Santiago 1
1
Santiago Imemorian
1Njua, Santiago, idejicada Dios irsu njite Waminalri Jesucristo irsu tsakja, nudana ljiaji paperra narsu naji doce-puco njaji judionai sheepacaperri ipucutacapewa pjiumi jalredaucalricu. Icuadata ljiaji yacuti nucaiterri.
Itarrawata jirrapitinadalri ikjuete
2Nukitsiñape, catimaperriwatsa yajiacacawa jiyapacadanacuatsa nanacu njaji lriwishupa lricapao shaa. 3Ima lriwicadanacuatsa licapao cuanca icadacada icaolreo ajadalri Dios-nacu yaajinautsa itawarrata kjaidaa lrikjuete jirrapjitacadanacu. 4Mitsa irsutsa itarrawataca pjiumi lrikjuete itaitacarruatsa taarraperrishukena shaa, matsiaperrishu, curricarru cuca canacai irsu.
5Niinicada apada inakjuite yumacada lrishuca ljiaji yaajikjeti, lirsutsa lritatjacani Dios inai, njite lriawatsa lrirsuni; ima ljiaji Dios lriaca jurrepe nacuanam mametacanatsa. 6Micatsa lrirsutsa lritatjacani lricaule ajadalishu, liwaopiakje apadadalritsa yapiya; ima lriaji yamadade iwaopiakje caicaniji uuni iñukjashu, caolri idejinda kjerrecatsa. 7Ljiaji caidalriji, curriwatsa lriwaopia lriwapaca lricapa cucaidamiketsa Waminalri iinai, 8ima naji yamadaperri iwaopiakje, curriwatsa naufacarrucawa matsia.
9Lriaji icadacada icaoleo kjenadalritsa yuufacawa lrirsutsa lricatimatacacao lriajicapua cacuadadalricani Dios irsu; 10njite ljiaji cananidalri lirsutsa lricatimatacacao Dios icadanacuatsa teewacaljepjani apetsida yuya. Ima ljiaji lriyarruaji jiyapacadacatsautsani caiji malritsi iiwishu. 11Ima kjaidacadanacuena jamuca ljiaji jerri, limetataca ljiaji malishi, njite ljiaji lriiwi ljiwacao njite lrimatsiaca iwayacacao ljiaji malritsi. Caitsakja, ljiaji cananidalri lriñacautsao napiya pjiumi njaji lriyarruaji.
12Catimadalriwatsa ljiaji itarrawatacada kjaidalricu lrikjuete ljiaji lriwishupa, ima ljiyapetacadanacuatsani lrirsuwatsa licuadape icatsa ljiaji jalredauca mawayacadalri, ljiaji Dios icaitenda lriaca narsuwalre njaji ipeyucapeni. 13Ninicada apada inakjuite lricapacadanacu ljiaji lricadaalri lricapao linaitjacarruntja maashi, mawaopiatsaotsa Dios-ca ljiaji iwi icapao shaa, ima ljiaji Dios currim ljiaji cuanca ljiaji paumacantja panaitjaca maachi, njite curritsakja lriumaca apada yumacarrutja inaitjaca maashi. 14Mitsadekja, pawaopiakje upidalimtsa icadaa paumaca panaitjacarru cayu pacadacapua ljiajii-panacu. 15Nanakjuite njaji maashiperri paumalri panaitjaca icatsa lrimutucao ljiaji imashicanati; njite lrinakjuitena ljiaji imashicanati, lritawiñacadanacuenawa panacu, icamitsa pawapalica ljiaji mayamica pja piketem.
16Nukitsiñape nupeyunipe, macashatacatsao: 17pjiumi ljiaji matsiadalri njite mayacandalri warsulri, lrinuca yenunite, Dios-njite. Ljiaji inaitjacada jeerri, kerri njite jiwirrida. Ljiaji Dios caidalricatsani, apadadalricatsani caidalritsa. 18Ljia, caicapuatsa lriumaca, lricadaa wamutucarrua walridalishu lrinakjuite ljiaji yaacuti ajadalri, cacoadaperricarru-pjawatsa faa nanakjuite njaji lrinaitjanpe.
Parsutsa panaitjaca ljiaji licaiterri ljiaji yaacuti
19Nukitsiñape nupeyunipe, iwaopia ljiaji: pjiumi shaa irsutsa kjeyaperrica jimica; njite iwaopiacarrutua matsia lripjeya cacuca shaa njite wadee keerruaca shaa kjeya. 20Ima ljiaji atsia keerruadalri currim lritaita lrinaitjaca caiji Dios yumacapishu. 21Nini caishupa jita ljiaji caupitjadalri njite maashidali icaulre yuya, njite jípa inacua kjenaperrishutsa ljiaji Dios yacu lriapanandena icaolerricu; ima icatsa ljiaji yacuti itaitacada iyumjeta shaa.
22Mitsa inaitja caiji Dios yacu icaitecapishu wadee jimikjapancatsani. Wadentja icashatacacao jiwacatsa. 23Ima ljiaji jimicadatsa ljiaji yacuti, njite curri lrinaitja cayu, caicaniji apada icapacacadao canalrerricu: 24lricapacacao ljiwacatsa, njite jienacadanacu lriuya curritsa ljiaji ljiajica lricapacana. 25Mitsa ljiaji inaitjacada caiji lricaitecapishu ljiaji yacuti, njite lriuma lriajicarrupja lrinaco ljiaji yacuti Dios inanda feepaca, matsiadalri, jitacada pja lriuya ljiaji mashidalri, njite lriemacadawatsa taimiwa lrinaitjacarru caiji lrinaacapishu, catimadalricaostani lrinaco ljiaji lrinaitjalri.
26Apada icaitecadaa lrinaitjaca caiji Dios yacu icaitecapishu, mitsa currim lridanataca lrienene yacuti mastidalri yuya, lricashatacacao lriwacatsa njite midalritsa ljiaji lricaiterri. 27Ljiaji panaitaca caiji Dios yumacapishu icatsa ljiaji pakitsindataca njaji mjanirriperrim njite maduiyuanaipem naumacadanacu pakitsindatacana, njite macadatsa jaledauca imashicana imashiketa pjia.
© 2025 CLAN
© 2025 Seed Company