Filemón 1
1
Numenaca memoria pirsu
1Njua Pablo, nudana pirsu pjia nupeyunda Filemón ikitsindatacada njua lrirricuda ljiaji idejikjeti. Caitsa piajicapishuena matsia presoca njua nudejicapua Jesucristo irsu. Picuadata ljiaji memoria wamenacanda pirsu Timoteo yapiya. 2Njarsutsakja njaji wakitsiñape icadacape icaolreo iwaketacacapewa piipanalicu, caiji rsuashu rsuaji wakitsidua Apia njite ljiaji Arquipo idejicada cai wacaishu. 3Fanirri Dios njite Jesucristo nacadawatsa namatsiaca irsu njite nacadautsa imaudaca.
Pablo yaa matsiadalri Dios irsu Filemón inacu njite lritatjatsakja lrinacu
4Caidalritsa njuaca matsiadalri nu-Dioste irsu nuwaopiacadanacu pjia nutatjacadanacu, 5ima nacaiteca nurso pinacu pipeyuca jurre ljiaji Waminalri Jesucristo njite piemacatsakja taimi lrinacu njite pipeyucatsakja-pida pjiumi njaji icadacape icaolreo Jesucristo-nacu. 6Filemón, picadenina picaolreo Waminalri inacu caishaji wacaishu nini nutatja Dios iinai piajiicarruatsa matsiapja lrinacu pjiumi ljiaji matsiadalri wataitalri wanaitjaca wapeyucapua Cristo. 7Nukitsinda icadaca icaolreo Filemón, catima njua njite juiwi nuwaopiakje numicapua pipeyuca jurre njaji icadacape icaolreo Cristo-nacu, njite picadacapua metaami ljiaji nacaolre.
Pablo itatja matsiacalri Filemón iinai lricuadatacarru ljiaji Onésimo
8Likjaote ljiaji, mafiuca njua nutatjacarru piinai apada mashiacalri. Nutaitacantja nunaca piinaitjacani Cristo iipitananacu, pjinaitjacarru ljiaji pirsulritsa pinaitjaca, 9mitsa lripitananacu ljiaji ipeyukjeti, apadatsa numa piinai. Njua Pablo, pekirrina, njite panaya presodalrica njua nudejicapua Jesucristo irsu, 10nutjata piinai caiwirricutsa picuadatacarru matsia ljiaji nuenipeshudalrina Onésimo, ima lricadaaca lricaoleo Jesucristo-nacu nucanantacadanacupia aji presodapanalricu.
11Uupipiatua, ljiaji Onésimo pinaikitepiacan midalrimtsa, mitsa panaya canacaidalricani pirsu, nursu-tsakja. 12Niini panaya nudietatsenakja pisrun, nuumautsa picuadacani caiji picuadacapishuntja njua. 13Nuumatja lriufacaatua nuinai, lrideejicarruntja nursu piuyawalena presocadanacu njua lrikajote ljiaji nucanantacapua ljiaji yaacuti icadacada parsu yuumecai. 14Mitsa currim numa nunaitjaca cayu curricadanatua cuan piaco, ima pikitsindatacadautsa, pikitsindatacarruatsa njua picaolrerrikjuite currimintja nunaacapuaca pjia. 15Caipiatsamjina Dios iacadaca Onésimo yaapiatua piuya, lridicarruatsa lriufaa piinai panaya caidalriwetsa, 16mitsa currinatsa caica idejicadalrishu pirsu, mitsa matsiapjenakja lriuya ljiaji idejicacada parsu: caiji pakitsinda papeyundashu. Nupeyundacani jurre, micatsa pirsutsa pipeyupjacani, currim inaikicapuacani mitsa pipeyutsakjani caiji piwerrishu Waminalri iipitananacu.
17Niini, picapacadaa njua caiji pikitsindashu icadacada icaolreo, picuadatenani caiji picuadatacapishuntja njua. 18Lrinaitjacadaa mashi pirsu, o lridewecada-tsakja pjia, njuawatsa icawiñani. 19Njua, Pablo, nudana nucapishu: njuawatsa icawiñani. Njite curriwatsa nunumatamitsa ljiaji pideewerri inacu njua ljiaji imalri matsiakena Dios icapaca pjia. 20Pjia nukitsinda icadaca icaolreo Filemón, pinaitja nurso ljiaji matsiacalri, micatsa manaitjatsani nuikjaote, pinaitjani pipeyucapua ljiaji Waminalri. Pikjaidata nucaolre nukitsindacapua pjia Cristo-nacu.
21Nucadaa nucaolreo pjiepacautsa njua, niini nudana pirsu, ima nuajintsaotsa pinaitjaca aimapja lriuya ljiaji nutatjalri piinai. 22Apadapjatsakja nutatja piinai matsiacalri, pimachieta nupia nuucacarrudao; ima nuwapacaotsa nucapa ljiaji itatjalri Dios iinai, lricadacadautsa nua nucapa iikjaolre.
Pablo icaite yaacunao
23Memoria pirsu njaji Epafras, nukitsinda presoca lrikjaote ljiaji Jesucristo, 24njite ljiatsakja ljiaji Marcos, Aristarco tsakja, Demas tsakja njite Lucas, njaji ikitsindatacape njua lrirricuda ljiaji idejikjeti.
25Waminalri Jesucristo lricadawatsa lrimatsiaca inacu padenirri.
© 2025 CLAN
© 2025 Seed Company