2 Bamakabe 2
2
1Badzuukila munsa matinu ti mubikiri Yeremi waha miswa kuri babo babakweende ku bunkutu mu kuholo mbaawu, bunu bu baleeriri, 2ha mambisa ma kubaha Ngisi, mubikiri waha lutumu kuri babo ba babanata, mu kuhele kudzimbikina ntumunu dza Yaave na kuhele kuwumuka kunsa bitsimi mu kumono biteki byawoolo na byapalata na mbweeyulu ya bi bari babalwiika. 3Ha kakati dya mandoongi mari bunu ma bubwo, nde wuri mu kubaleele ti ngisi yaa yitatuka na mitima mya bo ko.
4Munsa matina mamo, mwa yaabisa ti mubikiri bamulubula mu mbikululu, nde wayende na nzo yangooto na nkobo ku mulaandu wanweeti Moose na ku kakyeesiri lubaku lwa Nzaambi 5na nde bu katubuka kukwo, Yeremi wadzuukula ntari ya kudzakala, wakotoso nzo yangooto, nkobo na dziku dya mananaasi, ha mambisa nde wadzibika mweelu. 6Ndaambu bambaasi baandi baba batiiri kweende mu kusa bidiimbu mu nzila, ngo bahele kubangisina kumudzuukila. 7Yeremi bu kamana kuyuka mimyo, wabaŋaŋina na wabaleele ti : « Kibeendu sa kyasaala kwahele kuyabakana natee kukukisa Nzaambi lukutukunu lwa baatu baandi na kusoongo bundeembu bwaandi. 8Heki Yaave sa kabweese kusoongo bitotolo bi, na nkeembu Yaave sa yamonoko mu matuti, bunu bu yamonikini mu ntaangu ya Moose, na mu ntaangu yasaambiri Solomo mpisi kibeendu kyangisi kiba kyakeembusu na kyasakumunu. »
9Bayaabisa se ti, bu kaluula mu madyeele, nde waheeri kikabu kya lusakumunu na manunu nzo yangisi. 10Bunubwo se Moose kasaambiri Yaave na mbaawu yasundukiri ku yulu na yayoko bikabu, bunubwo se Solomo wasaambila, na mbaawu yasunduka yayoko bikabu. 11Moose waleeriri ti bukuri basiiri kukidya ko, ngo nkuumbu kikabu kya mpemusunu masumu kyayiiri. 12Bunubwo se Solomo ka keembele biluumbu mpoomo bya munkeembu.
13Misamu myomimosi badzoonsolo mu mikaanda mimami na miri munsa nsimu dza Nehemi. Bataanga mu myo se dyaburi Nehemi kabariri nzo ya kusweekilaa mikaanda : Wakutukisa mikaanda mitariri bambyaasi na babikiri, ha kimosi na matina Daavidi na mikaanda mya bambyaasi mu ntoono bikabu. 14Mu nzelu yiniyo, Yuuda wakutukisi mikaanda myominso myatsamukina mu ntoono mudziingu wu batubwiisiri, na miri ha myooko myeetu. 15Mbuti luri na nzala myo, lo tuheekileenu baatu mpisi balutwalikila myo.
16Beetu twalutinini mukaanda wumawu kuri tweki bebele dya kukeembele nsyemusunu Nzo-Nzaambi, beenu lwayelemene kuyirika bwabubwe mu kukeembele biluumbu. 17Nzaambi yabvuukisiri baatu baandi bobanso na waha kuri bobanso lubaku, kimfumu, bungaanga-Nzaambi na bungisi, 18bunu bu kataambikiri mu ngisi, Nzaambi yi, beetu twasiila yo kitsimi, ha siiri ha ntele sa katumwiina ngebe na kutukutukisa mu mankonsi mari ha butoto mu kibeendu kyangisi, bukuri nde watukuula mu mamabi mabvuri na watsyeemisini kibeendu kyangisi.
Makanunu ma mutini
19Misamu mya mufunu myayirimini mu ntaangu ya Yuuda Makabe na bampaangi baandi, Bo basiiri nsyemusunu Nzo-Nzaambi yayinene, na babwesiiri kusa lusakumunu lwa dziku, 20na banwaanisini Antyokusi Epifane na mwaana waandi Epatori, 21na monokono dza mayulu dzasalama mu ntoono bari na bukiindu, bari mu kunwaana kwakubwe mu Kiyudayo, mu kiteesu kiri ti hayuku mwa lutaangu lwaaku lwantele, bawoolo bitotolo bya nkoonsi yoyinso na balaanda mpuumbu biwulu, 22babweese kuholo kibeendu kya nsaangu kunsa nsi yoyinso, bakuula bvula na babweese kubvutula mangisi ma babatsima kuyusula, Yaave wabatiisila bundeembu bwaandi bwobunso, 23myominso myayaabisiri Yasoni wa ku Sirene mu mikaanda mitaanu, beetu sa twayelekese kumikufika mu mukaanda mosi. 24Mu kumono lutaangu na mpasi dzimono babo batiiri kuyaaba kikulu mu ntoono ya kufuna kwa misamu, 25beetu twabakiri bitsimi bya kusa nyukusunu na babo batiiri kutaanga kwahele mpasi, myayelemene kuri bo bari na kifu kya kukebe misamu mu bitsimi byaaku, biri mufunu kuri babo bataanga bipapala bimabi.
26Kuri beetu, twahoriri mbakini kisalu kya nkufukulu yimayi, kyaba kari kisalu kyahele mpasi ko, ngo kisalu kya kutukuta na kinsungulu, 27bunu mpasi dza kisalu kya mutumi munkeembu wa ndiilu wusaka kiminu kya bakaka. Bunubwo se mu kubakisa baatu balaka, beetu sa twakuunda mpasi dza kisalu ki, 28mu kusiisa kuri mutini bunkete bwa kukotoso mandaambu mu mpisi ntoono, mpisi beetu tubangisina kusa nkufukila. 29Bukuri bunu mutuungi nzo yamoono wuri na mbindumunu mu ntuungulu yoyinso, heki wunde wasoolo mu kuyibweeyese mu lubuuyi yelemini kusaka biri mufunu mu mbweeyusulu, bunubwo se mu beetu. 30Kukoto mu musamu, kwetala ndemunso, kusuungimina mandaambu momanso, kikyo kisalu kya mutini kikulu, 31ngo mu kuyaaba kusa nkufukulu na kuhele kusoongo misamu myominso myayirimini, bwayelemene kuha miswa kuri mutini mukaanda.
32Ha heki, tubandikeenu kwahele kubweese mikimi ha yulu mituleeriri ; bukuri sa bwaba buwulu mu kudzoonso myalaka mu nkotulu kikulu na kukufika kikulu kyo-meene.
Alliance Biblique du Congo 2024