2 Samweele 2
2
Daavidi bamubyaalisa mbyaasi mu Yuuda ku Heberoni
1Ha mambisa ma misamu mimyo, Daavidi wafuula Yaave waleele ti : « Me toomboko kwaami ku bvula dimosi dya Yuuda ? » Yaave wamuleele ti : « Toomboko. » Daavidi waleele ti : « Kuri me nyikweende ? » Yaave waleele ti : « Ku Heberoni. » 2Daavidi wayende kukwo na bakasi baandi boboolo, Ahinohami wa ku Yidzerehele na Abingayili mukasi Nabali wa ku Karemeli. 3Daavidi se wanwaatisa baatu baandi baba na nde, mpisi muutu na kaanda dyaandi na bo bayende kudzakala mu mabvula ma Heberoni. 4Bayudayo bayisa ku Heberoni na bayitila Daavidi maasi, bamubyaalisa bunu mbyaasi mu Yuuda. Baleele kuri Daavidi ti : « Baatu ba ku Yabesi dya ku Ngaladi badziikiri Sawuli. » 5Daavidi waheeke binati-mikeensu kuri baatu ba ku Yabesi dya ku Ngaladi mu kubaleele ti : « Beenee lwasakumuna kuri Yaave, bukuri beenu lwasoongiri nkwikumunu kuri mfumu yeenu Sawuli bu lwamudziikiri. 6Mu lumalu, Yaave kayirika mu beenu mu nkwikumunu na mu ngwanwa. Me se sa nyasa mu beenu bubwete bukuri beenu lwasiiri bubwe bubwo. 7Na mu lumalu, myooko mya beenu miba myakiindusu. Beenee baala bari na makwa, bukuri Sawuli mfumu yeenu wafwiiri. Me se bankiriri maasi mu kuba mbyaasi mu nzo Yuuda. »
Isebaale wasoolu mu kuba mbyaasi Iselili
8Abenere, mwaana Neri, mfumu mukaangu bayongolo ba Sawuli, waneti Isebaale, mwaana Sawuli, na wamulutisa ku Mahanayimi. 9Nde wamusa mbyaasi ku Ngaladi, ku bari Asiri, ku Yidzerehele, ku Efarayimi, ku Benyami na mu Iselili dyodinso. 10Isebaale mwaana Sawuli, waba na mibvu makuumi mana ntaangu yi kalutiri mbyaasi Iselili ; nde watuma mibvu myoolo. Ngo bani baatu ba kaanda dya Yuuda banemi Daavidi. 11Ntaangu yatumini Daavidi ku Heberoni mu Yuuda yaba lutaangu lwa mibvu nsaamu na mangoondo masaamunu.
Mudziingu ha kakati dya Yuuda na Iselili ku Ngabahoni
12Abenere, mwaana Neri, na bisari bya Isebaale, mwaana Sawuli, batotoko ku Mahanayimi na batalisa kibari kya Ngabahoni. 13Yohabi, mwaana Seruya, na bisari bya Daavidi batotoko bo se ; bo babwanikina ku kitekulu kya Ngabahoni. Bo batelemene bamaba ku kibari kya kitekulu kimosi na bakaka ku kibari kya kitekulu kyakaka. 14Abenere waleele kuri Yohabi ti : « Habee nkani, bileesi biteleme na binwaanaa ha busu bwa beetu. » Yohabi waleele ti : « Bateleme ! » 15Bilesi byateleme na byaluta, lutaangu lwa kuumi na boolo kuri Benyami mu kibari kya Isebaale mwaana Sawuli, kuumi na boolo mu bisari bya Daavidi. 16Mosi mosi mu bo, wakwaata mbaasi yaandi mu mutu na wamufula mbeesi yaandi yayila mu lubaansi, kuri bobanso babwiiri ha kimosi. Kibeendu kya Ngabahoni kikyo, bakiteele (Lupaangu lwa Matari) Nseke Matari. 17Kikiindu kyaba kyamakwa kwalaka, kiluumbu kikyo. Abenere bamubwiisa na baatu ba Iselili ha busu bwa bisari bya Daavidi. 18Baala bobatatu ba Seruya, Yohabi, Abisayi na Asahele baba haho. Kiimee ko Asahele waba miilu kuleenge bunu kisibu kya maleenge. 19Asahele wadzumuna ha mambisa ma Abenere, nde wamunama kwahele kutatuka ti ku lubakala ti ku lumosi. 20Abenere wakebekele ku mambisa na waleele ti : « Wunde ngwanwa ye, Asahele ? » Nde wabvutula ti : « Wunde me » 21Abenere wamuleele ti : « Tatuka ku lubakala bunu pele ku lumoso, kaanga mosi mu bilesi na holo binwaanunu byaandi. Ngo Asahele kasii kutya kutatuka na nde ko. » 22Abenere wabweese kuleele kuri Asahele ti : « Tatuka kwaaku na me. Buri, ye tiiri ti me nyikudzusa ? Heki lo me buri nyitalala Yohabi mpaangi yaaku ha busu ? » 23Nde wabisa kutatuka, Abenere wamulata nto dyoongi dyaandi mu mwooyo na dyoongi dya palila ku mambisa. Nde wabwa na wafwa hanaho. Mpisi batubukiri ha kibeendu kyafwiiri Asahele, bobanso batelemini. 24Yohabi na Abisayi balaanda Abenere ku mambisa, na ntaangu yadyaama, bu batubuka ku nkoto mulaandu Ama kisusungu na Ngiya, mu nzila nsi yankatu ya ku Ngabahoni 25Baala ba Benyami bakutukuna ha mambisa ma Abenere, bo babvuutuna mpuumbu mosi na bayende kuteleme ha yulu mulaandu. 26Abenere wabikisa kuri Yohabi waleele ti : « Buri tunamitina kweetu kunwaana mu mbeesi yayila ? Ye yaari ko ti sa myaba myangebe ku mankula ? Tee mu kya ntaangu ye wubisa kuleele kuri baatu mu kuhoto kwelaanda bampaangi baaku ? » 27Yohabi waleele ti : « Mu Nzaambi yamwooyo, mbuti ye siiree kudzoonso ko, nkani baatu baketyee kuhoto ko mu kwenama bampaangi baaku tekesele bwiisi bukya. » 28Yohabi wafula mamvumvuri ; baatu bobanso bateleme, bo bahoto kubweese kwelaanda Iselili na bo bahemese kubweese kunwaana. 29Abenere na baatu baandi badyaata butsuku bwabutsiina bubwo kunsa duuru dya Arabi, bo basabuka Yorodaani, badyaata ku Biteroni dyodinso, na batubuka ku Mahanayimi. 30Yohabi bu kahoto kwelaanda Abenere, nde wakutukisa mukaangu bayongolo waandi ndemunso ; baatu ba Daavidi kuumi na wa baba bahele, na Asahele. 31Baatu ba Daavidi badzusiri nkama tatu na makuumi masaamunu ma baatu ba Benyami na ba Abenere. 32Bo banata Asahele na bamudziika mu mukala taayi dyaandi, wuri ku Beteleemi Yohabi na baatu baandi badyaata butsuku bwabutsiina, na mu nkyeelulu bwiisi bo baba beeki ku Heberoni.
Alliance Biblique du Congo 2024