Santiago 5
5
Santiago icaite narsu njaji cayarruajiperri
1¡Panaya jimi nuaco shaa cananiperri! ¡Iiya njite jiemata lricaiya ima ljiaji jirrapjitaliutsa! 2Ima ljiaji irricuca lriwayacacautsao, njite njaji itsayan cacuadaperri camarra iñacautsana. 3Njaji iyarruaji iwaketaji naapacautsao, njite njatsautsa naji inani iipacapemwa icaite yaacunawa njite namatsiketa-cautsa shaa caiji tiyee imjaitacapisho. Ima iwaketjenina inanio tsumicadacuetsa lrinana ljiyapacarrua ljiaji jalredauca. 4Icapakjepa, ljiaji nadejicalre icuada curridalri icawiña narsu njaji idejicape irsu ipaniapji, ljiematjaca kjaidaa ikjuete; njite ljiminina narsu ljiaji Waminalri kjaidadalri. 5Aji jalredaucalricu yuufenina inani jurredali yapiya caiji yuumacapishu, ikepetacacao caiji nakepetacapishu maaficalri nainucarrun. 6Nacaitjenina mashi nanaco naji mamashinaperritsa njite nainona, njite currim nauma nacoadao.
Njaji sheepacaperri narsutsa natarrawataca
7Mitsa shaa nukitsiñape, itarrawatena ljiaji iwaopiakje atee akjerreca Iminalriti ipieta inuca. Inaitja lricayushu ljiaji yaapanacaita, lrirsutsa lriwapa iiya itawiñeta njaji lripania lritaitacarru ljitaca nainaca matsiadalripe. 8Caitsakja shaa, irsutsa itarrawataca njite yema taimawa, ima kjeyenatsa lrinuca ljiaji Waminalri.
9Nukitsiñape, mjemitetatsa apana inacu wadeewatsa nacaiteca shaaca irsu maashicalri; ima ljiaji Waminalri icaitecadautsa naacuna pjiumi, tsuminatsani. 10Nukitsiñape, icapa iicao cuanca njerrapjitaca njite natarrawataca njaji inuparrutacapepia ljiaji Dios yaacu, cacunipia Waminalri iipitananacu. 11Ima wacaitenina, catimaperrica njaji itarrawatacape lrikjuete ljiaji jirrapjitakjeti. Jiminina cuanca Job itarrawataca lrikjuete ljiaji ljirrapjitalri njite yaajinina cuanca Dios inaitjaca lrishu piketem, ima ljiaji Waminalri matsia lrinaitjaca njite kjenaa lricapaca warsu.#Job 1:21-22; 2:10; 42:10-17
12Mitsa nukitsiñape pjiumi yuya, macaitetsa inaitjacautsa cuandalrica neepitananacu naji eenu njite jiipai tsakja, currim tsakja cucaida-nacuca. Icaitecadaa "ajadalri", ajadalrican; njite icaitecada "currican", curricani, wadewatsa Dios icaiteca camashicanaperrimca shaa.
Iwaopia Dios-nacu kjerrecawa-catsa cuancadacucatsa
13Niinicada inakjuite apada inunadalri, lrirsutsa lricaiteca Dios, catimacadanacun lrirsutsa lricantaca Dios irsu. 14Aapee iyamicadaa inakjuite, lrirsutsa lriwanaca njaji iwapacape iglesia, nacaitecarru Dios lrinacu njite nainjetacarru aceite-shuni Waminalri iipitanacu. 15Itatjacadaawatsa Dios iinai ajadalri icaolerrikjuite matsiawatsa ljiaji iyamicada; njite lrinaitjacadapia lrimashicanawa Dios-watsa ipecu lriuyana. 16Caishupa, icaite yuyao njaji imashicana irsuwaca njite icaite Dios inacuwaca Dios imatsietacarru shaa. Ima lrirsuca jurre jiidati ljiaji patatjacada Dios iinai pacaolre ajadalri yapiya. 17Ljiaji Elías jiyapetacaita Dios yacu uupi, inaikipia caitsa wacaishu, nini lritatjacadanacupia Dios lricaolerrikjuite curricarru iiyani, yaamipiaca iiyacan madalrida camui lrinaculjepja pamuyua.#1 R 17:1; 18:1 18Ljiapudamite, lripieta lritatjaca iiyacarrun njite iiyaan njite namuto-tsenakjao njaji napania.#1 R 18:42-45
Pamatsietaca painaiwa njaji imacacape Dios yacu
19Nukitsiñape nucaite sha, ninicadaa apada inakjuite imacacada Dios yaacu njite ljiaji apada lricaitetsenakjani lriumacarru Dios, 20Yaajiwatsa, ljiaji icaitecada lrinaiwa ljiaji lrikitsinda imacacada Dios yacu, lridiacarru-tsenakja lriuma Dios, lriyumjetacautsani mayamicalri yuya, njite lricadatsakjaotsa Dios ipecuca lriuya njaji lrimashicana.
© 2025 CLAN
© 2025 Seed Company