Kohelete 2
2
1Me nyaleele mu mutima waami ti :
« Tala, biimba luwu lwa minkeembu heki mono mamabwete. »
Mono, bubwo se bwampamba !
2Kuri biseyu me nyaleele ti : Bulawuki !
Na kuri kiminu : Kya nki ?
3Me nyatsimini kuyekele nyutu yaami mu malu na kudyaata bunu baatu bahele na madyeele, ngo mutima waami wukebe ndyaatulu ya madyeele, me nyaa ti kumono mayirika baatu mamabwete mu lutaangu lwa biluumbu bya kidziingu kyaaku. 4Me nyasiiri biyiriki byabinene.
Me nyatuunga manzo mu me-meene,
nyakuna ma bviinya ma me-meene.
5Me nyayirikiri manseke na mabvunga,
nyakunini mu mo miti mya bimbutu bya mpisi kitsuumbu.
6Me-meene nyahaka bidzinga bya maampa,
mu kunyaka mitwiikila mya miti.
7Me nyasuumba bankutu bababakala na babakyeetu,
na baala ba bo babutuka mu manzo baba se ba me.
Me nyabaka mampuumbu ma bibulu byabinene na byantele,
mu lutaangu lubvuriri ti na bobanso batekisiri na me mu Yerusalemi
8Me nyakutukisa se palata na woolo,
na bisweekulu bya bambyaasi na bya mankoonsi maba kunsa lutumu lwa me.
Me nyabaka bayimbiri bababakala na babakyeetu,
na bibyo bihaanaa kiminu kuri baala ba baatu, bakyeetu balaka.
9Me nyeki muutu wamunene, nyabvula na babo batekisiri na me ku Yerusalemi.
Na madyeele maba mu me.
10Byobinso byaba saka miisu myaami, me nyahele kudika kumono.
Me nyahele kukabikisa kiminu ti kimosi kuri mutima waami.
Mutima me wakeembe mu bisalu byobinso bi nyasala,
yiyo ngo ndaandu yaami mu kisalu kyaami kyokinso.
11Me nyamono kisalu kyokinso kyasala myooko myaami
na mpasi dzi nyiri nyamono.
Mono, byobinso bibyo bya mpamba na namunu kiteembu.
Ndaandu ti mosi yo pe ha butoto.
12Me nyaba ntiiri kubakila buri madyeele, budzeke,
na bulawuku.
Me nyakifuula : Muutu wukwiisa ha mambisa ma mbyaasi nki kasa kwaandi ?
Mimyo mibamwaatekesele kuyirika.
13Me nyabakula ntoono mosi.
Madyeele mabvuri bubwe ti na bulawuku, bunu buri buungi bubvuriri bubwe ti na mampimbisi.
14Ngaa-madyeele wuri na miisu ma kumono ku kakweende ;
ngo kilawuki kweyende kunsa mampimbisi.
Ngo me nyaari ti boboolo manunu yoyimosi baba na yo.
15Me nyaleele kunsa mutima waami ti :
Ngo bukuri manunu ya kilawuki yoyimosi na ya me, lo nki kwaandi mu kuba ngaa-madyeele ?
Me nyadzoonso kwalaka mu mutima waami ti bubwo se bwampamba
16Bukuri mu mantaangu momanso, kuri mbambukulu mwooyo mu ntoono ti yimosi ko kuri ngaa-madyeele
na kuri dzeeke.
Biluumbu bu biri mu kweluta, myominso mikwedziimbila. Ngaa-madyeele wufwa, wadzeeke se wufwa. Bukuri nki ? 17Me nyabele kidziingu bukuri biyiriki bikwesalama ha butoto byabibi. Bukuri byobinso masiiku na manunu kiteembu.
18Me nyabele mpasi dzaami dzodzinso dzi nyiri nyamono ha butoto, bukuri me nyelimini kusiisa biyiriki byaami kuri muutu wunde wukwiisa ha mambisa ma me. 19Ngo na yaari kari ngaa-madyeele bunu pele dzeeke kaba ? Ngo nde sa kaba na lutumu, ha yulu kisalu kyaami kyokinso kinyiri, nyasala mu madyeele ha butoto. Bubwo se bwampamba. 20Bu nyamono kisalu ki nyasala me ha butoto makwa mawa.
21Bukuri kuri muutu wasala mu ntoono yiyo mu madyeele, mu nyaabulu na mvuumfu. Ngo mono, nde siisiri saala dya nde kuri wunde wahele kusala. Bubwo se bwampamba na bubi bwabunene. 22Nkya ndaandu yiri na muutu, mu kisalu kyaandi kyokinso ki kasariri mu mutima waandi, kika kamwiinini mpasi ha butoto ? 23Bukuri mu biluumbu byaandi mpasi na manyoongi, ti hayuku butsuku, lo mutima waandi wahele kuwuuma ; bubwo se bwampamba
24Kuri dyadibwe ti dimosi kuri muutu ko, mbuti kari kudya, kunwa, na kumono kiminu mu ndaandu ya kisalu ko. Me nyamono ti didyo se dyafumuna mu kooko kwa Nzaambi.
25Bukuri kuri wudya ko, kuri wunwa ko na wumono kiminu ko mbuti Nzaambi wahele kumuha miswa.
26Kuri wunde wabweeye ha busu bwa nde, nde wuhaanaa madyeele, nyaabulu na kiminu. Ngo kuri wunde wusumukaa, nde wuhaanaa kisalu kya kukutukisa na kukebe bitotolo, mu kuha kuri wunde wabweeye ha busu bwa Nzaambi. Bubwo se bwampamba na namunu kiteembu.
Alliance Biblique du Congo 2024