Kohelete 3
3
Mpisi kitotolo na ntaangu
1Byobinso biri na ntaangu, mpisi ntaangu na misamu myaandi ha butoto.
2Ntaangu mu kubutuka
ntaangu mu kufwa ;
ntaangu mu kukuna
ntaangu mu kutuubula bi bakunini ;
3ntaangu mu kudzusa
ntaangu mu kubuka ;
ntaangu mu kutsaamuna
ntaangu mu kutuunga.
4Ntaangu mu kudila
ntaangu mu kuseye ;
ntaangu mu kunyoongo
ntaangu mu kukina.
5Ntaangu mu kulooso matari
ntaangu mu kutolo matari ;
ntaangu mu kubumbusina
ntaangu mu kuhambisina.
6Ntaangu mu kusaka
ntaangu mu kudziimbisa ;
ntaangu mu kukebe
ntaangu mu kulooso ;
7ntaangu mu kukaakila
ntaangu mu kutuunga.
Ntaangu mu kuwura
ntaangu mu kudzoonso.
8Ntaangu mu kutya
ntaangu mu kubele ;
ntaangu ya midziingu
ntaangu ya kiyeengi.
9Nkya ndaandu yiri kuri wunde wukwesala kisalu ? 10Me nyamono kisalu kyakwiika Nzaambi kuri baala ba baatu. 11Byobinso wabiyirika byabibwe, mu ntaangu yaandi. Nde wasuusa mu mitima mya bo ntaangu yinamitina, kuri muutu kahele kudzuukila kisalu kiri mu kusala Nzaambi, ku mbandukulu natee ku manunu. 12Me nyaari ti kwahele kiminu ti kimosi kuri bo, mbuti kari mu kukeembe na kuyirika mamabwe mu kidziingu kya bo ko. 13Na se mpisi muutu wudya, wunwa, wumono mamabwe mu kisalu kyaandi kyokinso, kikyo kikabu kya Nzaambi. 14Me nyaari ti byobinso byasa Nzaambi, bibyo biba kwakinkulu ; kuri kya kubweese ha yulu kyo ko, kuri kya kuyusula ko. Nzaambi wasa kuri ti baatu bamubvumina. 15Bibyo biri, bibyo biba, byaba byeki. Nzaambi sa kasaka bibyo byadziimbila.
Byobinso kuwiila mu lufwa
16Me nyabweese kumono ha butoto : Ha kibeendu kya kuyala, haho hari mu kutuma bubayi ; ha kibeendu kya nsungumunu haho hari mu kutuma bubayi. 17Me nyaleele kuri mutima waami, Nzaambi sa katsuundisa ngaa-nsungumunu na ngaa-bubayi, bukuri kuri mpisi kitotolo na ntaangu, na kuri mutsuundu mu mpisi kisalu. 18Me nyaleele kuri mutima waami, mu ntoono baala ba baatu, Nzaambi sa kabatsiitsa, mpisi bo-meene bamono ti bibulu kitsu bari. 19Bukuri manunu baala ba baatu, na ya bibulu, yoyimosi kitsu yiri kuri bo ; bunu buri lufwa lwa wumawu, bunubwo se buri lufwa lwa wakaka ; muwuumunu mosi kitsu wuri mu bobanso. Kubvula kwa muutu ha yulu kibulu kwabuunu, bukuri byobinso byampamba. 20Byobinso kweende ku kibeendu kyokimosi ; byobinso byafumina mu fuunda, byobinso bibvutuka mu fuunda. 21Na yaari mbuti muwuumunu wa baala ba baatu ku yulu ka kookweendaana, na wa bibulu kusa kudziimbila mu butoto ? 22Me nyamono ti kwahele bubwe ti bumosi ti na bwa kumono kiminu mu biyiriki byaandi ; bukuri kikyo ngo kibari kyaandi ; bukuri kuri wumubvutula ko mu kumono mikwiisa ha mambisa ma nde.
Alliance Biblique du Congo 2024