Santiago 3
3
Warsuta waajii cucaca ljiaji wamuetuelri wanumalikjuite
1Nukitsiñape, macadatsa aima yuumacape icanantaca inakjuite ima Dios watsa jirrapjiteta maashinaapja faa nauya. 2Ajadalri imatadacapecatua pjiumi faa; niinicadaa apada curridalri imatada lriacu nacu, inaiki taimidalrikena yeemacawa, yaajicada iwapaca pjiumi lridaki mashirri yuya. 3Yajicarrupja matsia, nucaite jimi ljiaji comparación: wapapicadaa ljiaji caballo inuma wadejicarruni, nindekja wataitaitja wadejicani akjerracatsa wauma. 4Njite icapatsakja njaji lancha macafialripe: kjaidadalrica ljiaji caolri ipjialri naacarrua, mitsa ljiaji ideecada naapiyao lritaita ljienitacana kjerrecatsa lriuma lrishu ljiaji timón tsuitecadanatsan. 5Caitsakja lrinacu ljiaji penene: padaki inakjuitedalri tsuitetsa, mitsa lrishu pataita panaitjaca yacuti jurredalri. Ljiaji penene caicaniji tiyee shudalrishutsa itaitacada jimaitaca apada awacada. 6Ljiaji yaacuti wamutuetalri weneneshu caicanaji tiyeeshu. Ljiaji penene lrisru jiidati lrinaitjacarru maashi. Lritaita lrimashiketaca pjiumi cuanca waufacao, litaitatsakja licadaca wamao aji pjerrapjitacawa liculjewatsa. 7Njaji inaiki nataita naajica pjiumi maaficali-nacu, wiipjiarru, aapi, njite pjiumi njaji maficalri uuni macapawanrricupe; 8mitsa currimtua pacapa apada itaitacada yaajica linacu ljiaji lienene. Mashidalican mawafetacadalitsao, pakjamidali lishu ljiaji capuadali itaicada iinuca pja. 9Peneneshu paa matsiadali Waminalri njite Fanirri Dios irsu, njite lishumini-tsakja cacupja maahi nanacu njaji inaiki Dios inaitjanipe cayuji licayushu.#Gn 1:26-27 10Apapeculritsa ljiaji panuma pamutuetalri yacuti matsiadalri njite matsidalri-tsakja. Nukitsiñape currim matsia panaitjaca cayu. 11¿Capja pataita pauketaca uuni matsíanjai, caupitjanaitsakja apafetsa unipao? 12Nukitsiñape ¿Capja naranja lritaita cainacan mango?, o ¿limón itaita cainacan jemalri? Caitsakja currim pataita pjetaca unni putiyanjai, piiwanjaitsakja apafetsa uunica.
Ljiaji yajikjeti ajadalri Dios inakjuitedalri
13Ninicadaa aape cajikjedalri ipeculricu, inaa lricañatani lrishu ljiaji lrinaitjalri matsia lriwaopiakje kjenadalri yapiya. 14Mitsa icadacadaa lijipitita icaole ljiaji ikemikjeti, njite ljiaji inaitjalri inaitjacan shametashupatsa, curriwatsa cuca ima catima yajiacacawa, curricadana inaitja caiji lricaitecapishu ljiaji ajadalri. 15Ima ljiaji yajikjeti caidalri currim Dios inakjuitedalrican, jalredaucalricudalricani, inaiki inakjuitedalri njite ñacaim tsakja. 16Ima njaji ikemicape njite njaji iwaopiacape nanacuwacatsa, maashica naufaaca napiyawaca, nanaitjaca pjiumi maashidalri; 17mitsa njaji irsucape ljiaji yaajikjeti Dios inakjuitedalri, currim nanaitjaca ljiaji mashidalri; mitsadekja, meerruaperricatsana, yajiicape jimica narsu naji apaana njite njepa nanacua ljiaji yacuti matsiadalri nacaitelri narsu. Nanaitjatsakja matsia narsu njaji canacaiperri irsu, icapacape pacuaca njaji inaiki currim apadapenacatsa njite nacaiteca nawaopiakje ajadalri. 18Njite njaji yuufacape namaodacatsao njite nakitsindata apaana naufaacarrua namaudaca, matsiadalriwatsa lricuada narsu njite narsutsakja njaji paana.
© 2025 CLAN
© 2025 Seed Company