2 Samweele 3
3
1Mudziingu wadziingila ha kakati dya nzo Sawuli na nzo Daavidi. Daavidi waba makwa kusa kuhamisa, ngo nzo Sawuli kweholo bito.
Baala ba Daavidi babutuka ku Heberoni
(1 Mp 3.1-4)
2Baala balaka babutuka mu Daavidi ku Heberoni. Nde wabuta mwaana watete Amenoni, mwaana Ahinohami wa ku Yidzerehele ; 3Mwaana waandi waboolo Kilehabi, mwaana Abingayili, mukasi Nabali wa ku Karemeli ; wabatatu, Abesalome, mwaana Maaka, mwaana wamukyeetu wa Talamayi mbyaasi ya ku Ngesuri#3.3 Ngesuri : Kumono 13.37-38 na myatina.. 4Wabana, Adonyasi, mwaana Hangiti ; wabataanu Sefatya, mwaana Abitali ; 5Wabasaamunu, Yitereyami, wa ku Engila, mukasi Daavidi. Babo babutukiri mu Daavidi ku Heberoni.
Abenere wayumuna na Ise-Bosete
6Ntaangu yaba mudziingu wakiri ha kakati dya nzo Sawuli na nzo Daavidi, Abenere waba wadzakasa lutumu lwaandi mu nzo Sawuli. 7Sawuli waba na nduku yamukyeetu, yaba nkuumbu Lisepa, mwaana Aya. Ise-Bosete waleele kuri Abenere ti : « Bukuri nki ye siiree makweele na nduku taayi dya me ? » 8Mu ntoono misamu mya Ise-Bosete mimyo, Abenere wabaka nkesi dzalaka, nde waleele ti : « Buri me mbwa bari Yuuda nyiri ? Tee mu lolo di, me nyasa nkwikumunu mu nzo Sawuli, taayi dya ye, kuri bampaangi baandi na kuri banduku baandi. Me nyasiiri kuyekele ye ko mu myooko mya Daavidi. Ngo ye wankaangila kolo, mu ntoono wamukyeetu natee mu kiluumbu ki ? 9Hemese Nzaambi kanseembe kwamakwa mbuti nyahele kuyirika mu Daavidi mamo masiiri Yaave nsiilulu. 10Mu kuyusula bumbyaasi bwa nzo Sawuli, na kudzaangisa mboloko Daavidi mu Iselili na mu Yuuda kuholosono ku Dane natee ku Beresabe. » 11Ise-Bosete kasii bangisina kubvutula musamu ti mosi ko kuri Abenere, bukuri nde waba na boomo bwa nde.
Abenere wabvuutuna na Daavidi
12Hanaho Abenere waheeke banati ba mikeensu kuri Daavidi, mu kuleele ti : « Nsi yi ya na yiri ? Sa lusiilulu na me, na me sa nyakubakisa mu kubvuuta Iselili dyodinso ku kibari kya ye. » 13Daavidi waleele ti : « Bwabubwe ! Me sa nyasa lusiilulu na ye, ngo me kitotolo kimosi kitsu nyiloombo kuri ye : Ye wumono busu bwa me ko, mbuti ye wahele kutumisa Mikali, mwaana Sawuli wamukyeetu, haho ha wukwiisa kumono me. » 14Daavidi waheeke banata ba mikeensu ku Ise-Bosete, mwaana Sawuli mu kuleele ti : « Mpa mukasi waami Mikali, wu nyabakiri mu nkama bikoori bya Bafilisti. » 15Ise-Bosete watuma mu kwemuholo ku bula bwa muutu mosi, Paletyele, mwaana Layisi. 16Mulumi waandi wamunama kuri wukwedila natee ku Bawurimi. Abenere wamuleele ti : « Bvutuka kwaaku ! » Na nde wabvutuka kwaandi.
17Abenere wadzoonso na bakuutu ba Iselili ; nde wabaleele ti : « Na kidzika, beenu lwatiiri ti Daavidi kaba mbyaasi yeenu. 18Mu seenee lolo di, bukuri Yaave wuleele bumabu mu ntoono Daavidi ti : "Mu kooko kwa Daavidi kisari kyaami, me nyikuula kaanda dyaami Iselili mu kooko kwa Bafilisti na mu kooko kwa bataatu baandi bobanso". »
19Abenere wadzoonso se na Benyami, na wayende ku Heberoni mu kwedzoonso kuri Daavidi myominso myamibwe ha miisu mya Iselili na ha miisu mya nzo yoyinso ya Benyami. 20Abenere wayisa ku Heberoni, kuri Daavidi na makuumi moolo ma baatu, Daavidi waha kilaambu kuri Abenere na baatu baba na nde. 21Abenere waleele kuri Daavidi ti : « Me sa nyateleme, sa nyeende na sa nyakutikisa baatu ba Iselili dyodinso mu mpele mfumu yaami mbyaasi ; bo sa basa lulelusunu na ye, na ye sa tuma kwokunso bunu bu tiiriri. » Daavidi wahemese Abenere keende, na nde wayende mu kiyeengi.
Yohabi wadzusa Abenere
22Ha mambisa haho, bisari bya Daavidi na Yohabi banangukina ku mudziingu, banata bitotolo byalaka. Abenere waba weki wahele ha teke Daavidi ku Heberoni, bukuri Daavidi wamuhemisini ti keende kwaandi, na nde wabvutukiri mu kiyeengi. 23Yohabi na mukaangi bayongolo ndemunso baba na nde bu batubuka, baleele kuri Yohabi ti : « Abenere, mwaana Neri wayisiiri kuri mbyaasi, ngo nde wumuhemisinee keende mu kiyeengi, na nde weensyee kwaandi. » 24Yohabi wayende kuri mbyaasi na wamuleele ti : « Buri ye siiri bubwo ? Abenere wiisiree kuri ye, mu nki, ye wumuhemisinee keende, na nde weensyee kwaandi ? 25Ye yaari Abenere, mwaana Neri. Nde wayisiiri mu kukuwuna, na kuyaaba mikotolo na mipalulu mya ye, na kuyaaba myominso miwusa. »
26Yohabi wasiisa Daavidi na waheeke banata ba mikeensu ku mambisa ma Abenere na bo bamubvutula kuholosono ku kidzinga kya Syra kuri Daavidi wahele kuyaaba. 27Abenere bu kabvutuka ku Heberoni, Yohabi wamunata ha luteke lwa mweelu wa kunsa bvula, mu kufuta kudzoonso na nde mu mansweeki, haho nde wamulata mu mwooyo na nde wafwa, mu ntoono kufuunda makila ma Asahele mpaangi yaandi.
28Daavidi bu kayuka myalutiri ha mambisa haho nde waleele ti : « Me wabuuna ha busu bwa Yaave mu ntoono makila ma Abenere, mwaana Neri, na kimfumu kyaami se. 29Nde kasyeetele makila mamo, ha yulu mutu Yohabi na kuri nzo taayi dyaandi yoyinso ; kuba kwakinkulu mu nzo Yohabi baatu babo bakwepala makila bunu pele bari na mbeeri nkabi, baatu bari, mufunu wunu wakwesala bisalu byabakyeetu bunu pele baatu bafwiila mu mbeesi yayila na kwefwa mu nzala mampa. » 30Yohabi na mpaangi yaandi Abisayi badzusiri Abenere bukuri nde wadzusiri mpaangi bo Asahele ku mudziingu wa Ngabahoni#3.30 Kumono 2.18-23..
31Daavidi waleele kuri Yohabi na kuri mpuumbu yoyinso yaba kweyende na nde ti : « Kaakilee binkutu byeenu, lwaatee matsaaka na kotee kifwiiri ha mankula ma Abenere. » Mbyaasi Daavidi waba kweyende ha mambisa ma mvuumbi Abenere. 32Bo badziika Abenere ku Heberoni. Mbyaasi Daavidi wakoto mu kidilu ku mampeembe na baatu bobanso se badila. 33Ha mambisa haho mbyaasi wasa kidilu ki mu ntoono Abenere ti :
Mu nki ye fwiiree, Abenere,
mu lufwa luri bunu lwa kiwulu ?
34Myooko mya ye myabeeri myahele mu bikonyi,
miilu mya ye myabeeri myahele kukaanga mu masyeene,
ngo kasi ye wafwiiri,
bunu bu koofwiila muutu mu myooko mya bimpuumbulu.
Baatu baba haho bahamisa mu kumudila. 35Baatu bobanso bayisa kutuma Daavidi mu kudya, kuri bwiisi bwakiri bwakya, ngo Daavidi walaba maalu, waleele ti : « Hemese Nzaambi kampa nseembulu yamakwa na kabweese yibvuri makwa mbuti me mbimbiri byandya bunu pele kitotolo, tekesele ntaangu yidyaama ! »
36Baatu bobanso bayuka myo bamono ti, myominso myaba saana Mbyaasi, myaba myamibwete, ha miisu mya baatu bobanso. 37Kiluumbu kikyo, baatu bobanso na Iselili dyodinso bayaaba ti kari mbyaasi ko, waheeri miswa mya kudzusa Abenere, mwaana Neri. 38Daavidi waleele kuri bisari byaandi ti : « Beenu lwahele kuyaaba ti lumalu mfumu, muutu wamunene wafwa mu Iselili ? 39Mu lumalu, me nsiiri na makwa ko, ti hayuku me banyitiri maasi bunu mbyaasi, ngo baatu bamaba, baala ba Seruya, bo babvuri mitima bubi ti na me. Hemese, Yaave kabvutula mamabi kuri wamubi, bunu buri bubi bwaandi. »
Alliance Biblique du Congo 2024