Esayi 3
3
Butsa-butsa mu nkoonsi ya Yuuda
1Mfumu, Yaave, Ngaa-mikaangu,
tatula mu Yerusalemi na Yuuda,
mbakulu yoyinso na kinyemu kyokinso,
mbakulu yoyinso ya mampa
na mbakulu yoyinso ya maampa,
2nkanyi na kinwaani,
mularimi na mubikiri,
ngaa-masuku na mukuutu,
3mfumu ya makuumi mataanu na muutu wabudzitu,
muhe-mandoongi, mutsuri wamadyeele na wubvuri bumpaani,
4Me sa nyabaha bituuti byababakala mu kuba bamfumu,
mwaa bilesi sa bya batuma.
5Mu kaanda,
mosi sa kabamisa wakaka na mpisi muutu mpaangi yaandi ;
kituuti sa kakwaamisa kinuni,
wahele mufunu sa kakwaamisa muutu wabudzitu.
6Heki muutu sa kakwaata mpaangi yaandi
munsa nzo ya mbutukulu :
Ye wuri na nsina, ba mfumu beetu !
Holo mudzuku bikaku wu !
7Kiluumbu kikyo wakaka sa kabikisa ti :
Me nyiri ngaanga ko,
na mu nzo me mwahele ti mpa ti kiyuungu ;
yaa lusoolo me mfumu kaanda ko !
8Bukuri Yerusalemi dyakaka,
Yuuda dibwiiri,
bukuri mu nzoonsulu bo na mu biyiriki bya bo
byatalisa kuri Yaave ;
basa tungu ha busu bwa nkeembu yaandi.
9Nzeengulu dzaaku dzita kimbaangi kuri bo ;
masumu maaku, bamasoongo, bunu Sodomo,
bo bahele kumasweeke.
Nkya mpasi mu bo !
Bukuri bari mu kuyirika mpasi !
10Leelee ti :
Wasuunguma wuri mu nzila yayibwe,
sa kakeembe mu bimbutu bya biyiriki byaandi.
11Nkya mpasi kuri ngaa-bubi !
Sa myaba myamibi kuri nde,
bukuri sa bamuyirikila myayirikiri myooko myaandi.
12Kaanda dyaami diri na bakwaamisi ngo bilesi,
na bakyeetu badituma ;
Kaanda dyaami, basuunguki baaku bakuwumuna,
Bari mu kudzimbikisa nzila yiwuri mu kunama.
Muyalu banatisi ba Iselili
13Yaave telemini mu kufuunda,
nde wateleme mu kutsuundisa baatu.
14Yaave kotiri mu nsundusulu
kintwaari na bakuutu ba kaanda dyaandi na bamfumu baandi :
Beenu lwabukutiri bviinya,
bibyo bitotolo bi lwadzikiri kuri bawelu byaluluusa manzo meenu !
15Bukuri nki beenu luri mu kukosono kaanda dyaami,
bukuri nki luri mu kunyifina busu bwa bawelu ?
- Bu leeriri Yaave Nzaambi Ngaa-mampuumbu.
Kuri bakyeetu bababwe ba Yerusalemi
16Yaave wuleele ti : Bukuri bantuumba ba Syooni bari na masiiku,
bukuri bakweyende kuri mankiingu manonoko,
na bisoosi biri kila-kila,
bukuri bakweyende ntentele
na bakweeyukusa lusuku lwa miluungu miri mu miilu myaaku,
17Yaave sa kasa kungulu mu mutu bantuumba ba Syooni,
Yaave sa kanyangina mbuunsu yaandi.
18Mu kiluumbu kikyo, Yaave sa kayusula bilebete byobinso : Miluungu mya mu miilu, masiinga, nkoongolo dziri mu mutu, mansaanda ma kufuka munwa na mboombo ; 19binzembele, miluungu mya mu myooko na mansaanda ma kufuka ku busu ; 20bitambala, misaanga mya mu miilu na misweele, bitengele bya mananaasi na masungu ; 21lungele lubasiilaa kinyemu na miluungu mya mu mboombo ; 22binkutu bya munkeembu na maampu mamala, biyuungu na masakoose ; 23myeenye, binkutu bya nsuku, bitambala bya buwala-wala na bya nkoongolo.
24Ha kibeendu kya mananaasi mamfuku, sa diba ludziina ;
ha kibeendu kya musweele, musiinga ;
ha kibeendu kya mfu dzahanda, kungulu ;
ha kibeendu kya kiyuungu kyakibwe, tsaaka mu nsaanda,
ha kibeendu kya mbweeyulu, kidiimbu kya kifulu kyakana.
Bafwiiri ba Yerusalemi
25Baatu baaku sa bafwa mu mbeesi yayila,
bankanyi baaku mu mudziingu.
26Myeelu myaandi sa myakuuma na sa myaba mu kifwiiri
myooko na myooko, sa kadzakala ha nsi.
Alliance Biblique du Congo 2024