Habakuki 3
3
Lusaambulu lwa Habakuki : Nkotulu Nzaambi
1Lusaambulu lwa Habakuki, mubikiri, mu kidilu.
2Yaave, me nyayukiri ma mu ye,
na me nyiri na kibvumi mu biyiriki byaaku.
Yaave, bweese kuyirika byo,
mu mibvu mimami ;
yaabisa byo mu mibvu mi.
Ngo kunsa nkesi dzaaku,
baambuka mwooyo ti ye ngaa-ngebe.
3Nzaambi fumini ku Temani,
Wangisi nangukini ku mulaandu wa Parani. (Mpuumunu)
Buungi bwaandi butsyeemisaa mayulu,
na nkeembu yaandi yiluulusaa butoto.
4Nde wuri mu kuseme bunu buungi,
misoonsi mipala mu kooko kwaandi,
kukwo kwasweemene makwa maandi.
5Ha busu bwa nde, kiyoolo kiri mu kweyende,
na mu kakwedyaata nde baawu dikwepala.
6Katelemaana, butoto butekitiri ;
kakyeesaana, makaanda mabakiri boomo.
Milaandu myamikulu mikwetsaamuka,
bikumu byabikulu bikwekosoko,
misoki myantama.
7Me mwiini manzo mangooto ma bari Kusani, matsaamukini ;
bisweemunu bya mu nsi ya bari Madyaani, biri mu kutekete.
8Yaave, buri ye kabala kubakila manyari ?
Buri nkesi dza ye kubakila manyari,
kituunsi kya ye mu mubu ?
Kuri heki ye nwaata ha yulu makavaalu,
ha yulu bikokolo bya ye bya ndulukulu.
9Ye palisiri buta bwa nsyaari bwaaku ha saariri ;
madyoongi ma ye, ngo maampu mawuri mu kwepalisa. Mpuumunu
Ye wukwebaala butoto mu manyari.
10Milaandu bu mikumono, mitekete,
mvula yamakwa bu yinokini,
mubu wuri mu kuyomo,
wuri mu kunaanguna myooko myaandi ku yulu.
11Ntaangu na ngoondo biteleme
ha busu bwa buungi bwa madyoongi ma ye,
na ha busu bwa mansereme ma madyoongi maaku.
12Ye wukwedyengekele nsi mu nkesi dzaaku,
mu kabala, ye wukosono makaanda.
13Ye mwapala mu kubvuukisa baatu baaku,
na mu kubvuukisa mesya yaaku,
ye watsyaamuna nsoongi nzo ngaa-bubi,
watsyaamuna yo natee mu lufulu. Mpuumunu
14Ye tobiri mitu mya bakuutu ba bataatu,
mu madyoongi ma bo-meene.
Bo bayisiri bunu kiteembu,
mu kutsamikisa beetu.
Bo bafula miloolo mya kiminu,
kuri bakiri basweeme,
bunu ti bamwaabaka muwelu wakudzusa.
15Ye wadzibula mu mubu, nzila yi lutaa makavaalu ma ye,
ha kakati dya kiyomo kya maampa mamakwa.
16Me nyayukiri na nyiri na mutima kinkuukulu ;
mu lusuku lulwo, bibori byaami
bitekete,
miyisi myaami miri mu kubolo ;
na nyiri mu kutekete ha kibeendu kinyiri.
Me nyahele kupala, nyikiingila kiluumbu kya manyoongi,
mu kunwaanisa baatu, bakwiisa kutubwiisila kikiindu.
17Mungenge kabweese kufula ko,
kubweese kuba ntolulu bviinya ko,
mi-olibve myahele kubweese
kubuta kwasoongolo,
manseke mabweese kuha byandya ko,
kusiiri bimeeme kunsa mpaangu ko,
kusiiri bangoombo mu bihaangu ko.
18Me ngo wuri sa nyamono kiminu mu Yaave,
sa nyakeembe, mu Nzaambi yaami yibvuukisa.
19Yaave Mfumu yaami, ngo makwa ma me :
Nde wuleengisaa miilu myaami bunu mya bankabi,
nde wunataa me mu mankoto.
Mukuutu bayimbiri na bisikulu bya nzense.
Alliance Biblique du Congo 2024