusalemi ti :
"Baatu sa babweese kudzakala mu dyo",
na mu mabvula ma nkoonsi ya Yuuda ti :
"Sa babweese kumatuunga,
me sa nyatuunga mbwiilu yaandi".
27Me nyileelaa kuri musundu wa mubu ti :
"Ba wakana, na me sa nyakanisa manyari maaku".
28Me nyiri mu kuleele mu ntoono Syrusi ti :
"Mutari bimeeme waami,
wunde wukukisa momanso mantiiri,
mu kuleele mu Yerusalemi ti :
"Hemese dibweese kutuunguma",
na mu Nzo-Nzaambi ti : "Sa yibweese kuteleme ha yulu lufulu#44.28 Syrusi : Kumono matina mu 41.2. - Kubweese kutuunga Nzo-Nzaambi : 2 Bm 36.23 ; Esd 1.2.. »
Alliance Biblique du Congo 2024