2 Bamakabe 3
3
Kikulu kya Helyodore
Nyekukulu Simoni
1Heki baatu ba bvula dyangisi baba keembaana mu kidzuunu kyakuka, na baba bvuminaana kwakubwe mangisi mu ntoono kinzaambi kya mukuutu ngaanga-Nzaambi Onyasi na kinkenyi kyaandi mu mamabi. 2Bambyaasi bo-meene bababvuminaa Nzo-Nzaambi, na babahaanaa bikabu bibvuriri bubwete. 3Mu didyo, Selekosi, mbyaasi ya ku Adzi waba futaana mboongo dza nde-meene mu ntoono kisalu kya bikabu.
4Ngo Simoni wa mu kaanda dya Bilenga, ngaanga-Nzaambi, kisari kya mu Nzo-Nzaambi, wutalaa nsalulu mboongo. Nde wahele kuyukusina na ngaanga-Nzaambi yayikuutu mu ntoono ya kwetala madzaandu ma bvula. 5Bukuri nde lo wahele kukuka ha busu bwa Onyasi, nde wayende kweemono Apolonihusi, mwaana Teraseya, mukuutu binwaanunu mu ntaangu ya Kohelesiri na Fenisi. 6Nde wamuyaabisa busina bwa Nzo-Nzaambi Yerusalemi, waleele ti yaba na busina bwalaka mu kiteesu kiri bwakutaangila pe, dzibvuriri na dziri mufunu mu ntoono bikabu, na wabweese kuleele ti dzibeeri dzayelemene mu kuha kuri mbyaasi.
Helyodore bamuheeke ku Yerusalemi
7Mu luyolo ku bula mbyaasi, Apolonihusi wamuyaabisa mu ntoono busina bu bamuleeriri. Bu kasooriri Helyodore waba ha mutu misamu, mbyaasi wamusiindika na ntumunu mu kusweeke busina bu basoongiri. 8Hanaho Helyodore waholo nzila mu kwee kyeese mabvula ma Kohelesiri na dya Fenisi, mu ngwanwa mu kusalila bitsimi bya mbyaasi.
9Bu katubuka ku Yerusalemi na kutaambula kuri ngaanga-Nzaambi yayikuutu na kuri bvula, nde wayaabisa mbikululu dziba na mubikiri na kubaangula dyaambu dikisikiri ; ngo nde wafuula mbuti kufutukila kwaandi kwaba kwangwanwa.
10Ngaanga-Nzaambi yayikuutu wamusoongo ti kisweekulu kyaba kya bafwiiri na bisaani, 11na ndaambu se ya babo ba Hyrikani, mwaana Tobi, muutu wadzaangama, na nsobokoso makele masoongiri Simoni, nde waba mu dzodzinso na nkama na dza mipata mya mboongo, na nkama dzoolo dza mipata mya woolo ; 12mu misiiri haba lo bwakusiila pe mu kunyoongoso babo nsiitu mu bungisi bwa kibeendu.
Bvula dyabwa
13Ngo Helyodore, mu ntoono lutumu lwa mbyaasi, waba sikaa kwalaka ti busina bubwo bwayelemene mu kubukaanga munsa kisweekulu kya busina bwa mbyaasi. 14Mu kiluumbu ki kasooriri, nde waba mwakoto mu kutaanga busina bubwo ; ngo nyoongulu dzalaka dzatsyamikina mu bvula dyodinso. 15Bangaanga-Nzaambi mu binkutu byaaku bya bungaanga-Nzaambi, batsukuma ha mankula ma dziku na basaambila Yulu, mutini ngisi mu ntoono bikebulu, mu kumuyingikila mu kuyirika kukebe kwakuka mbakulu babo baba bamwaa kweesuusa. 16Mu kuba na nzelu ya ngaanga-Nzaambi yayikuutu, haba lo kuhele pe kumono mputa kunsa mutima, ti hayuku mu mbeelu na mu nzelu yaandi bisoongo boomo bwa muheebulu waandi. 17Nzala-mwooyo na kinkuuku byabwiila mu nyutu muutu wunde waba soongaana kuri babo babamukyeesaana mpasi dzaba mubamisaana ku mutima. 18Baatu babapalaana mu mampuumbu mu manzo mu kusaambila ha kimosi mu ntoono kudziimbikisa nsoni dziba ŋanikisa kibeendu kyangisi. 19Bakyeetu baba badziinga matsaaka mu yulu mabeene baluulusa manzila, bituuti byabantuumba, bakiri na binkutu ku nzo, baba dzumunaana babamosi ku mpele myeelu, bakaka ku yulu bibaka, bakimi kweyilimina maheengu manzo : 20Bobanso banaanguna myooko ku yulu, baba yayaana. 21Dzaba ngebe mu kumono nsoni na kiheemu kya mpuumbu yiri mu kukiinga ngaanga-Nzaambi yayikuutu kunsa boomo.
22Bu bari mu kuyingikila Yaave ngaa-makwa mu kukebe kwakubwe, mu nsiitu dzodzinso, bikebulu kuri babo bababiheeri, 23Helyodore, nde, kuyirika mini mibasikiri.
Nseembulu dza Helyodore
24Nde waba watekesele kintwaari na mukebi waandi ha mpele kisweekulu, ntaangu yiri Mfumu mampeeve na makwa momanso kapalila mu mpalulu yayinene, mu kuri ti bobanso baba batsima kwiisa haho mpinu dza Nzaambi dzi balata na badziimbisa makwa na bukiindu. 25Nde wamonokono mu kifwaani kya munati-kabvaalu wansisi waba ha yulu mpuunda, na wakuka mu binwaanunu ; wayende mu luwasu, nde watuumba bisyoori byaandi bya mankula kuri Helyodore. Mubakala waba wanwaata ha yulu kabvaalu waba na binwaanunu biri bunu byawoolo. 26Mu kini kilookolo kikyo, bituuti byoolo byababakala byamonokono kuri Helyodore, mu makwa mamanene na mbweeyulu yibvuri, balwaata binkutu byabibwe ; bu bateleme kibari na kibari, bamulata kwahele kuwuuma, bikoti bya kinsosi-kinsosi, 27Helyodore wabwa lwolumosi ha nsi na wadziingima kunsa mampimbisi. Bamutolo mu kumusuusa ha yulu mbuka, 28na mubakala wunde wayisa kukoto munsa nzo ya kisweekulu na mpuumbu baatu kintwaari na bakebi baandi bobanso babanata mu kilookolo ki beki bahele kubweese kubangisina kubakisa nde-meene, kuri baatu baba bayaaba kwakubwe kimfumu kya Nzaambi.
29Mu mpinu dza wangisi, mubakala wunde waba nyonyokinaa kwahele mbeembu, kwahele nsiitu ti dzimosi na lubakusu ti lumosi. 30Nkani kuri babamosi, bo basakumuna Yaave, nde wakeembisiri mu bimaangu bya kibeendu kyangisi, na dziku diri, mu mwakilookolo kyantele, kyaba kyeki kyaluula mu nzala myooyo na kisaangala, kiluuriri mu kiminu na masiiku mu ntoono kimbaangi kya Yaave ngaa-makwa.
31Bambaasi ba Helyodore babingikila mu kuloombo kuri Onyasi mpisi kasaambila Wadzaangama na kaha kidziingu kuri mubakala waba wabitima haho, na waba weki bele na lufwa. 32Mu boomo bwa kuri ti, mbyaasi kahele kutsima ti, mfuundu yayibi Bayudayo basiiri kuri Helyodore, ngaanga-Nzaambi yayikuutu waha kikabu mu kubvutula kidziingu kyamubakala wunde.
33Ntaangu yiri ngaanga-Nzaambi yayikuutu wuri mu kuyoko kikabu kya mpemusunu, bini bituuti byababakala bibyo byabweese kupalila kuri Helyodore, na binkutu binibyo ; bateleme ha teke nde, bamuleele ti : « Bvutula matoondo mamanene kuri Onyasi ngaanga-Nzaambi yayikuutu, bukuri mu ntoono nde Yaave kakuheeri kidziingu, 34nkani kuri ye, wutaamburi maseembu ma Mwa-yulu, yende weyaabisa kuri bobanso makwa ma Nzaambi. » Bu bamana kudzoonso misamu mimyo, bo badziimbila.
Nyiingulu madyeele ya Helyodore
35Helyodore bu kaha kikabu kuri Yaave na kusa nsaambulu dzamakwa kuri wunde wamukebiri kidziingu, wasiisa mbaasi yaandi Onyasi, na wabvutuka kintwaari na mukaangu yaandi ku mpele mbyaasi 36nde wabataanaa kimbaangi kuri bobanso mu biyiriki bya Nzaambi yadzaangama, bi kamwiini mu miisu myaandi.
37Mbyaasi wamufuula nkya mubakala waba wasoolo mu kubweese kumuheeke ku Yerusalemi, Helyodore wabvutula ti : 38« Mbuti ye wuri na mutaatu bunu pele muutu wukwesa mamfuunda mu kimfumu kya ye, lo muheeke kukwo, na mbuti nde yitikiri, lo ye sa wumutaambula ha mambisa ma nkuba yikataambula mantaangu momanso, bukuri mpaanu Nzaambi yadyengekele kibeendu ki. 39Bukuri wunde wuri na nzo kunsa Yulu wuri mu kukebe na wakala kibeendu ki na babo bakwiisa na bitsimi byabibi, nde kabalata na kabafuukisa. » 40Bubwo bwayookiri myominso myayirimini mu ntoono Helyodore na nkebulu kisweekulu.
Alliance Biblique du Congo 2024