Habakuki 2
2
1Me nyeensi mu kuteleme ha kibeendu kyaami kya kukete ;
me nyeensi mu kuteleme ha yulu kibaka ; me nyeensi mu kukete na kuyuka,
mi kaleele kuri me,
na nkya mvutu nde kaha, mu ntoono nyayulu dza me.
Mvutu Nzaambi : Wasuunguma, na mukwaamisi
2Yaave waha mvutu kuri me, waleele :
« Tina mamono-miisu,
na tina mo mu mabaya,
mpisi heki wunde wutaanga, kataanga mo kwakubwete.
3Bukuri kyakiri kimono-miisu, kiri mu ntaangu yi, kyakiri kumonokono pe,
ngo sa kyamonokono ku manunu.
Kyo kisoongo mampya ko ; mbuti kidziingiri, lo kiingila
mu ngwanwa sa kiisa,
kidziingila ko.
4Tina : Ngaa-masiiku, wahele kusuunguma kunsa mutima waandi;
ngo wasuunguma sa kaba wamwooyo mu nkwikumunu yaandi.
5Mu ngwanwa malu mari na mawunu,
muutu wuri na masiiku, kakoobaa na kidzuunu ko.
Nde wasaalisa muwiri waandi bunu nsi ya bafwa,
bunu lufwa nde kayukutaa ko.
Nde wakutukisa makaanda momanso kuri nde,
na wabvuuta baatu bobanso kuri nde.
6Bobanso babo, sa bamusiila munsiku,
sa bata mansayi, bimpa na Mankuma,
mu nde. »
Nyabusulu mpasi
Sa baleele ti :
Kyaari,
kuri wunde wukutukisa busina,
buri kari bwa nde-meene ko.
Ngo natee nkya ntaangu ?
Na nde wubweese kuteeteke kibiimbu, ha yulu bibiimbu.
7Babo basoomboso ye mboongo, tumi bahele kukutelemene nasisuu ?
Babo bakukwaamisa, tumi bahele kusiimbuka ?
Ye sa ba kuri bo, mudiilu waaku.
8Ngo bukuri ye wawooriri busina bwa makaanda malaka :
Baatu bobanso basiiri sa bawoolo busina bwa ye se,
bukuri ye watsyaamini makila ma baatu,
wakotisiri nkwamusunu mu nsi,
mu bvula na kuri bobanso badzakala mu dyo !
9Kyaari kuri wunde wuri, bya mu nzo yaandi,
kwebakila mu bumbabu,
mpisi kasuusa dzaansa dyaandi ku nkati-yulu,
mu kukuuluka mu myooko mya ngaa-mamabi.
10Ye watsimini kudzusa nzo yaaku nsoni.
Bu wadzusiri baatu balaka,
nyutu ya ye-meene bwiisiri mu masumu.
11Bukuri tari diri mu kibaka,
sa dyafula misaakulu.
Mubaangu nzo,
sa kamuha mvutu.
12Kyaari !
Kuri wunde wutuunga bvula mu makila,
na wudzakisa bula ha yulu bubayi.
13Buri mimami kari kuri Yaave ngaa-mikaangu,
mifumini ko ?
Baatu bakwemono mpasi mu bitotolo biwa kuya,
makaanda ma kweholo bito kwabuunu.
14Bukuri butoto sa bwaba bwaluula
mu nyaabulu nkeembu Yaave,
bunu bu luulaana
maampa mu mubu.
15Kyaari kuri wunde,
wunwiisa mbaasi yaandi malu,
masaanga na mbaka,
mpisi kakolo na bamono kimpene kyaandi.
16Ye bvuri kuluula mu nsoni, ti na mu nkeembu :
Nwa ye se, mpisi soongo kimpene kyaaku,
mbasa ya kooko kwalubakala kwa Yaave sa yakubvutukila,
na nkeembu ye, sa yakituka nsoni.
17Bukuri nkwamusunu dzi basiiri ku Libano,
sa dzakubwilikila ;
mfwiilu bibulu,
sa yiluha boomo ;
bukuri ye watsyaamini makila ma baatu,
wakotisiri nkwamusunu mu nsi,
mu bvula na kuri bobanso badzakala mu dyo !
18Mufunu kiteki nki,
mpisi heki muhari-biteki kakihala ?
Nkya mufunu wuri mu kiteki kyatsula mu kiseengu,
ki bakweyikisila mpya,
mpisi heki muyiriki kyo, kasiila nsiitu mu kyo
na kweyirika banzaambi bampya ba mababa ?
19« Kyaari kuri wunde wuleelaa kuri kitsuri kya muti ti : Teleme ! »
Na kuri tari dyahele na mbeembu ti : « Siimbika ! » Buri tari didyo lo dimuyikisiri ?
Ti hayuku dyakila woolo,
bunu pele palata,
lo dyo dyahele na muwuumunu kunsa kati.
20Yaave wuri mu Nzo yaandi yangisi.
Hemese nsi yoyinso yiwura ha busu bwaandi.
Alliance Biblique du Congo 2024